2 ਸਾਲ ਦੇ ਬੱਚੇ ਨੂੰ ਗੱਡੀ 'ਚ ਛੱਡ ਕੇ ਚਲਾ ਗਿਆ ਪਿਉ, ਦਮ ਘੁੱਟਣ ਨਾਲ ਹੋਈ ਮਾਸੂਮ ਦੀ ਮੌਤ

ਅਮਰੀਕਾ ਤੋਂ ਇੱਕ ਦਿਲ ਦਹਿਲਾ ਦੇਣ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਇੱਥੇ ਇੱਕ ਕਾਰ ਵਿੱਚ ਬੰਦ ਦੋ ਸਾਲ ਦੇ ਬੱਚੇ ਦੀ ਅੱਤ ਦੀ ਗਰਮੀ ਕਾਰਨ ਮੌਤ (Child Died in Car ) ਹੋ ਗਈ। ਇਹ ਘਟਨਾ 27 ਫਰਵਰੀ ਨੂੰ ਅਲਾਬਾਮਾ ਦੇ ਐਟਮੋਰ ਵਿੱਚ ਵਾਪਰੀ। ਇਸ ਘਟਨਾ ਬਾਰੇ ਐਡਵੋਕੇਸੀ ਗਰੁੱਪ ਨੇ ਕਿਹਾ ਹੈ ਕਿ ਅਮਰੀਕਾ ਵਿੱਚ ਸਾਲ 2023 ਦੀ ਇਹ ਪਹਿਲੀ ਹਾਟ ਕਾਰ ਮੌਤ ਹੈ। ਬੱਚੇ ਦੇ ਪਿਤਾ, 51 ਸਾਲਾ ਸੀਨ ਰੌਂਸਵਾਲ 'ਤੇ ਲਾਪਰਵਾਹੀ ਨਾਲ ਹੱਤਿਆ ਕਰਨ ਦਾ ਦੋਸ਼ ਲਗਾਇਆ ਗਿਆ ਹੈ।

USA ਟੂਡੇ ਦੀ ਰਿਪੋਰਟ ਅਨੁਸਾਰ ਕਿਹਾ ਜਾ ਰਿਹਾ ਹੈ ਕਿ ਫਰਵਰੀ ਮਹੀਨੇ ਵਿੱਚ ਕਾਰ ਵਿੱਚ ਗਰਮੀ ਕਾਰਨ ਮੌਤਾਂ ਬਹੁਤ ਘੱਟ ਹੁੰਦੀਆਂ ਹਨ। 1998 ਤੋਂ ਹੁਣ ਤੱਕ ਫਰਵਰੀ ਵਿੱਚ ਅਜਿਹੇ ਸਿਰਫ਼ ਛੇ ਮਾਮਲੇ ਸਾਹਮਣੇ ਆਏ ਹਨ। ਘਟਨਾ ਦਾ ਵੇਰਵਾ ਦਿੰਦਿਆਂ ਪੁਲਿਸ ਨੇ ਦੱਸਿਆ ਕਿ ਬੱਚੇ ਨੂੰ ਪਿਤਾ ਵੱਲੋਂ ਡੇਅ ਕੇਅਰ ਵਿਖੇ ਛੱਡਣ ਦੀ ਬਜਾਏ ਅੱਠ ਘੰਟੇ ਤੱਕ ਕਾਰ ਵਿੱਚ ਹੀ ਛੱਡ ਦਿੱਤਾ ਗਿਆ। ਪੁਲਿਸ ਨੇ ਕਿਹਾ ਕਿ ਐਟਮੋਰ ਕਮਿਊਨਿਟੀ ਹਸਪਤਾਲ ਵੱਲੋਂ ਪੁਲਿਸ ਨਾਲ ਸੰਪਰਕ ਕਰਨ ਤੋਂ ਬਾਅਦ ਰੌਂਸਵਾਲ ਨੂੰ ਗ੍ਰਿਫਤਾਰ ਕੀਤਾ ਗਿਆ ਸੀ। ਹਸਪਤਾਲ ਲਿਜਾਣ ਤੋਂ ਕੁਝ ਦੇਰ ਬਾਅਦ ਹੀ ਡਾਕਟਰਾਂ ਨੇ ਬੱਚੇ ਨੂੰ ਮ੍ਰਿਤਕ ਐਲਾਨ ਦਿੱਤਾ।

ਅਮਰੀਕਾ ਵਿੱਚ ਰਾਸ਼ਟਰੀ ਮੌਸਮ ਸੇਵਾ ਨੇ ਕਿਹਾ ਕਿ ਐਟਮੋਰ ਵਿੱਚ ਤਾਪਮਾਨ 80 °F (26.6 °C) ਸੀ। ਪਰ noheatstroke.org ਨੇ ਕਿਹਾ ਕਿ ਇੱਕ ਗਰਮ ਕਾਰ ਦੇ ਅੰਦਰ, ਤਾਪਮਾਨ ਸਿਰਫ ਇੱਕ ਘੰਟੇ ਵਿੱਚ 123 ਡਿਗਰੀ ਫਾਰਨਹੀਟ (50 ਡਿਗਰੀ ਸੈਲਸੀਅਸ) ਤੱਕ ਪਹੁੰਚ ਸਕਦਾ ਹੈ। ਵੈੱਬਸਾਈਟ ਨੇ ਦੱਸਿਆ, 'ਜਦੋਂ ਸਰੀਰ ਦਾ ਮੁੱਖ ਤਾਪਮਾਨ 107 ਡਿਗਰੀ ਜਾਂ ਇਸ ਤੋਂ ਵੱਧ ਤੱਕ ਪਹੁੰਚ ਜਾਂਦਾ ਹੈ, ਤਾਂ ਸੈੱਲਾਂ ਨੂੰ ਨੁਕਸਾਨ ਪਹੁੰਚਦਾ ਹੈ ਅਤੇ ਅੰਦਰੂਨੀ ਅੰਗ ਬੰਦ ਹੋਣੇ ਸ਼ੁਰੂ ਹੋ ਜਾਂਦੇ ਹਨ। ਇਹ ਕ੍ਰਮ ਤੇਜ਼ੀ ਨਾਲ ਮੌਤ ਦਾ ਕਾਰਨ ਬਣ ਸਕਦਾ ਹੈ।

ਅਮਰੀਕਾ ਵਿੱਚ ਇੱਕ ਵਕਾਲਤ ਸਮੂਹ ਦਾ ਕਹਿਣਾ ਹੈ ਕਿ ਦੇਸ਼ ਭਰ ਵਿੱਚ ਹਰ ਸਾਲ 38 ਬੱਚੇ ਗਰਮ ਕਾਰਾਂ ਵਿੱਚ ਮਰਦੇ ਹਨ। ਅੰਕੜੇ ਇਹ ਵੀ ਦੱਸਦੇ ਹਨ ਕਿ 1990 ਤੋਂ ਹੁਣ ਤੱਕ 1,052 ਤੋਂ ਵੱਧ ਬੱਚੇ ਗਰਮ ਕਾਰਾਂ ਵਿੱਚ ਮਰ ਚੁੱਕੇ ਹਨ। ਇਸ ਦੇ ਨਾਲ ਹੀ, ਘੱਟੋ-ਘੱਟ 7,300 ਵੱਖ-ਵੱਖ ਤਰ੍ਹਾਂ ਦੀਆਂ ਸੱਟਾਂ ਤੋਂ ਬਚੇ ਹਨ।