ਬ੍ਰਾਜ਼ੀਲ : ਪੂਲ ਗੇਮ ਹਾਰਨ ਤੋਂ ਨਿਰਾਸ਼ ਦੋ ਖਿਡਾਰੀਆਂ ਨੇ ਕੀਤੀ ਫਾਈਰਿੰਗ, ਗੋਲੀ ਲੱਗਣ ਦੇ ਨਾਲ 7 ਲੋਕਾਂ ਦੀ ਹੋਈ ਮੌਤ

ਬ੍ਰਾਜ਼ੀਲ ਦੇ ਮਾਟੋ ਗ੍ਰੋਸੋ ਦੇ ਸਿਨੋਪ ਸ਼ਹਿਰ 'ਚ ਗੋਲੀਬਾਰੀ ਦੀ ਇੱਕ ਖੌਫਨਾਕ ਘਟਨਾ ਨੇ ਹਲਚਲ ਮਚਾ ਦਿੱਤੀ ਹੈ।ਦਰਅਸਲ ਇੱਥੇ ਇੱਕ ਪੂਲ ਗੇਮ ਹਾਰਨ ਵਾਲੇ ਦੋ ਖਿਡਾਰੀਆਂ ਨੇ ਗੋਲੀ ਚਲਾ ਦਿੱਤੀ ਜਿਸ ਕਾਰਨ ਸੱਤ ਲੋਕਾਂ ਦੀ ਮੌਤ ਹੋ ਗਈ। ਗੋਲੀ ਲੱਗਣ ਦੇ ਨਾਲ ਮਰਨ ਵਾਲਿਆਂ ਵਿੱਚ ਇੱਕ 12 ਸਾਲ ਦੀ ਬੱਚੀ ਵੀ ਸ਼ਾਮਲ ਹੈ। ਇਸ ਘਟਨਾ ਦੇ ਬਾਰੇ ਦੱਸਿਆ ਜਾ ਰਿਹਾ ਹੈ ਕਿ ਇਹ ਖਿਡਾਰੀ ਪੂਲ ਵਿੱਚ ਲਗਾਤਾਰ ਦੋ ਗੇਮਾਂ ਹਾਰ ਗਏ ਸੀ। ਇਸ ਦੌਰਾਨ ਉਨ੍ਹਾਂ ਦੇ ਨੇੜੇ ਖੜ੍ਹੇ ਹੋਰ ਖਿਡਾਰੀ ਹੱਸਣ ਲੱਗੇ। ਮਿਲੀ ਜਾਣਕਾਰੀ ਦੇ ਮੁਤਾਬਕ ਇਸ ਤੋਂ ਬਾਅਦ ਦੋਵੇਂ ਹਾਰਨ ਵਾਲੇ ਖਿਡਾਰੀ ਆਪਣਾ ਆਪਾ ਗੁਆ ਬੈਠੇ ਅਤੇ ਬੰਦੂਕਾਂ ਲੈ ਕੇ ਖੇਡ ਖੇਤਰ 'ਚ ਦਾਖਲ ਹੋ ਗਏ।

ਗੋਲੀਬਾਰੀ ਦੀ ਇਸ ਘਟਨਾ ਦੀ ਜੋ ਵੀਡੀਓ ਵਾਇਰਲ ਹੋਈ ਹੈ, ਉਸ ਵਿੱਚ ਦੇਖਿਆ ਜਾ ਸਕਦਾ ਹੈ ਕਿ ਇੱਕ ਹਮਲਾਵਰ ਬੰਦੂਕ ਦੇ ਜ਼ੋਰ 'ਤੇ ਸਭ ਤੋਂ ਪਹਿਲਾਂ ਸਾਰੇ ਪੀੜਤਾਂ ਨੂੰ ਕੰਧ ਦੇ ਨੇੜੇ ਖੜ੍ਹਾ ਕਰਦਾ ਹੈ ਅਤੇ ਉਸ ਦਾ ਇੱਕ ਹੋਰ ਸਾਥੀ ਆਪਣੇ ਟਰੱਕ ਵਿੱਚੋਂ ਇੱਕ ਸ਼ਾਟਗਨ ਲਿਆਉਂਦਾ ਹੈ ਅਤੇ ਉਨ੍ਹਾਂ ਨੂੰ ਗੋਲੀ ਮਾਰ ਦਿੰਦਾ ਹੈ। ਇਸ ਤੋਂ ਬਾਅਦ ਦੋਵਾਂ ਨੇ ਮਿਲ ਕੇ ਇਕ-ਇਕ ਕਰਕੇ ਸੱਤ ਲੋਕਾਂ ਦਾ ਕਤਲ ਕਰ ਦਿੰਦੇ ਹਨ ।ਗੋਲੀਬਾਰੀ ਕਰਨ ਤੋਂ ਬਾਅਦ ਹਮਲਾਵਰ ਵੀ ਮੌਕੇ ਤੋਂ ਫਰਾਰ ਹੋ ਗਏ।

ਇਸ ਮਾਮਲੇ ਵਿੱਚ ਪੁਲਿਸ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਨਿਸ਼ਾਨੇਬਾਜ਼ਾਂ ਦੀ ਪਛਾਣ ਕੀਤੀ ਹੈ, ਇੱਕ ਐਡਗਰ ਰਿਕਾਰਡੋ ਡੀ ਓਲੀਵੀਰਾ ਅਤੇ ਦੂਜੇ ਦੀ ਇਜ਼ੇਕੀਆਸ ਸੂਜ਼ਾ ਰਿਬੇਰੋ ਵਜੋਂ। ਦੋਵੇਂ ਅਜੇ ਫਰਾਰ ਹਨ। ਹਮਲਾਵਰਾਂ ਵਿੱਚੋਂ ਇੱਕ ਨੂੰ ਪਹਿਲਾਂ ਘਰੇਲੂ ਹਿੰਸਾ ਨਾਲ ਸਬੰਧਤ ਇੱਕ ਮਾਮਲੇ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ।

ਪੁਲਿਸ ਦਾ ਕਹਿਣਾ ਹੈ ਕਿ ਮੰਗਲਵਾਰ ਸਵੇਰੇ ਓਲੀਵੀਰਾ ਨੂੰ ਪੂਲ ਟੇਬਲ 'ਤੇ 60 ਹਜ਼ਾਰ ਰੁਪਏ ਤੋਂ ਜ਼ਿਆਦਾ ਦਾ ਨੁਕਸਾਨ ਹੋਇਆ ਸੀ। ਇਸ ਤੋਂ ਬਾਅਦ ਉਹ ਹਾਰ ਤੋਂ ਨਰਾਜ਼ ਹੋ ਕੇ ਘਰ ਪਰਤ ਗਿਆ। ਇਸ ਤੋਂ ਬਾਅਦ ਦੁਪਹਿਰ ਬਾਅਦ ਉਹ ਦੂਜੇ ਮੈਚ ਲਈ ਪੈਸੇ ਲੈ ਕੇ ਵਾਪਸ ਆ ਗਿਆ। ਇਸ ਸਮੇਂ ਦੌਰਾਨ ਹਿਜ਼ਕੀਏਲ ਉਸ ਦੇ ਨਾਲ ਸੀ। ਹਾਲਾਂਕਿ ਉਹ ਦੁਬਾਰਾ ਹਾਰ ਗਿਆ ਅਤੇ ਇਸ ਦੌਰਾਨ ਜਦੋਂ ਆਸੇ-ਪਾਸੇ ਮੌਜੂਦ ਲੋਕ ਉਨ੍ਹਾਂ ਨੂੰ ਹਰਾਉਣ ਵਾਲਿਆਂ ਦੇ ਨਾਲ-ਨਾਲ ਹੱਸਣ ਲੱਗੇ ਤਾਂ ਦੋਵਾਂ ਨੇ ਆਪਾ-ਧਾਪੀ ਗੁਆ ਕੇ ਇਸ ਵਾਰਦਾਤ ਨੂੰ ਅੰਜਾਮ ਦੇ ਦਿੱਤਾ।