Honda ਨੇ ਲਾਂਚ ਕੀਤੀ H-Smart ਫੀਚਰ ਨਾਲ ਬਿਲਕੁਲ ਨਵੀਂ ਹੌਂਡਾ ਐਕਟਿਵਾ 125

ਹੌਂਡਾ ਮੋਟਰਸਾਈਕਲ ਐਂਡ ਸਕੂਟਰ ਇੰਡੀਆ ਨੇ ਪਿਛਲੀ ਜਨਵਰੀ 'ਚ ਨਵੀਂ ਐੱਚ-ਸਮਾਰਟ ਤਕਨੀਕ ਨਾਲ ਆਪਣਾ ਮਸ਼ਹੂਰ ਸਕੂਟਰ ਐਕਟਿਵਾ 6ਜੀ ਲਾਂਚ ਕੀਤਾ ਸੀ। ਹਾਲ ਹੀ 'ਚ ਕੰਪਨੀ ਨੇ ਆਪਣੀ ਐਕਟਿਵਾ 125 ਐੱਚ-ਸਮਾਰਟ ਦਾ ਟੀਜ਼ਰ ਜਾਰੀ ਕੀਤਾ ਸੀ, ਹੁਣ ਕੰਪਨੀ ਨੇ ਆਪਣੀ ਅਧਿਕਾਰਤ ਵੈੱਬਸਾਈਟ 'ਤੇ ਇਸ ਸਕੂਟਰ ਦੀ ਕੀਮਤ ਨੂੰ ਅਪਡੇਟ ਕੀਤਾ ਹੈ। ਨਵੇਂ ਸਮਾਰਟ ਫੀਚਰਸ ਨਾਲ ਲੈਸ ਐਕਟਿਵਾ 125 ਐੱਚ-ਸਮਾਰਟ ਸਕੂਟਰ ਦੀ ਕੀਮਤ 88,093 ਰੁਪਏ (ਐਕਸ-ਸ਼ੋਰੂਮ, ਦਿੱਲੀ) ਰੱਖੀ ਗਈ ਹੈ। ਹਾਲਾਂਕਿ ਕੰਪਨੀ ਨੇ ਅਜੇ ਤੱਕ ਇਸ ਸਕੂਟਰ ਨੂੰ ਲਾਂਚ ਕਰਨ ਦਾ ਅਧਿਕਾਰਕ ਐਲਾਨ ਨਹੀਂ ਕੀਤਾ ਹੈ। ਇੱਥੇ ਦਿੱਤੀ ਗਈ ਕੀਮਤ ਅਧਿਕਾਰਤ ਵੈੱਬਸਾਈਟ 'ਤੇ ਦਿੱਤੀ ਗਈ ਜਾਣਕਾਰੀ ਦੇ ਅਨੁਸਾਰ ਹੈ। ਕੰਪਨੀ ਦਾ ਕਹਿਣਾ ਹੈ ਕਿ ਨਵੀਂ ਐਕਟਿਵਾ 125 ਪਹਿਲਾਂ ਨਾਲੋਂ ਵੀ ਜ਼ਿਆਦਾ ਸਮਾਰਟ ਹੋ ਗਈ ਹੈ ਅਤੇ ਇਹ ਸਮਾਰਟ-ਕੀ ਫੀਚਰ ਪ੍ਰਾਪਤ ਕਰਨ ਵਾਲਾ ਸੈਗਮੈਂਟ ਦਾ ਪਹਿਲਾ ਸਕੂਟਰ ਹੈ।

ਨਵੀਂ ਐਕਟੀਵਾ ਦੇ ਫੀਚਰ: ਨਵੀਂ Honda Activa 125 ਵਿੱਚ 123.97cc ਸਿੰਗਲ ਸਿਲੰਡਰ, 4 ਸਟ੍ਰੋਕ, ਏਅਰ ਕੂਲਡ, ਫਿਊਲ ਇੰਜੈਕਟਿਡ ਇੰਜਣ ਦੀ ਵਰਤੋਂ ਕੀਤੀ ਗਈ ਹੈ। ਇਹ ਇੰਜਣ 6,250 rpm 'ਤੇ 8.19 bhp ਦੀ ਪਾਵਰ ਅਤੇ 5,000 rpm 'ਤੇ 10.4 Nm ਦਾ ਟਾਰਕ ਜਨਰੇਟ ਕਰਦਾ ਹੈ। ਇੰਜਣ OBD-2 ਨਵੇਂ ਨਿਯਮਾਂ ਨੂੰ ਪੂਰਾ ਕਰਨ ਲਈ ਅਨੁਕੂਲ ਹੈ ਜੋ ਇਸ ਸਾਲ ਅਪ੍ਰੈਲ ਤੋਂ ਲਾਗੂ ਹੋਣਗੇ।

ਐਚ-ਸਮਾਰਟ ਤਕਨਾਲੋਜੀ ਨਾਲ ਤਿਆਰ ਕੀਤੀ ਗਈ, ਸਮਾਰਟ ਕੀ ਤੁਹਾਡੇ ਡਰਾਈਵਿੰਗ ਐਕਸਪੀਰੀਅੰਸ ਨੂੰ ਸੁਵਿਧਾਜਨਕ ਬਣਾਉਂਦੀ ਹੈ। ਇਹ ਇੱਕ ਡਿਜੀਟਲ ਮੀਟਰ ਨਾਲ ਆਉਂਦੀ ਹੈ ਜੋ ਤੁਹਾਨੂੰ ਤੁਹਾਡੀ ਰਾਈਡ ਦੌਰਾਨ ਰੀਅਲ ਟਾਈਮ ਅੱਪਡੇਟ ਦਿੰਦਾ ਹੈ। ਕੰਪਨੀ ਦਾ ਦਾਅਵਾ ਹੈ ਕਿ ਤੁਹਾਡਾ ਸਕੂਟਰ ਚੋਰੀ ਹੋਣ ਦਾ ਖਤਰਾ ਬਹੁਤ ਘੱਟ ਗਿਆ ਹੈ। ਐਂਟੀ-ਥੈਫਟ ਸਿਸਟਮ ਤੁਹਾਡੇ ਸਕੂਟਰ ਨੂੰ ਪੂਰੀ ਤਰ੍ਹਾਂ ਸੁਰੱਖਿਅਤ ਰੱਖਦਾ ਹੈ। ਕਿਉਂਕਿ ਜਦੋਂ ਤੁਸੀਂ ਆਪਣਾ ਸਕੂਟਰ ਕਿਤੇ ਪਾਰਕ ਕਰੋਗੇ, ਤਾਂ ਵਾਰ-ਵਾਰ ਲਾਕ ਚੈੱਕ ਕਰਨ ਦੀ ਜ਼ਰੂਰਤ ਨਹੀਂ ਹੁੰਦੀ, ਜਿਵੇਂ ਹੀ ਤੁਸੀਂ ਸਕੂਟਰ ਤੋਂ ਦੋ ਮੀਟਰ ਦੂਰ ਜਾਂਦੇ ਹੋ, ਇਮੋਬਿਲਾਈਜ਼ਰ ਫੰਕਸ਼ਨ ਐਕਟੀਵੇਟ ਹੋ ਜਾਂਦਾ ਹੈ ਅਤੇ ਇਸ ਨੂੰ ਸਮਾਰਟ-ਕੀ ਲਾਕ ਦੀ ਮਦਦ ਨਾਲ ਕੰਟਰੋਲ ਕੀਤਾ ਜਾ ਸਕਦਾ ਹੈ।

ਆਮ ਤੌਰ 'ਤੇ, ਸਕੂਟਰ ਦੇ ਕਿਸੇ ਵੀ ਫੰਕਸ਼ਨ ਨੂੰ ਲਾਕ ਜਾਂ ਅਨਲੌਕ ਕਰਨ ਲਈ, ਤੁਹਾਨੂੰ ਇਸ ਨੂੰ ਹੱਥੀਂ ਆਪਰੇਟ ਕਰਨਾ ਪੈਂਦਾ ਹੈ। ਪਰ ਨਵੀਂ ਐਕਟਿਵਾ ਦੇ ਨਾਲ ਅਜਿਹਾ ਨਹੀਂ ਹੈ, ਤੁਸੀਂ ਸਮਾਰਟ ਕੀ ਰਾਹੀਂ ਸਕੂਟਰ ਦੀ ਸੀਟ, ਫਿਊਲ ਕੈਪ, ਹੈਂਡਲ ਆਦਿ ਨੂੰ ਆਸਾਨੀ ਨਾਲ ਲਾਕ/ਅਨਲਾਕ ਕਰ ਸਕਦੇ ਹੋ। ਜੇਕਰ ਤੁਸੀਂ ਭੀੜ-ਭੜੱਕੇ ਵਾਲੀ ਪਾਰਕਿੰਗ ਵਿੱਚ ਆਪਣਾ ਸਕੂਟਰ ਪਾਰਕ ਕਰਦੇ ਹੋ, ਤਾਂ ਤੁਹਾਨੂੰ ਇਸ ਨੂੰ ਲੱਭਣ ਵਿੱਚ ਕੋਈ ਮੁਸ਼ਕਲ ਨਹੀਂ ਹੋਵੇਗੀ। ਕੰਪਨੀ ਨੇ ਨਵੀਂ ਹੌਂਡਾ ਐਕਟਿਵਾ 'ਚ ਸਮਾਰਟ ਫਾਈਂਡ ਸਿਸਟਮ ਦਿੱਤਾ ਹੈ। ਤੁਸੀਂ ਸਮਾਰਟ ਕੀ ਰਾਹੀਂ ਆਸਾਨੀ ਨਾਲ ਆਪਣਾ ਸਕੂਟਰ ਲੱਭ ਸਕਦੇ ਹੋ। ਨਵੀਂ ਐਕਟਿਵਾ 125 ਦਾ ਟਾਪ ਵੇਰੀਐਂਟ 'H ਸਮਾਰਟ ਕੀ' ਫੀਚਰ ਨਾਲ ਲਿਆਂਦਾ ਗਿਆ ਹੈ। ਹੌਂਡਾ ਨੇ ਨਵੀਂ ਐਕਟਿਵਾ 125 ਦੇ ਇੰਸਟਰੂਮੈਂਟ ਕਲੱਸਟਰ ਨੂੰ ਵੀ ਅਪਡੇਟ ਕੀਤਾ ਹੈ। ਹੁਣ ਸਕੂਟਰ ਦੇ ਇੰਸਟਰੂਮੈਂਟ ਕਲੱਸਟਰ ਵਿੱਚ ਕੁੱਲ ਯਾਤਰਾ, ਘੜੀ, ਈਕੋ ਇੰਡੀਕੇਟਰ, ਮਾਈਲੇਜ ਅਤੇ ਫਿਊਲ ਇੰਡੀਕੇਟਰ ਵੀ ਉਪਲਬਧ ਹਨ।