ਦੋ ਸਾਲਾ ਬੱਚੀ ਨੂੰ ਕਾਰ ਵਿਚ ਹੀ ਭੁੱਲ ਗਈ ਮਾਂ, 15 ਘੰਟੇ ਧੁੱਪੇ ਖੜੀ ਰਹੀ ਕਾਰ, ਮੌਤ

ਅਮਰੀਕਾ ਦੇ ਫਲੋਰਿਡਾ ਤੋਂ ਇਕ ਰੂਹ ਕੰਬਾਊ ਖਬਰ ਆਈ ਹੈ। ਇੱਥੇ ਇੱਕ ਔਰਤ ਆਪਣੀ 2 ਸਾਲ ਦੀ ਬੇਟੀ ਨੂੰ ਕਾਰ 'ਚ ਭੁੱਲ ਗਈ। ਕਾਰ 'ਚ ਬੰਦ ਇਸ ਲੜਕੀ ਦੀ ਤੇਜ਼ ਗਰਮੀ ਕਾਰਨ ਮੌਤ ਹੋ ਗਈ।

ਫਲੋਰਿਡਾ ਨਿਵਾਸੀ ਕੇਥਰੀਨ ਐਡਮਜ਼ ਅਤੇ ਕ੍ਰਿਸਟੋਫਰ ਮੈਕਲੀਨ ਨੂੰ ਪੁਲਿਸ ਨੇ ਗ੍ਰਿਫਤਾਰ ਕਰ ਲਿਆ ਹੈ। ਉਸ ਦੀ ਧੀ ਦੀ ਲਾਸ਼ ਤਪਦੀ ਕਾਰ ਦੇ ਅੰਦਰੋਂ ਮਿਲੀ। ਜਿਸ ਸਮੇਂ ਲਾਸ਼ ਬਰਾਮਦ ਹੋਈ, ਉਸ ਸਮੇਂ ਕਾਰ ਅੰਦਰਲਾ ਤਾਪਮਾਨ 41.6 ਡਿਗਰੀ ਸੈਲਸੀਅਸ ਸੀ।

ਦੱਸਿਆ ਜਾ ਰਿਹਾ ਹੈ ਕਿ ਕੇਥਰੀਨ ਬੱਚੀ ਨੂੰ ਕਾਰ 'ਚ ਹੀ ਭੁੱਲ ਗਈ ਸੀ। ਇਸ ਤੋਂ ਬਾਅਦ ਲੜਕੀ ਪੰਦਰਾਂ ਘੰਟੇ ਤੱਕ ਕਾਰ ਦੇ ਅੰਦਰ ਹੀ ਬੰਦ ਰਹੀ। ਤੇਜ਼ ਗਰਮੀ 'ਚ ਕਾਰ ਦੇ ਅੰਦਰ ਬੱਚੀ ਦੇ ਸਰੀਰ 'ਤੇ ਛਾਲੇ ਪੈ ਗਏ ਸਨ।

ਲਾਪਰਵਾਹੀ ਦੀ ਹੱਦ ਨੂੰ ਦਰਸਾਉਂਦਾ ਇਹ ਮਾਮਲਾ ਸਭ ਨੂੰ ਹੈਰਾਨ ਕਰ ਰਿਹਾ ਹੈ। ਕਿਵੇਂ ਇਕ ਮਾਂ ਆਪਣੇ ਬੱਚੇ ਨੂੰ ਕਾਰ ਵਿਚ ਭੁੱਲ ਗਈ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਕੇਥਰੀਨ ਆਪਣੀ ਕਾਰ ਵਿੱਚ ਦੋ ਬੱਚੇ ਛੱਡ ਗਈ ਸੀ। ਇਸ ਵਿੱਚੋਂ ਸਿਰਫ਼ ਇੱਕ ਦੀ ਉਮਰ ਦੋ ਸਾਲ ਅਤੇ ਇੱਕ ਦੀ ਉਮਰ ਚਾਰ ਸਾਲ ਸੀ।

ਚਾਰ ਸਾਲ ਦੀ ਬੱਚੀ ਕਿਸੇ ਤਰ੍ਹਾਂ ਕਾਰ ਤੋਂ ਬਾਹਰ ਨਿਕਲੀ ਪਰ ਦੋ ਸਾਲ ਦੀ ਬੱਚੀ ਉੱਥੇ ਹੀ ਫਸ ਗਈ ਅਤੇ ਉਸ ਦੀ ਮੌਤ ਹੋ ਗਈ। ਕਾਰ ਇੰਨੀ ਗਰਮ ਹੋ ਗਈ ਸੀ ਕਿ ਲੜਕੀ ਦੇ ਸਰੀਰ 'ਤੇ ਛਾਲੇ ਪੈ ਗਏ ਸਨ। ਜਿਸ ਨੇ ਵੀ ਉਸ ਦੀ ਹਾਲਤ ਵੇਖੀ ਉਸ ਦਾ ਦਿਲ ਕੰਬ ਗਿਆ।

ਬੱਚਿਆਂ ਨੂੰ ਕਾਰ ਵਿੱਚ ਛੱਡ ਕੇ ਕੇਥਰੀਨ ਭੁੱਲ ਗਈ ਸੀ। ਪੰਦਰਾਂ ਘੰਟੇ ਬਾਅਦ ਜਦੋਂ ਉਸ ਦੀ ਚਾਰ ਸਾਲਾ ਬੇਟੀ ਕਿਸੇ ਤਰ੍ਹਾਂ ਕਾਰ 'ਚੋਂ ਨਿਕਲ ਕੇ ਆਪਣੀ ਮਾਂ ਕੋਲ ਪਹੁੰਚੀ ਤਾਂ ਉਸ ਨੂੰ ਆਪਣੀ ਦੂਜੀ ਧੀ ਦੀ ਯਾਦ ਆਈ ਤਾਂ ਉਹ ਦੌੜ ਕੇ ਕਾਰ ਕੋਲ ਗਈ ਪਰ ਉਦੋਂ ਤੱਕ ਬੱਚੀ ਦੀ ਮੌਤ ਹੋ ਚੁੱਕੀ ਸੀ। ਕੇਥਰੀਨ ਨੇ ਤੁਰੰਤ ਐਮਰਜੈਂਸੀ ਸੇਵਾ ਨੂੰ ਬੁਲਾਇਆ ਜਿੱਥੋਂ ਲੜਕੀ ਨੂੰ ਹਸਪਤਾਲ ਲਿਜਾਇਆ ਗਿਆ। ਪਰ ਬੱਚੀ ਨੂੰ ਬਚਾਇਆ ਨਹੀਂ ਜਾ ਸਕਿਆ।

ਪੁਲਿਸ ਨੇ ਕਿਹਾ ਕਿ ਕੇਥਰੀਨ ਨੇ ਇਸ ਮਾਮਲੇ ਸਬੰਧੀ ਬਿਆਨ ਦਿੱਤਾ ਹੈ। ਉਸ ਨੇ ਦੱਸਿਆ ਕਿ ਉਹ ਅੱਧੀ ਰਾਤ ਨੂੰ ਬੱਚਿਆਂ ਨਾਲ ਘਰ ਵਾਪਸ ਆਈ ਸੀ। ਉਸ ਸਮੇਂ ਬੱਚੇ ਕਾਰ ਦੀ ਪਿਛਲੀ ਸੀਟ 'ਤੇ ਸੁੱਤੇ ਹੋਏ ਸਨ। ਇਸ ਕਾਰਨ ਉਹ ਇਕੱਲੀ ਹੀ ਕਾਰ 'ਚੋਂ ਉਤਰ ਕੇ ਘਰ ਨੂੰ ਚਲੀ ਗਈ। ਅੰਦਰ ਜਾ ਕੇ ਪਤੀ-ਪਤਨੀ ਵੀ ਸੌਂ ਗਏ। ਬੱਚੇ ਅੱਧੀ ਰਾਤ ਤੋਂ ਅਗਲੀ ਦੁਪਹਿਰ 3 ਵਜੇ ਤੱਕ ਕਾਰ ਵਿੱਚ ਬੰਦ ਰਹੇ। ਇੰਨੀ ਦੇਰ ਤੱਕ ਕਾਰ 'ਚ ਬੰਦ ਰਹਿਣ ਕਾਰਨ ਛੋਟੀ ਬੇਟੀ ਦੀ ਮੌਤ ਹੋ ਗਈ।