1.85 ਲੱਖ ਰੁਪਏ ਸਸਤੀ ਹੋਈ Nexon EV, ਵਧੀ ਹੋਈ ਰੇਂਜ ਦੇ ਨਾਲ ਮਿਲ ਰਹੇ ਕਮਾਲ ਦੇ ਫੀਚਰ

Nexon EV Price: ਜਿਵੇਂ-ਜਿਵੇਂ ਦੇਸ਼ 'ਚ ਇਲੈਕਟ੍ਰਿਕ ਵਾਹਨਾਂ ਦੀ ਮੰਗ ਵਧ ਰਹੀ ਹੈ, ਵਾਹਨ ਨਿਰਮਾਤਾ ਵੀ ਨਵੇਂ ਮਾਡਲਾਂ ਨੂੰ ਪੇਸ਼ ਕਰਨ 'ਚ ਰੁੱਝੇ ਹੋਏ ਹਨ। ਹੁਣ ਇੱਕ ਵੱਡਾ ਫੈਸਲਾ ਲੈਂਦਿਆਂ Tata Motors ਨੇ ਆਪਣੀ ਮਸ਼ਹੂਰ ਇਲੈਕਟ੍ਰਿਕ SUV Nexon EV ਦੀਆਂ ਕੀਮਤਾਂ ਵਿੱਚ ਭਾਰੀ ਕਟੌਤੀ ਕੀਤੀ ਹੈ। ਹੁਣ Tata Nexon ਇਲੈਕਟ੍ਰਿਕ ਰੇਂਜ ਦੀ ਸ਼ੁਰੂਆਤੀ ਕੀਮਤ ਸਿਰਫ 14.49 ਲੱਖ ਰੁਪਏ (ਐਕਸ-ਸ਼ੋਰੂਮ) ਹੋ ਗਈ ਹੈ। ਕੰਪਨੀ ਨੇ ਨਵੇਂ ਫੀਚਰਸ ਦੇ ਨਾਲ Nexon ਰੇਂਜ ਨੂੰ ਵੀ ਅਪਡੇਟ ਕੀਤਾ ਹੈ ਅਤੇ ਹੁਣ ਇਹ SUV ਪਹਿਲਾਂ ਦੇ ਮੁਕਾਬਲੇ ਜ਼ਿਆਦਾ ਡਰਾਈਵਿੰਗ ਰੇਂਜ ਪ੍ਰਦਾਨ ਕਰਦੀ ਹੈ।

ਤੁਹਾਨੂੰ ਦੱਸ ਦੇਈਏ ਕਿ Tata Nexon EV ਕੁੱਲ ਦੋ ਵੇਰੀਐਂਟਸ ਅਤੇ ਵੱਖ-ਵੱਖ ਬੈਟਰੀ ਪੈਕ ਦੇ ਨਾਲ ਆਉਂਦੀ ਹੈ। ਕੀਮਤ ਵਿੱਚ ਨਵੀਂ ਅਪਡੇਟ ਦੇ ਨਾਲ, Tata Nexon EV Prime (ਬੇਸ ਮਾਡਲ) ਦੀ ਕੀਮਤ 14.49 ਲੱਖ ਰੁਪਏ ਰੱਖੀ ਗਈ ਹੈ ਅਤੇ ਹਾਈਐਂਡ ਵਰਜ਼ਨ Nexon EV Max ਦੀ ਸ਼ੁਰੂਆਤੀ ਕੀਮਤ 16.49 ਲੱਖ ਰੁਪਏ (ਐਕਸ-ਸ਼ੋਰੂਮ) ਰੱਖੀ ਗਈ ਹੈ। ਤੁਹਾਨੂੰ ਦੱਸ ਦੇਈਏ ਕਿ ਪਹਿਲਾਂ ਇਨ੍ਹਾਂ ਕਾਰਾਂ ਦੀ ਕੀਮਤ ਕ੍ਰਮਵਾਰ 14.99 ਲੱਖ ਰੁਪਏ ਅਤੇ 18.34 ਲੱਖ ਰੁਪਏ ਤੋਂ ਸ਼ੁਰੂ ਹੁੰਦੀ ਸੀ। ਸਭ ਤੋਂ ਵੱਡੀ ਕਟੌਤੀ ਹਾਈ ਵੇਰੀਐਂਟ ਵਿੱਚ ਦੇਖੀ ਜਾ ਰਹੀ ਹੈ, ਇਸ ਦੀ ਕੀਮਤ ਵਿੱਚ ਲਗਭਗ 1.85 ਲੱਖ ਰੁਪਏ ਦੇ ਫਰਕ ਨਾਲ।

ਇਸ ਤੋਂ ਇਲਾਵਾ Tata Motors ਨੇ Nexon EV Max ਲਈ ਨਵਾਂ XM ਮਾਡਲ ਲਾਂਚ ਕੀਤਾ ਹੈ। ਇਸ ਨਾਲ EV ਦੀ ਸ਼ੁਰੂਆਤੀ ਕੀਮਤ ਨੂੰ ਘੱਟ ਕਰਨ 'ਚ ਮਦਦ ਮਿਲੀ ਹੈ। ਇਹ ਇਲੈਕਟ੍ਰਿਕ ਪਾਰਕਿੰਗ ਬ੍ਰੇਕ, ਆਟੋਮੈਟਿਕ ਕਲਾਈਮੇਟ ਕੰਟਰੋਲ, ਇਲੈਕਟ੍ਰਾਨਿਕ ਸਟੇਬਿਲਿਟੀ ਕੰਟਰੋਲ, LED DRLs ਅਤੇ LED ਟੇਲ ਲੈਂਪ ਦੇ ਨਾਲ ਪ੍ਰੋਜੈਕਟਰ ਹੈੱਡਲੈਂਪ, ਪੁਸ਼-ਬਟਨ ਸਟਾਰਟ, ਡਿਜੀਟਲ TFT ਇੰਸਟਰੂਮੈਂਟ ਕਲੱਸਟਰ, ਸਮਾਰਟਵਾਚ ਕਨੈਕਟੀਵਿਟੀ ਦੇ ਨਾਲ Z ਕਨੈਕਟ ਕਾਰ ਤਕਨਾਲੋਜੀ ਵਰਗੀਆਂ ਵਿਸ਼ੇਸ਼ਤਾਵਾਂ ਨਾਲ ਆਉਂਦਾ ਹੈ।

ਟਾਟਾ ਮੋਟਰਸ ਨੇ ਨਾ ਸਿਰਫ ਇਸ ਇਲੈਕਟ੍ਰਿਕ SUV ਦੀ ਕੀਮਤ ਵਿੱਚ ਕਟੌਤੀ ਕੀਤੀ ਹੈ ਬਲਕਿ ਇਸਦੀ ਡਰਾਈਵਿੰਗ ਰੇਂਜ ਵਿੱਚ ਵੀ ਸੁਧਾਰ ਕੀਤਾ ਹੈ। ਕੰਪਨੀ ਦਾ ਦਾਅਵਾ ਹੈ ਕਿ Nexon EV MAX ਵੇਰੀਐਂਟ ਹੁਣ ਸਿੰਗਲ ਚਾਰਜ ਵਿੱਚ 453 ਕਿਲੋਮੀਟਰ (MIDC) ਤੱਕ ਦੀ ਡਰਾਈਵਿੰਗ ਰੇਂਜ ਦੀ ਪੇਸ਼ਕਸ਼ ਕਰੇਗਾ। ਇਹ ਰੇਂਜ 25 ਜਨਵਰੀ 2023 ਤੋਂ ਉਪਲਬਧ ਹੋਵੇਗੀ। ਇੰਨਾ ਹੀ ਨਹੀਂ, Nexon Max ਦੇ ਮੌਜੂਦਾ ਗਾਹਕ ਵੀ ਇਸ ਵਧੀ ਹੋਈ ਰੇਂਜ ਦਾ ਫਾਇਦਾ ਸਾਫਟਵੇਅਰ ਅੱਪਗ੍ਰੇਡ ਰਾਹੀਂ ਲੈ ਸਕਣਗੇ। ਇਸ ਦੇ ਲਈ ਗਾਹਕਾਂ ਨੂੰ ਆਪਣਾ ਵਾਹਨ ਕਿਸੇ ਅਧਿਕਾਰਤ ਡੀਲਰਸ਼ਿਪ 'ਤੇ ਲੈ ਕੇ ਜਾਣਾ ਹੋਵੇਗਾ। ਮੌਜੂਦਾ ਗਾਹਕ 15 ਫਰਵਰੀ 2023 ਤੋਂ ਇਸ ਸਹੂਲਤ ਦਾ ਲਾਭ ਲੈ ਸਕਣਗੇ।