ਸਿਲੰਡਰ ਤੋਂ ਗੈਸ ਲੀਕ ਹੋਣ 'ਤੇ ਕਰੋ ਇਹ ਕੰਮ, ਬੱਚ ਜਾਵੇਗੀ ਤੁਹਾਡੀ ਤੇ ਆਪਣਿਆਂ ਦੀ ਜਾਨ

ਗੈਸ ਸਿਲੰਡਰ (Gas Cylinder) ਲਗਭਗ ਸਾਰੇ ਘਰਾਂ ਦੀ ਰਸੋਈ ਵਿੱਚ ਪਾਏ ਜਾਂਦੇ ਹਨ। ਜਿੱਥੇ ਗੈਸ ਸਿਲੰਡਰ  ਲੋਕਾਂ ਲਈ ਖਾਣਾ ਬਣਾਉਣਾ ਆਸਾਨ ਬਣਾਉਣ ਵਿੱਚ ਸਹਾਈ ਹੁੰਦਾ ਹੈ, ਉੱਥੇ ਹੀ ਦੂਜੇ ਪਾਸੇ ਸਿਲੰਡਰ ਪ੍ਰਤੀ ਛੋਟੀ ਜਿਹੀ ਲਾਪਰਵਾਹੀ ਵੀ ਪਰਿਵਾਰ ਦੀ ਜਾਨ ਲਈ ਖਤਰਾ ਬਣ ਸਕਦੀ ਹੈ। ਹਾਲਾਂਕਿ ਜ਼ਿਆਦਾਤਰ ਲੋਕ ਗੈਸ ਸਿਲੰਡਰ ਨੂੰ ਲੈ ਕੇ ਸੁਚੇਤ ਰਹਿੰਦੇ ਹਨ ਪਰ ਜੇਕਰ ਕਦੇ ਗਲਤੀ ਨਾਲ ਸਿਲੰਡਰ 'ਚ ਗੈਸ ਲੀਕ ਹੋ ਜਾਂਦੀ ਹੈ ਤਾਂ ਕੁਝ ਗੱਲਾਂ ਦਾ ਧਿਆਨ ਰੱਖ ਕੇ ਤੁਸੀਂ ਕਿਸੇ ਵੱਡੀ ਅਣਸੁਖਾਵੀਂ ਘਟਨਾ ਤੋਂ ਬਚ ਸਕਦੇ ਹੋ। ਬੇਸ਼ੱਕ ਤੁਸੀਂ ਰਸੋਈ 'ਚ ਰੱਖੇ ਗੈਸ ਸਿਲੰਡਰ  ਦਾ ਪੂਰਾ ਧਿਆਨ ਰੱਖਦੇ ਹੋ ਪਰ ਗੈਸ ਲੀਕ ਹੋਣ ਦੀ ਘਟਨਾ ਕਿਸੇ ਵੀ ਸਮੇਂ ਕਿਸੇ ਨਾਲ ਵੀ ਵਾਪਰ ਸਕਦੀ ਹੈ। ਗੈਸ ਲੀਕ ਹੋਣ ਦੇ ਕੁਝ ਸੁਰੱਖਿਆ ਟਿਪਸ ਨੂੰ ਪਹਿਲਾਂ ਤੋਂ ਜਾਣ ਕੇ, ਤੁਸੀਂ ਆਸਾਨੀ ਨਾਲ ਆਪਣੀ ਅਤੇ ਆਪਣੇ ਪਰਿਵਾਰ ਦੀ ਜਾਨ ਬਚਾ ਸਕਦੇ ਹੋ। ਆਓ ਜਾਣਦੇ ਹਾਂ ਗੈਸ ਲੀਕ ਹੋਣ ਦੀ ਘਟਨਾ ਨਾਲ ਨਜਿੱਠਣ ਦੇ ਕੁਝ ਤਰੀਕੇ।

ਪੈਨਿਕ ਨਾ ਹੋਵੋ : ਰਸੋਈ 'ਚ ਅਚਾਨਕ ਗੈਸ ਲੀਕ ਹੁੰਦੀ ਦੇਖ ਕੇ ਕਈ ਲੋਕ ਘਬਰਾ ਜਾਂਦੇ ਹਨ ਅਤੇ ਘਬਰਾਹਟ 'ਚ ਸਹੀ ਫੈਸਲਾ ਨਹੀਂ ਲੈ ਪਾਉਂਦੇ ਹਨ। ਇਸ ਲਈ, ਜਦੋਂ ਗੈਸ ਦੀ ਬਦਬੂ ਆਉਂਦੀ ਹੈ, ਤਾਂ ਸਭ ਤੋਂ ਪਹਿਲਾਂ ਸ਼ਾਂਤ ਮਨ ਨਾਲ, ਗੈਸ ਲੀਕ ਹੋਣ ਦੀ ਜਗ੍ਹਾ ਦਾ ਪਤਾ ਲਗਾਓ।

ਘਰ ਦੀਆਂ ਖਿੜਕੀਆਂ ਖੋਲ੍ਹੋ : ਗੈਸ ਲੀਕ ਹੋਣ 'ਤੇ ਘਰ ਦੀਆਂ ਸਾਰੀਆਂ ਖਿੜਕੀਆਂ ਅਤੇ ਦਰਵਾਜ਼ੇ ਖੋਲ੍ਹ ਦਿਓ। ਤਾਂ ਕਿ ਗੈਸ ਬਾਹਰ ਆ ਸਕੇ। ਇਸ ਤੋਂ ਇਲਾਵਾ ਘਰ 'ਚ ਮੌਜੂਦ ਮੋਮਬੱਤੀਆਂ ਅਤੇ ਧੂਪ ਸਟਿਕਾਂ ਨੂੰ ਤੁਰੰਤ ਬੁਝਾ ਦਿਓ। ਇਸ ਦੇ ਨਾਲ ਹੀ ਘਰ 'ਚ ਲੱਗੇ ਇਲੈਕਟ੍ਰਿਕ ਬੋਰਡ ਦੇ ਸਵਿੱਚ ਨੂੰ ਬੰਦ ਕਰਨਾ ਨਾ ਭੁੱਲੋ। ਇਸ ਨਾਲ ਘਰ 'ਚ ਅੱਗ ਲੱਗਣ ਦੀ ਸੰਭਾਵਨਾ ਘੱਟ ਹੋ ਜਾਵੇਗੀ।

ਰੈਗੂਲੇਟਰ ਦੀ ਜਾਂਚ ਕਰੋ : ਗੈਸ ਲੀਕ ਹੋਣ ਤੋਂ ਰੋਕਣ ਲਈ, ਨੌਬ ਨੂੰ ਚੰਗੀ ਤਰ੍ਹਾਂ ਚੈੱਕ ਕਰੋ ਅਤੇ ਸਿਲੰਡਰ ਨੂੰ ਰੈਗੂਲੇਟਰ ਨਾਲ ਬੰਦ ਕਰੋ। ਇਸ ਤੋਂ ਬਾਅਦ ਵੀ ਜੇਕਰ ਗੈਸ ਲੀਕ ਹੋ ਰਹੀ ਹੈ ਤਾਂ ਰੈਗੂਲੇਟਰ ਨੂੰ ਹਟਾ ਕੇ ਸਿਲੰਡਰ 'ਤੇ ਸੇਫਟੀ ਕੈਪ ਲਗਾ ਦਿਓ।

ਡੀਲਰ ਨਾਲ ਸੰਪਰਕ ਕਰੋ : ਗੈਸ ਲੀਕ ਦੇ ਸਾਰੇ ਸੁਰੱਖਿਆ ਕਦਮਾਂ ਦੀ ਪਾਲਣਾ ਕਰਨ ਤੋਂ ਬਾਅਦ, ਤੁਰੰਤ ਆਪਣੇ ਡੀਲਰ ਨਾਲ ਸੰਪਰਕ ਕਰੋ ਅਤੇ ਗੈਸ ਲੀਕ ਦੀ ਘਟਨਾ ਨਾਲ ਸਬੰਧਤ ਸਾਰੀ ਜਾਣਕਾਰੀ ਸਾਂਝੀ ਕਰੋ।

ਚਿਹਰਾ ਢਕੋ :ਗੈਸ ਲੀਕ ਹੋਣ ਦੀ ਸਥਿਤੀ ਵਿੱਚ ਆਪਣੀਆਂ ਅੱਖਾਂ ਅਤੇ ਨੱਕ ਨੂੰ ਢੱਕਣਾ ਨਾ ਭੁੱਲੋ। ਮੂੰਹ 'ਤੇ ਕੱਪੜਾ ਬੰਨ੍ਹ ਕੇ ਗੈਸ ਨੂੰ ਸਰੀਰ 'ਚ ਜਾਣ ਤੋਂ ਰੋਕਿਆ ਜਾ ਸਕਦਾ ਹੈ। ਨਾਲ ਹੀ ਜੇਕਰ ਗੈਸ ਕਾਰਨ ਅੱਖਾਂ 'ਚ ਜਲਨ ਹੋ ਰਹੀ ਹੈ ਤਾਂ ਰਗੜਨ ਦੀ ਬਜਾਏ ਠੰਡੇ ਪਾਣੀ ਦਾ ਛਿੜਕਾਅ ਅੱਖਾਂ 'ਤੇ ਕਰੋ।

ਬੱਚਿਆਂ ਦਾ ਖਾਸ ਖਿਆਲ ਰੱਖੋ : ਜਦੋਂ ਤੱਕ ਘਰ ਦੇ ਹਾਲਾਤ ਆਮ ਵਾਂਗ ਨਹੀਂ ਹੋ ਜਾਂਦੇ, ਉਦੋਂ ਤੱਕ ਬੱਚਿਆਂ ਨੂੰ ਆਪਣੇ ਤੋਂ ਦੂਰ ਨਾ ਜਾਣ ਦਿਓ। ਨਾਲ ਹੀ, ਇਸ ਸਮੇਂ ਦੌਰਾਨ ਬੱਚਿਆਂ ਨੂੰ ਬਿਜਲੀ ਅਤੇ ਅੱਗ ਦੀਆਂ ਚੀਜ਼ਾਂ ਤੋਂ ਦੂਰ ਰੱਖਣ ਦੀ ਕੋਸ਼ਿਸ਼ ਕਰੋ।

ਸਿਲੰਡਰ ਨੂੰ ਅੱਗ ਲੱਗਣ ਉੱਤੇ ਕੀ ਕਰੀਏ : ਜੇਕਰ ਗੈਸ ਲੀਕ ਹੋਣ ਕਾਰਨ ਸਿਲੰਡਰ ਨੂੰ ਅੱਗ ਲੱਗ ਜਾਂਦੀ ਹੈ ਤਾਂ ਘਬਰਾਓ ਨਾ। ਅਜਿਹੀ ਸਥਿਤੀ ਵਿੱਚ, ਇੱਕ ਮੋਟੀ ਚਾਦਰ ਜਾਂ ਕੰਬਲ ਨੂੰ ਪਾਣੀ ਵਿੱਚ ਭਿਓਂ ਕੇ ਜਲਦੀ ਤੋਂ ਜਲਦੀ ਸਿਲੰਡਰ 'ਤੇ ਲਪੇਟੋ। ਇਸ ਨਾਲ ਅੱਗ ਆਪਣੇ ਆਪ ਬੁਝ ਜਾਵੇਗੀ।