ਨੌਂ ਸਾਲਾ ਭੈਣ ਨੂੰ ਮਗਰਮੱਛ ਦੇ ਜਬਾੜੇ ਵਿਚੋਂ ਖਿੱਚ ਲਿਆਇਆ ਭਰਾ

ਇਕ ਨੌਜਵਾਨ ਆਪਣੀ ਭੈਣ ਦੀ ਜਾਨ ਬਚਾਉਣ ਲਈ ਖਤਰਨਾਕ ਮਗਰਮੱਛ ਨਾਲ ਲੜਿਆ ਅਤੇ ਉਸ ਨੂੰ ਬਚਾਉਣ ਵਿਚ ਸਫਲ ਹੋਇਆ।

ਖੌਫਨਾਕ ਸ਼ਿਕਾਰੀ ਨੇ ਉਸ ਦੀ ਭੈਣ ਦੀ ਲੱਤ ਆਪਣੇ ਜਬਾੜੇ ਵਿੱਚ ਫੜੀ ਹੋਈ ਸੀ ਪਰ ਭਰਾ ਨੇ ਆਪਣੀ ਜਾਨ ਦੀ ਪਰਵਾਹ ਕੀਤੇ ਬਿਨਾਂ ਲੱਤ ਨੂੰ ਮਗਰਮੱਛ ਦੇ ਮੂੰਹ ਵਿੱਚੋਂ ਕੱਢ ਲਿਆ। ਜਿਸ ਨੇ ਵੀ ਇਸ ਘਟਨਾ ਨੂੰ ਸੁਣਿਆ, ਉਹ ਭਰਾ ਦੀ ਬਹਾਦਰੀ ਦੀ ਮਿਸਾਲ ਦੇ ਰਿਹਾ ਹੈ। ਇਹ ਘਟਨਾ ਨਾਮੀਬੀਆ ਦੇ ਕਵਾਂਗੋ ਇਲਾਕੇ ਦੀ ਹੈ।

ਡੇਲੀ ਸਟਾਰ ਦੀ ਰਿਪੋਰਟ ਮੁਤਾਬਕ ਮਗਰਮੱਛ ਨੇ ਜਿਸ ਬੱਚੀ ਨੂੰ ਜਬਾੜੇ 'ਚ ਫਸਾ ਲਿਆ ਸੀ, ਉਸ ਦੀ ਉਮਰ ਸਿਰਫ 9 ਸਾਲ ਸੀ। ਰੇਜੀਮੀਆ ਹਾਇਕੇਰਾ ਬਾਗ ਵਿੱਚ ਪੌਦਿਆਂ ਨੂੰ ਪਾਣੀ ਦੇ ਰਹੀ ਸੀ ਜਦੋਂ ਇੱਕ ਮਗਰਮੱਛ ਉੱਥੇ ਆਇਆ ਅਤੇ ਉਸ ਨੇ ਬੱਚੀ ਦੀਆਂ ਲੱਤਾਂ ਨੂੰ ਆਪਣੇ ਮੂੰਹ ਵਿੱਚ ਫੜ ਲਿਆ।

ਲੜਕੀ ਨੇ ਚੀਕਣਾ ਸ਼ੁਰੂ ਕਰ ਦਿੱਤਾ, ਜਦੋਂ ਭੈਣ ਦੀ ਆਵਾਜ਼ 19 ਸਾਲਾ ਭਰਾ ਦੇ ਕੰਨਾਂ ਤੱਕ ਪਹੁੰਚੀ ਤਾਂ ਉਹ ਦੌੜ ਕੇ ਆਇਆ। ਦਰਅਸਲ, ਰੇਜੀਮੀਆ ਹਾਇਕੇਰਾ ਦੇ ਘਰ ਦੇ ਕੋਲ ਇੱਕ ਨਦੀ ਹੈ ਜਿੱਥੋਂ ਪਾਣੀ ਵਾਲੇ ਜਾਨਵਰ ਅਕਸਰ ਖੇਤਰ ਵਿੱਚ ਦਾਖਲ ਹੁੰਦੇ ਹਨ। ਮਗਰਮੱਛ ਬਾਗ ਵਿਚ ਪਹੁੰਚ ਗਿਆ ਅਤੇ ਹਮਲਾ ਕਰ ਦਿੱਤਾ।

ਆਪਣੀ ਭੈਣ ਨੂੰ ਮੁਸੀਬਤ ਵਿੱਚ ਦੇਖ ਕੇ 19 ਸਾਲਾ ਜੋਹਾਨਸ ਨੇ ਆਪਣੀ ਜਾਨ ਦੀ ਪ੍ਰਵਾਹ ਨਾ ਕੀਤੀ ਅਤੇ ਮਗਰਮੱਛ ਨਾਲ ਟਕਰਾ ਗਿਆ। ਫਿਰ ਜੋਹਾਨਸ ਨੇ ਆਪਣੇ ਦੋਹਾਂ ਹੱਥਾਂ ਨਾਲ ਖਿੱਚ ਕੇ ਲੱਤ ਨੂੰ ਖੌਫਨਾਕ ਜਾਨਵਰ ਦੇ ਮੂੰਹ ਤੋਂ ਬਾਹਰ ਕੱਢ ਲਿਆ। ਇਸ ਦੌਰਾਨ ਰੇਜੀਮੀਆ ਦੀ ਜਾਨ ਤਾਂ ਬਚ ਗਈ ਪਰ ਹਮਲੇ ਵਿਚ ਉਸ ਦੀਆਂ ਲੱਤਾਂ, ਕਮਰ ਅਤੇ ਪਸਲੀਆਂ ਵਿੱਚ ਗੰਭੀਰ ਸੱਟਾਂ ਲੱਗੀਆਂ।

ਇਸ ਲਈ ਉਸ ਨੂੰ ਹਸਪਤਾਲ ਲਿਜਾਣਾ ਪਿਆ। ਇਸ ਦੇ ਨਾਲ ਹੀ ਜੋਹਾਨਸ ਵੀ ਆਪਣੀ ਭੈਣ ਨੂੰ ਬਚਾਉਂਦੇ ਹੋਏ ਜ਼ਖਮੀ ਹੋ ਗਿਆ। ਘਟਨਾ ਦੇ ਸਾਹਮਣੇ ਆਉਣ ਤੋਂ ਬਾਅਦ ਹਰ ਕੋਈ ਉਸ ਦੀ ਖੂਬ ਤਾਰੀਫ ਕਰ ਰਿਹਾ ਹੈ। ਉਥੇ ਪ੍ਰਸ਼ਾਸਨ ਜਲ-ਜੀਵਾਂ ਦੇ ਬਚਾਅ ਲਈ ਹੱਲ ਲੱਭਣ ਵਿੱਚ ਰੁੱਝਿਆ ਹੋਇਆ ਹੈ।