Night Shift ਕਰਨ ਵਾਲਿਆਂ ਨੂੰ ਸ਼ੂਗਰ ਦੀ ਬੀਮਾਰੀ ਦਾ ਖ਼ਤਰਾ: ਖੋਜ

ਜੇਕਰ ਤੁਸੀਂ ਨਾਇਟ ਸ਼ਿਫਟ ਵਿੱਚ ਕੰਮ ਕਰਦੇ ਹੋ ਤਾਂ ਇਹ ਖ਼ਬਰ ਤੁਹਾਡੇ ਲਈ ਲਾਹੇਵੰਦ ਸਿੱਧ ਹੋ ਸਕਦੀ ਹੈ। ਦਰਅਸਲ ਇੱਕ ਨਵੇਂ ਅਧਿਐਨ ਵਿੱਚ ਇਹ ਦਾਅਵਾ ਕੀਤਾ ਗਿਆ ਹੈ ਕਿ ਨਾਇਟ ਸ਼ਿਫਟ ਵਿੱਚ ਕੰਮ ਕਰਨ ਵਾਲੇ ਲੋਕ ਜੇਕਰ ਰਾਤ ਨੂੰ ਖਾਣਾ ਨਾ ਖਾਣ ਤਾਂ ਉਨ੍ਹਾਂ ਵਿੱਚ ਸ਼ੂਗਰ ਦਾ ਖ਼ਤਰਾ ਘੱਟ ਹੋ ਸਕਦਾ ਹੈ।

ਅਧਿਐਨ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਨਾਇਟ ਸ਼ਿਫਟ ਵਿੱਚ ਕੰਮ ਕਰਨ ਵਾਲੇ ਵਿਅਕਤੀ ਜੇਕਰ ਦਿਨ ਵਿੱਚ ਹੀ ਰੋਟੀ ਖਾ ਲੈਣ ਤਾਂ ਉਹਨਾਂ ਦੇ ਖ਼ੂਨ ਵਿੱਚ ਗੁਲੂਕੋਜ਼ ਦੀ ਮਾਤਰਾ ਨਹੀਂ ਵਧੇਗੀ ਜਿਸ ਨਾਲ ਉਨ੍ਹਾਂ ਵਿੱਚ ਸ਼ੂਗਰ ਦਾ ਜੋਖ਼ਮ ਵੀ ਬਹੁਤ ਘੱਟ ਰਹੇਗਾ। ਇਹ ਅਧਿਐਨ ਸਾਇੰਸ ਐਡਵਾਂਸ ਜਨਰਲ ਵਿੱਚ ਪ੍ਰਕਾਸ਼ਿਤ ਹੋਇਆ ਹੈ।

ਟਾਇਮਜ਼ਨਾਊ ਦੇ ਅਨੁਸਾਰ, ਖੋਜ ਦੇ ਲੇਖਕ ਨੇ ਕਿਹਾ ਕਿ ਅਧਿਐਨ ਦਾ ਮੁੱਖ ਮੰਤਵ ਰਾਤ ਨੂੰ ਕੰਮ ਕਰਨ ਵਾਲੇ ਲੋਕਾਂ ਦੇ ਜੀਵਨ ਨੂੰ ਸੁੱਚਜਾ ਬਣਾਉਣਾ ਹੈ। ਉਨ੍ਹਾਂ ਕਿਹਾ ਕਿ ਰਾਤ ਨੂੰ ਦੁਕਾਨਾਂ, ਹੋਟਲਾਂ, ਟਰੱਕ ਡਰਾਈਵਰਾਂ, ਫਾਇਰ ਵਰਕਰਾਂ ਅਤੇ ਕਾਲ ਸੈਂਟਰਾਂ ਵਿੱਚ ਕੰਮ ਕਰਨ ਵਾਲੇ ਲੋਕਾਂ ਨੂੰ ਸ਼ੂਗਰ ਦਾ ਵਧੇਰੇ ਖਤਰਾ ਹੁੰਦਾ ਹੈ ਕਿਉਂਕਿ ਉਹ ਰਾਤ ਦੀਆਂ ਸ਼ਿਫਟਾਂ ਵਿੱਚ ਕੰਮ ਕਰਦੇ ਹਨ ਅਤੇ ਰਾਤ ਨੂੰ ਖਾਂਦੇ ਹਨ। ਦਰਅਸਲ ਰਾਤ ਨੂੰ ਖ਼ਾਣਾ ਖਾਣ ਨਾਲ ਗੁਲੂਕੋਜ਼ ਦਾ ਪੱਧਰ ਵੱਧ ਜਾਂਦਾ ਹੈ ਜਿਸ ਨਾਲ ਸ਼ੂਗਰ ਹੋਣ ਦੀ ਸ਼ਿਕਾਇਤ ਅਕਸਰ ਹੋ ਜਾਂਦੀ ਹੈ।

ਨੈਸ਼ਨਲ ਸੈਂਟਰ ਫਾਰ ਸਲੀਪ ਡਿਸਆਰਡਰ ਰਿਸਰਚ (ਨੈਸ਼ਨਲ ਸੈਂਟਰ ਆਨ ਸਲੀਪ ਡਿਸਆਰਡਰਜ਼ ਰਿਸਰਚ) ਦੀ ਮੈਰਿਸਕਾ ਬ੍ਰਾਊਨ ਨੇ ਦੱਸਿਆ ਕਿ ਰਾਤ ਦੀ ਸ਼ਿਫਟ ਦੇ ਲੋਕਾਂ ਦਾ ਮੈਟਾਬੋਲਿਜ਼ਮ ਪ੍ਰਭਾਵਿਤ ਹੁੰਦਾ ਹੈ, ਜਿਸ ਨਾਲ ਕਈ ਤਰ੍ਹਾਂ ਦੀਆਂ ਸਿਹਤ ਸਮੱਸਿਆਵਾਂ ਪੈਦਾ ਹੁੰਦੀਆਂ ਹਨ।

ਇਸ ਅਧਿਐਨ ਵਿੱਚ ਪਾਇਆ ਗਿਆ ਹੈ ਕਿ ਸ਼ਿਫਟ ਦੇ ਕੰਮ ਦਾ ਪ੍ਰਭਾਵ ਸਿੱਧੇ ਤੌਰ 'ਤੇ ਜਨਤਕ ਸਿਹਤ ਨਾਲ ਜੁੜਿਆ ਹੋਇਆ ਹੈ। ਇਸ ਅਧਿਐਨ ਵਿੱਚ ਸ਼ਾਮਿਲ ਲੋਕਾਂ ਨੂੰ ਦੋ ਗਰੁੱਪਾਂ ਵਿੱਚ ਵੰਡਿਆ ਗਿਆ ਸੀ। ਦੋਵੇਂ ਗਰੁੱਪ ਰਾਤ ਦੀਆਂ ਸ਼ਿਫਟਾਂ ਵਿੱਚ ਕੰਮ ਕਰਦੇ ਸਨ। ਰਾਤ ਦੀਆਂ ਸ਼ਿਫਟਾਂ ਵਿੱਚ ਕੰਮ ਕਰਨ ਵਾਲੇ ਇੱਕ ਸਮੂਹ ਨੂੰ ਦਿਨ ਵਿੱਚ ਭੋਜਨ ਦਿੱਤਾ ਜਾਂਦਾ ਸੀ ਅਤੇ ਰਾਤ ਨੂੰ ਕੋਈ ਰਾਤ ਦਾ ਖਾਣਾ ਨਹੀਂ ਦਿੱਤਾ ਜਾਂਦਾ ਸੀ। ਜਦੋਂ ਕਿ ਲੋਕਾਂ ਦੇ ਦੂਜੇ ਸਮੂਹ ਨੂੰ ਰਾਤ ਨੂੰ ਭੋਜਨ ਦਿੱਤਾ ਜਾਂਦਾ ਸੀ।

ਹੈਰਾਨ ਕਰਨ ਵਾਲੇ ਨਤੀਜੇ
14 ਦਿਨਾਂ ਬਾਅਦ, ਜਦੋਂ ਨਤੀਜਿਆਂ ਦਾ ਵਿਸ਼ਲੇਸ਼ਣ ਕੀਤਾ ਗਿਆ, ਹੈਰਾਨ ਕਰਨ ਵਾਲੇ ਨਤੀਜੇ ਸਾਹਮਣੇ ਆਏ। ਅਧਿਐਨ ਵਿੱਚ ਪਾਇਆ ਗਿਆ ਹੈ ਕਿ ਜਿਹੜੇ ਲੋਕ ਰਾਤ ਦੀਆਂ ਸ਼ਿਫਟਾਂ ਵਿੱਚ ਕੰਮ ਕਰਦੇ ਸਮੇਂ ਦਿਨ ਵਿੱਚ ਖਾਂਦੇ ਸਨ ਅਤੇ ਰਾਤ ਨੂੰ ਖਾਂਦੇ ਸਨ, ਉਨ੍ਹਾਂ ਵਿੱਚ ਗੁਲੂਕੋਜ਼ ਦਾ ਪੱਧਰ ਵੀ 64 ਗੁਣਾ ਵਧ ਜਾਂਦਾ ਹੈ, ਜਦੋਂ ਕਿ ਦਿਨ ਵਿੱਚ ਹੀ ਖਾਣਾ ਖਾਂਦੇ ਵਿਅਕਤੀ ਵਿੱਚ ਗੁਲੂਕੋਜ਼ ਦਾ ਪੱਧਰ ਆਮ ਰਿਹਾ ਹੈ। ਮਰਿਸਕਾ ਦਾ ਕਹਿਣਾ ਹੈ ਕਿ ਹਾਲਾਂਕਿ ਅਧਿਐਨ ਬਹੁਤ ਛੋਟੇ ਪੈਮਾਨੇ 'ਤੇ ਕੀਤਾ ਗਿਆ ਹੈ, ਪਰ ਨਤੀਜੇ ਬਹੁਤ ਸਪੱਸ਼ਟ ਹਨ।