ਲੋਕਾਂ ਨੂੰ ਸਸਤੇ 'ਚ ਵੇਚੇ ਜਾ ਰਹੇ ਸਨ ਨਕਲੀ iPhone, ਤੁਸੀਂ ਇੰਝ ਕਰ ਸਕਦੇ ਹੋ ਅਸਲੀ ਤੇ ਨਕਲੀ iPhone ਦੀ ਪਛਾਣ

Real vs Fake iphone: ਅੱਜਕਲ ਬਜ਼ਾਰ ਵਿੱਚ ਕੋਈ ਵੀ ਚੀਜ਼ ਬਾਅਦ ਵਿੱਚ ਵਿਕਣ ਲਈ ਆਉਂਦੀ ਹੈ, ਪਹਿਲਾਂ ਉਸ ਦੀ ਨਕਲ ਮਾਰਕੀਟ ਵਿੱਚ ਉਪਲਬਧ ਹੋ ਜਾਂਦੀ ਹੈ। ਇਹ ਖਾਸਕਰ ਲਗਜ਼ਰੀ ਆਈਟਮਾਂ ਨਾਲ ਜ਼ਿਆਦਾ ਹੁੰਦਾ ਹੈ। ਭਾਵੇਂ ਬ੍ਰਾਂਡਿਡ ਸ਼ੂਜ਼ ਹੋਣ, ਬੈਗ ਜਾਂ ਇਲੈਕਟ੍ਰਾਨਿਕਸ ਦਾ ਸਮਾਨ। ਤੁਹਾਨੂੰ ਕਈ ਥਾਵਾਂ ਤੋਂ ਐਪਲ ਦੇ ਕਈ ਨਕਲੀ ਪ੍ਰਾਡਕਟ ਮਿਲ ਜਾਣਗੇ, ਇਹ ਨਕਲੀ ਡਾਟਾ ਕੇਬਲਾਂ ਤੋਂ ਲੈ ਕੇ ਹੈੱਡਫੋਨ ਤੇ ਆਈਫੋਨ ਤੱਕ ਹੋ ਸਕਦੇ ਹਨ। ਨੋਇਡਾ ਪੁਲਿਸ ਨੇ ਹਾਲ ਹੀ 'ਚ ਸਸਤੇ ਭਾਅ 'ਤੇ ਨਕਲੀ ਆਈਫੋਨ 13 ਵੇਚਣ ਵਾਲੇ ਗਿਰੋਹ ਦਾ ਪਰਦਾਫਾਸ਼ ਕੀਤਾ ਹੈ।

ਪੁਲਿਸ ਨੇ ਗਿਰੋਹ ਦੇ ਤਿੰਨ ਮੈਂਬਰਾਂ ਨੂੰ ਗ੍ਰਿਫਤਾਰ ਕੀਤਾ ਹੈ ਅਤੇ 60 ਨਕਲੀ ਆਈਫੋਨ ਮਾਡਲ ਵੀ ਬਰਾਮਦ ਕੀਤੇ ਹਨ। ਪੁਲਿਸ ਨੇ ਦੱਸਿਆ ਕਿ ਠੱਗਾਂ ਨੇ ਦਿੱਲੀ ਤੋਂ 12,000 ਰੁਪਏ ਵਿੱਚ ਸਸਤੇ ਮੋਬਾਈਲ ਫੋਨ ਅਤੇ ਇੱਕ ਚੀਨੀ ਸ਼ਾਪਿੰਗ ਪੋਰਟਲ ਤੋਂ 4,500 ਰੁਪਏ ਵਿੱਚ ਆਈਫੋਨ ਬਾਕਸ ਖਰੀਦ ਲਏ ਸਨ। ਅਜਿਹੀ ਸਥਿਤੀ ਵਿੱਚ, ਜਦੋਂ ਵੀ ਤੁਸੀਂ ਕਿਸੇ ਥਰਡ ਪਾਰਟੀ ਤੋਂ ਆਈਫੋਨ ਖਰੀਦਦੇ ਹੋ, ਤਾਂ ਧਿਆਨ ਰੱਖੋ ਕਿ ਇਹ ਫੋਨ ਡੁਪਲੀਕੇਟ ਨਾ ਹੋਵੇ। ਅੱਜ ਅਸੀਂ ਤੁਹਾਨੂੰ ਕੁੱਝ ਅਜਿਹੇ ਟਿਪਸ ਦੱਸਣ ਜਾ ਰਹੇ ਹਾਂ ਜਿਨ੍ਹਾਂ ਦੀ ਮਦਦ ਨਾਲ ਤੁਸੀਂ ਆਸਾਨੀ ਨਾਲ ਨਕਲੀ ਤੇ ਅਸਲੀ ਆਈਫੋਨ ਦਾ ਪਤਾ ਲਗਾ ਸਕਦੇ ਹੋ।

IMEI ਨੰਬਰ: ਸਾਰੇ ਅਸਲ ਆਈਫੋਨ ਮਾਡਲ IMEI ਨੰਬਰ ਦੇ ਨਾਲ ਆਉਂਦੇ ਹਨ। ਅਜਿਹੀ ਸਥਿਤੀ ਵਿੱਚ, ਇਹ ਜਾਣਨ ਦਾ ਸਭ ਤੋਂ ਆਸਾਨ ਤਰੀਕਾ ਹੈ ਕਿ ਤੁਹਾਡਾ ਆਈਫੋਨ ਅਸਲੀ ਹੈ ਜਾਂ ਨਕਲੀ IMEI ਨੂੰ ਚੈੱਕ ਕਰਨਾ। IMEI ਨੰਬਰ ਅਸਲ ਪੈਕੇਜਿੰਗ ਵਿੱਚ ਪਾਇਆ ਜਾ ਸਕਦਾ ਹੈ। ਤੁਹਾਨੂੰ ਬਾਕਸ ਵਿੱਚ ਲਿਖਿਆ IMEI ਨੰਬਰ ਮਿਲੇਗਾ। ਇਸ ਨੂੰ ਤੁਸੀਂ ਫੋਨ ਦੇ ਆਈਐਮਈਆਈ ਨੰਬਰ ਨਾਲ ਵੀ ਮਿਲਾ ਸਕਦੇ ਹੋ।

ਆਈਫੋਨ ਤੋਂ ਆਈਐਮਈਆਈ ਨੰਬਰ ਚੈੱਕ ਕਰਨ ਲਈ, ਤੁਹਾਨੂੰ ਸੈਟਿੰਗਾਂ > ਜਨਰਲ 'ਤੇ ਜਾਣਾ ਹੋਵੇਗਾ ਅਤੇ About 'ਤੇ ਟੈਪ ਕਰਨਾ ਹੋਵੇਗਾ। ਇਸ ਤੋਂ ਬਾਅਦ ਤੁਹਾਨੂੰ ਸੀਰੀਅਲ ਨੰਬਰ ਦਿਖਾਈ ਦੇਵੇਗਾ, ਜੇ ਤੁਸੀਂ ਨੀਚੇ ਸਕਰੋਲ ਕਰੋਗੇ ਤਾਂ ਤੁਹਾਨੂੰ ਉੱਥੇ IMEI ਨੰਬਰ ਦਿਖਾਈ ਦੇਵੇਗਾ। ਜੇਕਰ ਤੁਹਾਨੂੰ ਕੋਈ IMEI ਜਾਂ ਸੀਰੀਅਲ ਨੰਬਰ ਨਹੀਂ ਦਿਸਦਾ ਹੈ ਤਾਂ ਇਸ ਦਾ ਮਤਲਬ ਹੈ ਕਿ ਤੁਹਾਡਾ ਫੋਨ ਜਾਅਲੀ ਹੈ।

ਇਸ ਤੋਂ ਇਲਾਵਾ ਤੁਸੀਂ ਆਈਫੋਨ ਦੀ ਜਾਂਚ ਇਸ ਦੀ ਵੈੱਬਸਾਈਟ ਤੋਂ ਵੀ ਕਰ ਸਕਦੇ ਹੋ।

ਆਪਣੀ ਅਸਲੀ ਜਾਂ ਨਕਲੀ ਡਿਵਾਈਸ ਦਾ ਪਤਾ ਲਗਾਉਣ ਲਈ Apple ਦੀ ਚੈੱਕ ਕਵਰੇਜ ਵੈੱਬਸਾਈਟ (https://checkcoverage.apple.com/) ਦੀ ਵਰਤੋਂ ਕਰੋ। ਇਸਦੇ ਲਈ ਬਾਕਸ ਵਿੱਚ ਦਿੱਤੇ ਆਈਫੋਨ ਦੇ ਸੀਰੀਅਲ ਨੰਬਰ ਦੀ ਵਰਤੋਂ ਕਰਨੀ ਹੋਵੇਗੀ। ਇਸ ਤੋਂ ਤੁਹਾਨੂੰ ਆਸਾਨੀ ਨਾਲ ਪਤਾ ਲੱਗ ਜਾਵੇਗਾ ਕਿ ਜੋ ਫੋਨ ਤੁਸੀਂ ਵਰਤ ਰਹੇ ਹੋ ਉਹ ਅਸਲੀ ਹੈ ਜਾਂ ਫੇਕ। ਜੇਕਰ ਤੁਹਾਨੂੰ ਅਜੇ ਵੀ ਸ਼ੱਕ ਹੈ, ਤਾਂ ਤੁਸੀਂ ਆਪਣੇ ਆਈਫੋਨ ਨੂੰ ਨਜ਼ਦੀਕੀ ਐਪਲ ਸਟੋਰ 'ਤੇ ਲੈ ਜਾ ਸਕਦੇ ਹੋ। ਉੱਥੇ ਮੌਜੂਦ ਐਗਜ਼ੀਕਿਊਟਿਵ ਤੁਹਾਨੂੰ ਇਹ ਜਾਣਨ 'ਚ ਮਦਦ ਕਰੇਗਾ ਕਿ ਫੋਨ ਅਸਲੀ ਹੈ ਜਾਂ ਨਕਲੀ। ਇਸ ਤੋਂ ਇਲਾਵਾ ਜੇ ਤੁਸੀਂ ਅਜਿਹੀ ਧੋਖਾਧੜੀ ਤੋਂ ਬਚਣਾ ਚਾਹੁੰਦੇ ਹੋ ਤਾਂ ਤੁਸੀਂ ਸਿਰਫ ਅਧਿਕਾਰਤ ਐਪਲ ਸਟੋਰ ਜਾਂ ਅਧਿਕਾਰਤ ਡੀਲਰ ਤੋਂ ਹੀ ਆਈਫੋਨ ਜਾਂ ਕੋਈ ਵੀ ਪ੍ਰਾਡਕਟ ਖਰੀਦੋ ਨਹੀਂ ਤਾਂ ਤੁਸੀਂ ਵੀ ਅਜਿਹੇ ਫ੍ਰਾਡ ਦਾ ਸ਼ਿਕਾਰ ਹੋ ਸਕਦੇ ਹੋ।