BSF ਨੇ ਪਾਕਿਸਤਾਨ ਨੂੰ ਨਹੀਂ ਦਿੱਤੀ ਈਦ ਦੀ ਮਠਿਆਈ, ਬੰਗਲਾਦੇਸ਼ ਨਾਲ ਨਿਭਾਈ ਰਸਮ

ਬੀਐੱਸਐੱਫ ਅਤੇ ਪਾਕਿਸਤਾਨ ਰੇਂਜਰਸ ਵਿਚਾਲੇ ਈਦ ਦੇ ਮੌਕੇ ’ਤੇ ਰਵਾਇਤੀ ਤਰੀਕੇ ਨਾਲ ਹੋਣ ਵਾਲੀ ਮਠਿਆਈਆਂ ਦੀ ਵੰਡ ਵੰਡਾਈ ਅੱਜ ਭਾਰਤ ਪਾਕਿਸਤਾਨ ਸਰਹੱਦ ’ਤੇ ਨਹੀਂ ਹੋਈ। ਅਧਿਕਾਰੀਆਂ ਨੇ ਦੱਸਿਆ ਕਿ ਦੋਵਾਂ ਮੁਲਕਾਂ ਵਿਚਾਲੇ ਤਣਾਅ ਦੇ ਚੱਲਦੇ ਇਕ ਦੂਜੇ ਨਾਲ ਮਠਿਆਈਆਂ ਵੰਡਾਉਣ ਤੋਂ ਗੁਰੇਜ਼ ਕੀਤਾ ਗਿਆ। ਉਨ੍ਹਾਂ ਕਿਹਾ ਕਿ ਸਰਹੱਦ ਪਾਰੋਂ ਦਹਿਸ਼ਤਗਰਦੀ ਦੀਆਂ ਘਟਨਾਵਾਂ ਪੱਛਮੀ ਸਰਹੱਦ ’ਤੇ ਹਮੇਸ਼ਾਂ ਵਾਂਗ ਜਾਰੀ ਹਨ, ਇਸ ਲਈ ਮਠਿਆਈ ਦੀ ਆਪਸ ਵਿੱਚ ਵੰਡ ਵੰਡਾਈ ਭਾਰਤ ਪਾਕਿਸਤਾਨ ਕੌਮਾਂਤਰੀ ਸਰਹੱਦ ’ਤੇ ਜੰਮੂ ਤੋਂ ਗੁਜਰਾਤ ਤਕ ਕਿੱਧਰੇ ਵੀ ਨਹੀਂ ਹੋਈ।

ਅਧਿਕਾਰੀਆਂ ਨੇ ਕਿਹਾ ਕਿ ਪਿਛਲੇ ਸਾਲ ਦੀਵਾਲੀ, ਆਪਣੇ ਸਥਾਪਨਾ ਦਿਵਸ (1 ਦਸੰਬਰ) ਅਤੇ ਗਣਤੰਤਰ ਦਿਵਸ 'ਤੇ ਇਹ ਰਸਮ ਨਿਭਾਉਣ ਦੀ ਕੋਸ਼ਿਸ਼ ਕੀਤੀ ਸੀ, ਪਰੰਤੂ ਇਸ ਕਦਮ 'ਤੇ ਪਾਕਿਸਤਾਨ ਵੱਲੋਂ ਕੋਈ ਪ੍ਰਤੀਕਿਰਿਆ ਨਹੀਂ ਮਿਲੀ।

ਹਾਲਾਂਕਿ, ਬੀਐਸਐਫ ਨੇ ਬੰਗਲਾਦੇਸ਼ੀ ਫੌਜ ਨਾਲ ਪੂਰਬੀ ਸਰਹੱਦ 'ਤੇ ਮਠਿਆਈਆਂ ਦਾ ਆਦਾਨ ਪ੍ਰਦਾਨ ਕੀਤਾ। ਬੀਐਸਐਫ ਦੇ ਦੱਖਣੀ ਬੰਗਾਲ ਫਰੰਟੀਅਰ ਦੁਆਰਾ ਜਾਰੀ ਇਕ ਬਿਆਨ ਵਿਚ ਕਿਹਾ ਗਿਆ ਹੈ, "ਦੋਵਾਂ ਦੇਸ਼ਾਂ ਅਤੇ ਸਰਹੱਦੀ ਸੁਰੱਖਿਆ ਬਲਾਂ ਦੇ ਆਪਸੀ ਸਬੰਧਾਂ ਵਿਚ ਗਰਮਜੋਸ਼ੀ ਨੂੰ ਕਈ ਮੌਕਿਆਂ 'ਤੇ ਦਿਖਾਇਆ ਗਿਆ ਹੈ, ਜਦੋਂ ਉਨ੍ਹਾਂ ਨੇ ਈਦ ਸਮੇਤ ਕਈ ਮੌਕਿਆਂ 'ਤੇ ਜਸ਼ਨਾਂ ਨੂੰ ਸਾਂਝਾ ਕੀਤਾ. "ਬਿਆਨ ਵਿਚ ਕਿਹਾ ਗਿਆ ਹੈ, 'ਸਰਹੱਦੀ ਚੌਕੀਆਂ' ਤੇ ਤਾਇਨਾਤ ਬੀਐਸਐਫ ਦੇ ਜਵਾਨਾਂ ਨੇ ਬੰਗਲਾਦੇਸ਼ ਵਿਚ ਉਨ੍ਹਾਂ ਦੇ ਹਮਰੁਤਬਾ ਨੂੰ ਵਧਾਈ ਦਿੱਤੀ।