ਤੁਸੀਂ ਰਿਟਾਇਰਮੈਂਟ ਤੋਂ ਬਾਅਦ ਵੀ NPS ਵਿੱਚ ਕਰ ਸਕਦੇ ਹੋ ਨਿਵੇਸ਼, ਜਾਣ ਲਓ ਨਵੇਂ ਨਿਯਮ

ਨੈਸ਼ਨਲ ਪੈਨਸ਼ਨ ਸਿਸਟਮ (NPS) ਇੱਕ ਸ਼ਾਨਦਾਰ ਸਕੀਮ ਹੈ ਜੋ ਨਾ ਸਿਰਫ਼ ਇੱਕ ਰਿਟਾਇਰਮੈਂਟ ਫੰਡ ਬਣਾਉਣ ਵਿੱਚ ਤੁਹਾਡੀ ਮਦਦ ਕਰਦੀ ਹੈ ਬਲਕਿ ਇੱਕ ਨਿਯਮਤ ਪੈਨਸ਼ਨ ਨੂੰ ਵੀ ਯਕੀਨੀ ਬਣਾਉਂਦੀ ਹੈ। ਇਹ ਸਰਕਾਰੀ ਸਕਿਉਰਿਟੀਜ਼, ਕਾਰਪੋਰੇਟ ਬਾਂਡ ਅਤੇ ਇਕੁਇਟੀ ਵਿੱਚ ਨਿਵੇਸ਼ ਵਿਕਲਪ ਪ੍ਰਦਾਨ ਕਰਦਾ ਹੈ। NPS ਵਿੱਚ ਨਿਵੇਸ਼ ਕਰਨ ਨਾਲ ਵਧੀਆ ਰਿਟਰਨ ਅਤੇ ਟੈਕਸ ਛੋਟ ਲਾਭ ਮਿਲਦਾ ਹੈ। ਕਈਆਂ ਦੇ ਇਸ ਗੱਲ ਨੂੰ ਲੈ ਕੇ ਸਵਾਲ ਹਨ ਕਿ ਰਿਟਾਇਰਮੈਂਟ ਤੋਂ ਬਾਅਦ NPS ਵਿੱਚ ਨਿਵੇਸ਼ ਕੀਤਾ ਜਾ ਸਕਦਾ ਹੈ ਜਾਂ ਨਹੀਂ, ਆਓ ਜਾਣਦੇ ਹਾਂ ਇਸ ਬਾਰੇ ਸਭ ਕੁੱਝ...

ਰਿਟਾਇਰਮੈਂਟ ਤੋਂ ਬਾਅਦ NPS ਵਿੱਚ ਨਿਵੇਸ਼: ਜੀ ਹਾਂ, ਤੁਸੀਂ ਰਿਟਾਇਰਮੈਂਟ ਤੋਂ ਬਾਅਦ ਵੀ NPS ਵਿੱਚ ਨਿਵੇਸ਼ ਕਰ ਸਕਦੇ ਹੋ। ਪੈਨਸ਼ਨ ਫੰਡ ਰੈਗੂਲੇਟਰੀ ਅਤੇ ਵਿਕਾਸ ਅਥਾਰਟੀ (PFRDA) ਨੇ NPS ਨੂੰ ਹੋਰ ਫਲੈਕਸੀਬਲ ਬਣਾਉਣ ਲਈ ਕਈ ਬਦਲਾਅ ਕੀਤੇ ਹਨ। ਜੇਕਰ ਤੁਹਾਡੀ ਉਮਰ 60 ਤੋਂ ਵੱਧ ਅਤੇ 65 ਸਾਲ ਤੋਂ ਘੱਟ ਹੈ, ਤਾਂ ਤੁਸੀਂ NPS ਵਿੱਚ ਨਿਵੇਸ਼ ਕਰਨਾ ਜਾਰੀ ਰੱਖ ਸਕਦੇ ਹੋ। ਤੁਸੀਂ NPS ਵਿੱਚ ਘੱਟੋ-ਘੱਟ ਤਿੰਨ ਸਾਲ ਅਤੇ ਵੱਧ ਤੋਂ ਵੱਧ 70 ਸਾਲ ਦੀ ਉਮਰ ਤੱਕ ਨਿਵੇਸ਼ ਕਰ ਸਕਦੇ ਹੋ।

NPS ਵਿੱਚ ਖਾਤਿਆਂ ਦੀਆਂ ਕਿਸਮਾਂ: ਐਨਪੀਐਸ ਵਿੱਚ ਦੋ ਤਰ੍ਹਾਂ ਦੇ ਖਾਤੇ ਹਨ- ਟੀਅਰ 1 ਅਤੇ ਟੀਅਰ 2 ਟੀਅਰ 1 ਅਜਿਹਾ ਖਾਤਾ ਹੈ ਜਿਸ ਵਿੱਚੋਂ ਤੁਸੀਂ ਪੈਸੇ ਕੱਢਵਾ ਨਹੀਂ ਸਕਦੇ ਤੇ ਇਸ ਵਿੱਚ ਪੈਸੇ ਕੱਢਵਾਉਣ ਦੀ ਉਮਰ 60 ਸਾਲ ਰੱਖੀ ਗਈ ਹੈ।ਟੀਅਰ 2 ਇੱਕ ਅਜਿਹਾ ਖਾਤਾ ਹੈ ਜਿਸ ਵਿੱਚ ਗਾਹਕ ਕਿਸੇ ਵੇਲੇ ਵੀ ਪੈਸੇ ਕੱਢਵਾ ਸਕਦਾ ਹੈ।

NPS ਵਿੱਚ ਪੈਸੇ ਕਢਵਾਉਣ ਦੇ ਨਿਯਮ: ਨਵੇਂ ਨਿਯਮਾਂ ਦੇ ਅਨੁਸਾਰ, ਤੁਸੀਂ ਮਿਆਦ ਪੂਰੀ ਹੋਣ 'ਤੇ ਪੂਰਾ ਫੰਡ ਵਾਪਸ ਨਹੀਂ ਲੈ ਸਕਦੇ। ਫੰਡ ਦੇ 40 ਪ੍ਰਤੀਸ਼ਤ ਤੋਂ ਐਨਯੁਟੀ ਖਰੀਦਣਾ ਜ਼ਰੂਰੀ ਹੈ। ਇਸੇ ਐਨਯੁਟੀ ਤੋਂ ਰਿਟਾਇਰਮੈਂਟ ਤੋਂ ਬਾਅਦ ਪੈਨਸ਼ਨ ਦਿੱਤੀ ਜਾਂਦੀ ਹੈ। ਬਾਕੀ ਦਾ 60 ਫੀਸਦੀ ਫੰਡ ਕਢਵਾਇਆ ਜਾ ਸਕਦਾ ਹੈ। ਜੇਕਰ ਤੁਸੀਂ ਰਿਟਾਇਰਮੈਂਟ ਤੋਂ ਬਾਅਦ ਵੀ NPS 'ਚ ਜਮ੍ਹਾ ਰਾਸ਼ੀ ਨੂੰ ਕਢਵਾਉਣਾ ਨਹੀਂ ਚਾਹੁੰਦੇ ਹੋ, ਤਾਂ ਸਰਕਾਰ ਤੁਹਾਨੂੰ ਅਜਿਹਾ ਕਰਨ ਦੀ ਇਜਾਜ਼ਤ ਵੀ ਦਿੰਦੀ ਹੈ। ਮਿਆਦ ਪੂਰੀ ਹੋਣ 'ਤੇ ਮਿਲਣ ਵਾਲੀ ਰਕਮ 'ਤੇ ਵੀ ਕੋਈ ਟੈਕਸ ਨਹੀਂ ਲਗਦਾ ਹੈ।

NPS ਨਿਵੇਸ਼ਾਂ 'ਤੇ ਟੈਕਸ ਛੋਟ: ਤੁਸੀਂ ਇਨਕਮ ਟੈਕਸ ਐਕਟ, 1961 ਦੇ ਸੈਕਸ਼ਨ 80CCD (1), ਸੈਕਸ਼ਨ 80CCD (1B), ਅਤੇ ਸੈਕਸ਼ਨ 80CCD (2) ਦੇ ਤਹਿਤ NPS ਵਿੱਚ ਕੀਤੇ ਗਏ ਨਿਵੇਸ਼ 'ਤੇ ਟੈਕਸ ਛੋਟ ਦਾ ਦਾਅਵਾ ਕਰ ਸਕਦੇ ਹੋ। NPS ਵਿੱਚ ਨਿਵੇਸ਼ ਕਰਨ ਨਾਲ ਤੁਸੀਂ ਸਾਲਾਨਾ 50,000 ਰੁਪਏ ਤੱਕ ਦੀ ਬਚਤ ਕਰ ਸਕਦੇ ਹੋ। ਧਾਰਾ 80CCD (1B) ਦੇ ਤਹਿਤ। ਇਸ ਤੋਂ ਇਲਾਵਾ, ਤੁਸੀਂ 80C ਦੇ ਤਹਿਤ 1,50,000 ਰੁਪਏ ਦੀ ਟੈਕਸ ਛੋਟ ਪ੍ਰਾਪਤ ਕਰ ਸਕਦੇ ਹੋ।