ਬਰਫ਼ਬਾਰੀ ਨੇ ਰੋਕਿਆ ਰਾਹ, ਲਾੜੀ ਨੂੰ ਵਿਆਹਾਉਣ ਲੈਣ ਲਈ JCB ਲੈ ਕੇ ਨਿਕਲਿਆ ਲਾੜਾ

ਨਾਹਨ : ਇੱਕ ਪਾਸੇ ਜਿੱਥੇ ਠੰਢ ਨੇ ਪੂਰੇ ਉੱਤਰ ਭਾਰਤ ਨੂੰ ਪ੍ਰਭਾਵਿਤ ਕੀਤੀ ਹੈ, ਉੱਥੇ ਹੀ  ਹਿਮਾਚਲ ਵਿੱਚ ਹੋ ਰਹੀ ਬਰਫਵਾਰੀ ਨੇ ਲੋਕਾਂ ਲਈ ਵੱਡੀਆਂ ਮੁਸੀਬਤਾਂ ਖੜੀਆਂ ਕੀਤੀਆਂ ਹਨ। ਦੂਜੇ ਪਾਸੇ ਵਿਆਹਾਂ ਦਾ ਸੀਜ਼ਨ ਸ਼ੁਰੂ ਹੋ ਚੁੱਕਾ ਹੈ। ਅਜਿਹੇ 'ਚ ਹਰ ਪਾਸੇ ਵਿਆਹਾਂ ਦੀ ਗੂੰਜ ਸੁਣਾਈ ਦੇ ਰਹੀ ਹੈ। ਜਿੱਥੇ ਆਮ ਤੌਰ 'ਤੇ ਲਾੜਾ ਘੋੜੀ 'ਤੇ ਬੈਠ ਕੇ ਆਪਣੀ ਲਾੜੀ ਨੂੰ ਲੈਣ ਜਾਂਦਾ ਹੈ ਪਰ ਹਿਮਾਚਲ ਪ੍ਰਦੇਸ਼ ਦੇ ਸਿਰਮੌਰ ਜ਼ਿਲ੍ਹੇ 'ਚ ਇਕ ਅਨੋਖੀ ਬਰਾਤ ਦੇਖਣ ਨੂੰ ਮਿਲੀ। ਦਰਅਸਲ, ਜਦੋਂ ਬਰਫਬਾਰੀ ਅਤੇ ਬਾਰਿਸ਼ ਲਾੜੇ ਲਈ ਰੁਕਾਵਟ ਬਣ ਗਈ ਅਤੇ ਰਸਤਾ ਬੰਦ ਹੋ ਗਿਆ ਤਾਂ ਲਾੜਾ ਜੇਸੀਬੀ ਮਸ਼ੀਨ ਨਾਲ ਲਾੜੀ ਨੂੰ ਲੈਣ ਪਹੁੰਚ ਗਿਆ।

ਅਸਲ ਵਿੱਚ ਮਾਮਲਾ ਹਿਮਾਚਲ ਪ੍ਰਦੇਸ਼ ਦੇ ਸਿਰਮੌਰ ਜ਼ਿਲ੍ਹੇ ਦਾ ਹੈ, ਇੱਥੇ ਕਰੀਬ 3 ਫੁੱਟ ਬਰਫ ਡਿੱਗ ਗਈ ਸੀ। ਸਾਰੇ ਰਸਤੇ ਬੰਦ ਸਨ ਪਰ ਆਪਣੇ ਵਿਆਹ ਦਾ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਹੇ ਲਾੜੇ ਵਿਜੇ ਨੂੰ ਹਰ ਹਾਲਤ ਵਿੱਚ ਲਾੜੀ ਦੇ ਘਰ ਪੁੱਜਣਾ ਹੀ ਸੀ। ਚਾਹੇ ਇਸ ਲਈ ਕੁੱਝ ਵੀ ਕਿਉਂ ਨਾ ਕਰਨਾ ਪਵੇ। ਬਰਫ਼ਬਾਰੀ ਨੇ ਰਾਹ ਰੋਕਿਆ ਪਰ ਵਿਆਹ ਨਹੀਂ ਰੁਕਿਆ।

ਜਾਣਕਾਰੀ ਅਨੁਸਾਰ ਸਿਰਮੌਰ ਦੇ ਸੰਘਰਾ-ਗੱਟਾਧਰ-ਸ਼ਿਲਾਈ ਰੋਡ 'ਤੇ ਜੇਸੀਬੀ ਮਸ਼ੀਨ 'ਚ ਬਰਾਤ ਆਈ। ਇਹ ਬਰਾਤ ਪਿੰਡ ਜਵਾਗਾ ਤੋਂ ਡਿਗਰੀ ਕਾਲਜ ਸੰਗਰਾਹ ਦੇ ਨਾਲ ਲੱਗਦੇ ਪਿੰਡ ਸੌਂਫਰ ਵੱਲ ਜਾ ਰਿਹਾ ਸੀ। ਪਰ ਬਰਫ਼ਬਾਰੀ ਕਾਰਨ ਸੜਕ ਬੰਦ ਹੋ ਗਈ। ਸੰਗਰਾਹ ਤੋਂ ਅੱਠ ਕਿਲੋਮੀਟਰ ਅੱਗੇ ਬੰਦ ਸੀ। ਪਹਿਲਾਂ ਤਾਂ ਜੇਸੀਬੀ ਰਾਹੀਂ ਬਰਫ਼ ਹਟਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਪਰ ਜਦੋਂ ਗੱਲ ਸਿਰੇ ਨਾ ਚੜ੍ਹੀ ਤਾਂ ਅੱਧੀ ਦਰਜਨ ਬਰਾਤੀ ਜੇਸੀਬੀ ’ਤੇ ਹੀ ਚਲੇ ਗਏ। ਬੀਤੀ ਰਾਤ ਵਾਪਸ ਆਉਂਦੇ ਸਮੇਂ ਦੋ ਮਸ਼ੀਨਾਂ ਦਾ ਇੰਤਜ਼ਾਮ ਕਰਨਾ ਪਿਆ ਅਤੇ ਸੋਮਵਾਰ ਸਵੇਰੇ ਵਿਆਹ ਦੀਆਂ ਬਾਕੀ ਰਸਮਾਂ ਪੂਰੀਆਂ ਹੋਈਆਂ। ਲਾੜਾ-ਲਾੜੀ ਨੇ ਜੇਸੀਬੀ ਮਸ਼ੀਨ ਵਿੱਚ 30 ਕਿਲੋਮੀਟਰ ਦਾ ਸਫ਼ਰ ਤੈਅ ਕੀਤਾ। ਬਰਾਤ ਨੂੰ ਜੇਸੀਬੀ ਵਿੱਚ ਲਿਜਾਏ ਜਾਣ ਦੀ ਵੀਡੀਓ ਵੀ ਸਾਹਮਣੇ ਆਈ ਹੈ।

ਲਗਾਤਾਰ ਬਰਫਬਾਰੀ ਕਾਰਨ ਜਨਜੀਵਨ ਪ੍ਰਭਾਵਿਤ

ਸਬ-ਡਵੀਜ਼ਨ ਸੰਗਰਾਹ ਦੇ ਉਪਰਲੇ ਹਿੱਸਿਆਂ 'ਚ ਸ਼ਨੀਵਾਰ ਤੋਂ ਬਰਫਬਾਰੀ ਜਾਰੀ ਹੈ ਅਤੇ ਕਰੀਬ 2 ਤੋਂ 3 ਫੁੱਟ ਤੱਕ ਬਰਫ ਪੈਣ ਕਾਰਨ ਡੇਢ ਦਰਜਨ ਪੰਚਾਇਤਾਂ 'ਚ ਜਨਜੀਵਨ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਇਆ ਹੈ। ਬਰਫਬਾਰੀ ਖੇਤਰ ਦੀਆਂ ਸੰਗਰਾਹ-ਚੌਪਾਲ, ਹਰੀਪੁਰਧਾਰ-ਨੌਹਰਾਧਾਰ, ਸੰਗਰਾਹ-ਗੱਟਾਧਰ ਅਤੇ ਨੌਹਰਾਧਾਰ-ਸੰਗਰਾਧਰ ਸੜਕਾਂ 'ਤੇ ਸੋਮਵਾਰ ਨੂੰ ਤੀਜੇ ਦਿਨ ਵੀ ਆਵਾਜਾਈ ਠੱਪ ਰਹੀ।

ਇਨ੍ਹਾਂ ਸੜਕਾਂ ਦੇ ਬੰਦ ਹੋਣ ਕਾਰਨ 150 ਦੇ ਕਰੀਬ ਵਾਹਨ ਥਾਂ-ਥਾਂ 'ਤੇ ਫਸ ਗਏ ਸਨ, ਜਿਨ੍ਹਾਂ 'ਚ 2 ਦਰਜਨ ਦੇ ਕਰੀਬ ਲੋਕ ਬਰਫ਼ ਦੀ ਲਪੇਟ 'ਚ ਦੱਸੇ ਜਾ ਰਹੇ ਹਨ | ਸਬ-ਡਵੀਜ਼ਨ ਦੀਆਂ ਡੇਢ ਦਰਜਨ ਪੰਚਾਇਤਾਂ ਵਿੱਚ ਬਰਫ਼ਬਾਰੀ ਕਾਰਨ ਆਵਾਜਾਈ ਦੇ ਨਾਲ-ਨਾਲ ਬਿਜਲੀ ਅਤੇ ਪੀਣ ਵਾਲੇ ਪਾਣੀ ਦੀ ਸਪਲਾਈ ਵਿੱਚ ਵੀ ਵਿਘਨ ਪਿਆ ਹੈ।