ਇਨਕਮ ਟੈਕਸ ਰਿਫੰਡ ਦੇ ਨਾਂ 'ਤੇ ਲੋਕਾਂ ਨਾਲ ਹੋ ਰਹੀ ਲੱਖਾਂ ਰੁਪਏ ਦੀ ਠੱਗੀ, ਸਾਈਬਰ ਕ੍ਰਾਈਮ ਸੈੱਲ ਨੇ ਜਾਰੀ ਕੀਤੀ ਚੇਤਾਵਨੀ

ਜੇਕਰ ਤੁਸੀਂ ਇਨਕਮ ਟੈਕਸ ਦਾ ਭੁਗਤਾਨ ਕਰਦੇ ਹੋ ਤਾਂ ਸਾਵਧਾਨ ਹੋ ਜਾਓ। ਦਰਅਸਲ, ਤੁਹਾਨੂੰ ITR ਰਿਫੰਡ ਦੇ ਇਨਕਮ ਟੈਕਸ ਦੇ ਨਾਮ 'ਤੇ ਜਾਅਲੀ ਮੇਲ ਜਾਂ ਐਸਐਮਐਸ ਮਿਲ ਸਕਦਾ ਹੈ। ਇਸ ਵਿੱਚ ਇਨਕਮ ਟੈਕਸ ਰਿਫੰਡ ਦੀ ਰਕਮ ਬਾਰੇ ਵੀ ਜਾਣਕਾਰੀ ਹੋ ਸਕਦੀ ਹੈ। ਇਸ ਪੈਸਿਆਂ ਦੇ ਲਾਲਚ 'ਚ ਜੇਕਰ ਤੁਸੀਂ ਮੇਲ 'ਤੇ ਕਲਿੱਕ ਕਰਦੇ ਹੋ ਜਾਂ ਇਸ 'ਚ ਪੁੱਛੇ ਗਏ ਵੇਰਵੇ ਭਰਦੇ ਹੋ ਤਾਂ ਤੁਸੀਂ ਧੋਖਾਧੜੀ ਦਾ ਸ਼ਿਕਾਰ ਹੋ ਸਕਦੇ ਹੋ। ਕਈ ਲੋਕਾਂ ਨੂੰ ਅਜਿਹੀਆਂ ਮੇਲ ਮਿਲ ਰਹੀਆਂ ਹਨ। ਸਾਈਬਰ ਕ੍ਰਾਈਮ ਸੈੱਲ ਨੇ ਵੀ ਇਸ ਸਬੰਧੀ ਚੇਤਾਵਨੀ ਜਾਰੀ ਕੀਤੀ ਹੈ।

ਇਨਕਮ ਟੈਕਸ ਵਿਭਾਗ ਦੀ ਅਧਿਕਾਰਤ ਈ-ਮੇਲ ਅਤੇ ਵੈੱਬਸਾਈਟ ਦੇ ਸਮਾਨ ਨਾਵਾਂ ਨਾਲ ਈਮੇਲ ਤੇ ਮੈਸੇਜ ਭੇਜੇ ਜਾ ਰਹੇ ਹਨ। ਜੇਕਰ ਤੁਹਾਨੂੰ ਵੀ ਇਨਕਮ ਟੈਕਸ ਵਿਭਾਗ ਤੋਂ ਰਿਫੰਡ ਲੈਣ ਲਈ ਅਜਿਹਾ ਈ-ਮੇਲ ਜਾਂ SMS ਆਉਂਦਾ ਹੈ, ਤਾਂ ਤੁਹਾਨੂੰ ਸਾਵਧਾਨ ਰਹਿਣ ਦੀ ਲੋੜ ਹੈ। ਅਜਿਹੀ ਕਿਸੇ ਵੀ ਮੇਲ ਜਾਂ SMS 'ਤੇ ਵਿਸ਼ਵਾਸ ਨਾ ਕਰੋ ਨਹੀਂ ਤਾਂ ਤੁਸੀਂ ਬਹੁਤ ਵੱਡੀ ਠੱਗੀ ਦਾ ਸ਼ਿਕਾਰ ਹੋ ਜਾਓਗੇ।

ਧਿਆਨ ਰੱਖਣ ਵਾਲੀਆਂ ਗੱਲਾਂ:

-ਸਾਈਬਰ ਮਾਹਿਰਾਂ ਦਾ ਕਹਿਣਾ ਹੈ ਕਿ ਇੱਕ ਛੋਟੀ ਜਿਹੀ ਗ਼ਲਤੀ ਵੀ ਤੁਹਾਨੂੰ ਬਹੁਤ ਮਹਿੰਗੀ ਪੈ ਸਕਦੀ ਹੈ। ਅਜਿਹੇ ਈਮੇਲ ਤੇ ਮੈਸੇਜ ਨੂੰ ਨਾ ਤਾਂ ਖੋਲੋ ਤੇ ਨਾ ਹੀ ਕੋਈ ਰਿਪਲਾਈ ਦਿਓ। ਕਿਸੇ ਵੀ ਲਿੰਕ 'ਤੇ ਕਲਿੱਕ ਨਾ ਕਰੋ ਅਤੇ ਨਾ ਹੀ ਕੋਈ ਅਟੈਚਮੈਂਟ ਖੋਲ੍ਹੋ, ਕਿਉਂਕਿ ਤੁਹਾਨੂੰ ਪਤਾ ਹੋਣਾ ਚਾਹੀਦਾ ਹੈ ਕਿ ਇਨਕਮ ਟੈਕਸ ਵਿਭਾਗ ਕਿਸੇ ਵੀ ਇਨਕਮ ਟੈਕਸ ਦਾਤਾ ਨੂੰ ਈ-ਮੇਲ ਜਾਂ ਐਸਐਮਐਸ ਰਾਹੀਂ ਕੋਈ ਲਿੰਕ ਨਹੀਂ ਭੇਜਦਾ ਹੈ।

-ਆਉਣ ਵਾਲੀ ਈ-ਮੇਲ ਦੇ ਡੋਮੇਨ ਨੇਮ ਦੀ ਜਾਂਚ ਕਰੋ। ਜਾਅਲੀ ਈ-ਮੇਲਾਂ ਵਿੱਚ ਆਮਦਨ ਕਰ ਵਿਭਾਗ ਦੀ ਵੈੱਬਸਾਈਟ ਦੇ ਸਪੈਲਿੰਗ ਦੀਆਂ ਗਲਤੀਆਂ ਹੋਣਗੀਆਂ। ਈ-ਮੇਲ ਦਾ ਹੈੱਡਰ ਗ਼ਲਤ ਹੋ ਸਕਦਾ ਹੈ। ਇਸੇ ਤਰ੍ਹਾਂ, ਵੈੱਬਸਾਈਟ ਦਾ ਲਿੰਕ ਛੋਟੇ ਰੂਪ ਵਿੱਚ ਹੋ ਸਕਦਾ ਹੈ। ਸਭ ਤੋਂ ਵੱਡੀ ਪਛਾਣ ਇਹ ਹੈ ਕਿ ਇਨਕਮ ਟੈਕਸ ਵਿਭਾਗ ਤੋਂ ਆਉਣ ਵਾਲੇ ਕਿਸੇ ਵੀ ਮੈਸੇਜ ਜਾਂ ਈਮੇਲ ਵਿੱਚ, ਤੁਹਾਨੂੰ ਲਿੰਕ 'ਤੇ ਕਲਿੱਕ ਕਰਕੇ ਆਪਣੀ ਨਿੱਜੀ ਜਾਣਕਾਰੀ ਭਰਨ ਲਈ ਨਹੀਂ ਕਿਹਾ ਜਾਂਦਾ ਹੈ।

ਇਸ ਤਰ੍ਹਾਂ ਲਈ ਜਾ ਸਕਦੀ ਹੈ ਆਪਣੇ ਰਿਫੰਡ ਦੀ ਜਾਣਕਾਰੀ: ਕਿਸੇ ਵੀ ਤਰ੍ਹਾਂ ਦੀ ਅਧਿਕਾਰਤ ਜਾਣਕਾਰੀ ਲਈ ਤੁਸੀਂ ਆਮਦਨ ਕਰ ਵਿਭਾਗ ਦੀ ਵੈੱਬਸਾਈਟ http://www.incometaxindiaefiling.gov.in 'ਤੇ ਲੌਗਇਨ ਕਰਕੇ ਕਿਸੇ ਵੀ ਜਾਣਕਾਰੀ ਨੂੰ ਸਿੱਧਾ ਪ੍ਰਾਪਤ ਕਰ ਸਕਦੇ ਹੋ। ਜੇਕਰ ਤੁਸੀਂ ਟੈਕਸ ਦਾ ਭੁਗਤਾਨ ਕਰਦੇ ਹੋ ਅਤੇ ਤੁਹਾਡਾ ਰਿਫੰਡ ਨਹੀਂ ਆਇਆ ਹੈ, ਤਾਂ ਇਸ ਦੇ ਲਈ ਸਭ ਤੋਂ ਸੁਰੱਖਿਅਤ ਤਰੀਕਾ ਇਹ ਹੈ ਕਿ ਸਿਰਫ਼ ਇਨਕਮ ਟੈਕਸ ਦੀ ਅਧਿਕਾਰਤ ਵੈੱਬਸਾਈਟ 'ਤੇ ਲੌਗਇਨ ਕਰਕੇ ਆਪਣੇ ਸਟੇਟਸ ਦੀ ਜਾਂਚ ਕਰੋ।