Zomato ਤੇ ਰੈਸਟੋਰੈਂਟ ਦੇ ਬਿੱਲਾਂ ਦੀ ਪੋਸਟ ਹੋਈ ਵਾਇਰਲ, ਜਾਣੋ ਕਿਉਂ ਬਿੱਲ ਦੇਖ ਭੜਕੇ ਲੋਕ

ਡਿਜੀਟਲ ਭਾਰਤ ਵਿੱਚ ਕਈ ਸਹੂਲਤਾਂ ਹੁਣ ਘਰ ਬੈਠੇ ਹੀ ਮਿਲ ਜਾਂਦੀਆਂ ਹਨ। ਅੱਜ ਦੇ ਜ਼ਮਾਨੇ ਵਿੱਚ ਭੋਜਨ, ਦਵਾਈ ਅਤੇ ਰਾਸ਼ਨ ਦੀਆਂ ਵਸਤੂਆਂ ਸਿਰਫ਼ ਇੱਕ ਕਲਿੱਕ ਦੀ ਦੂਰੀ 'ਤੇ ਹਨ। ਭੋਜਨ ਦਾ ਆਨਲਾਈਨ ਆਰਡਰ ਕਰਨਾ ਵੀ ਹੁਣ ਆਮ ਹੋ ਗਿਆ ਹੈ। Zomato ਅਤੇ Swiggy ਵਰਗੇ ਪਲੇਟਫਾਰਮ ਵੀ ਆਪਣੇ ਉਪਭੋਗਤਾਵਾਂ ਨੂੰ ਬਹੁਤ ਸਾਰੀਆਂ ਪੇਸ਼ਕਸ਼ਾਂ ਦਿੰਦੇ ਹਨ। ਪਰ, ਇਨ੍ਹਾਂ ਪੇਸ਼ਕਸ਼ਾਂ ਤੋਂ ਬਾਅਦ ਵੀ, ਕਈ ਤਰ੍ਹਾਂ ਦੇ ਸਵਾਲ ਮਨ ਵਿੱਚ ਆਉਂਦੇ ਹਨ, ਜਿਵੇਂ ਕੀ ਰੈਸਟੋਰੈਂਟ ਜਾਂ ਹੋਟਲ ਨਾਲੋਂ ਔਨਲਾਈਨ ਭੋਜਨ ਆਰਡਰ ਕਰਨਾ ਸਸਤਾ ਹੈ?

ਅਜਿਹਾ ਹੀ ਕੁਝ ਵਾਪਰਿਆ ਹੈ ਮੁੰਬਈ ਵਿੱਚ ਜਿੱਥੇ ਇੱਕ ਵਿਅਕਤੀ ਨੂੰ ਜ਼ੋਮੈਟੋ ਤੋਂ ਖਾਣਾ ਲੈਣਾ ਮਹਿੰਗਾ ਪੈ ਗਿਆ। ਇਸ ਵਿਅਕਤੀ ਨੇ ਜ਼ੋਮੈਟੋ (Zomato) ਅਤੇ ਰੈਸਟੋਰੈਂਟ ਤੋਂ ਇੱਕੋ ਕਿਸਮ ਦਾ ਭੋਜਨ ਆਰਡਰ ਕੀਤਾ ਅਤੇ ਦੋਵਾਂ ਦੇ ਰੇਟਾਂ ਵਿੱਚ ਅੰਤਰ ਦੇਖ ਕੇ ਉਹ ਹੈਰਾਨ ਰਹਿ ਗਿਆ। ਜਦੋਂ ਰਾਹੁਲ ਕਾਬਰਾ ਨਾਂ ਦੇ ਵਿਅਕਤੀ ਨੇ ਲਿੰਕਡਇਨ (LinkedIn) 'ਤੇ ਦੋਵੇਂ ਬਿੱਲ ਪਾਏ ਤਾਂ ਜ਼ੋਮੈਟੋ (Zomato) ਅਤੇ ਰੈਸਟੋਰੈਂਟ ਦੇ ਬਿੱਲਾਂ 'ਚ ਫਰਕ ਦੇਖ ਕੇ ਲੋਕ ਵੀ ਹੈਰਾਨ ਰਹਿ ਗਏ।

ਜ਼ੋਮੈਟੋ (Zomato) ਨੇ 75 ਰੁਪਏ ਦਾ ਡਿਸਕਾਊਂਟ ਦੇਣ ਦੇ ਬਾਵਜੂਦ ਖਾਣੇ ਲਈ 690 ਰੁਪਏ ਲਏ, ਰੈਸਟੋਰੈਂਟ ਨੇ ਇਸ ਲਈ 512 ਰੁਪਏ ਲਏ। Zomato 'ਤੇ ਕਈ ਯੂਜ਼ਰਸ ਨੇ ਤਿੱਖੀਆਂ ਟਿੱਪਣੀਆਂ ਕੀਤੀਆਂ ਹਨ। ਕਾਬਰਾ ਦੀ ਪੋਸਟ 'ਤੇ ਹੁਣ ਤੱਕ 11,000 ਪ੍ਰਤੀਕਿਰਿਆਵਾਂ ਅਤੇ 1700 ਟਿੱਪਣੀਆਂ ਆ ਚੁੱਕੀਆਂ ਹਨ।

ਇਹ ਹੈ ਪੂਰਾ ਮਾਮਲਾ
ਲਿੰਕਡਇਨ (LinkedIn) ਯੂਜ਼ਰ ਰਾਹੁਲ ਕਾਬਰਾ ਨੇ ਜ਼ੋਮੈਟੋ ਆਰਡਰ ਬਿੱਲ ਅਤੇ ਉਸੇ ਆਰਡਰ ਦੇ ਆਫਲਾਈਨ ਬਿੱਲ ਦੀਆਂ ਤਸਵੀਰਾਂ ਸਾਂਝੀਆਂ ਕੀਤੀਆਂ ਹਨ। ਜਿਸ ਵਿੱਚ ਕੁੱਲ ਆਰਡਰ ਦੀ ਰਕਮ ਵਿੱਚ ਭਾਰੀ ਅੰਤਰ ਸੀ। ਕਾਬਰਾ ਨੇ ਜ਼ੋਮੈਟੋ ਤੋਂ ਵੈਜ ਬਲੈਕ ਪੇਪਰ ਸੌਸ, ਵੈਜੀਟੇਬਲ ਫਰਾਈਡ ਰਾਈਸ ਅਤੇ ਮਸ਼ਰੂਮ ਮੋਮੋਸ ਦਾ ਆਨਲਾਈਨ ਆਰਡਰ ਕੀਤਾ। Zomato ਦਾ ਬਿੱਲ 75 ਰੁਪਏ ਦੀ ਛੋਟ ਤੋਂ ਬਾਅਦ ਵੀ 690 ਰੁਪਏ ਹੋ ਗਿਆ। ਕਾਬਰਾ ਨੇ ਰੈਸਟੋਰੈਂਟ ਤੋਂ ਉਹੀ ਸਮਾਨ ਖਰੀਦਿਆ ਜਿੱਥੋਂ ਜ਼ੋਮੈਟੋ ਕਾਬਰਾ ਲਈ ਲੈ ਕੇ ਗਿਆ ਸੀ, ਇਸ ਲਈ ਕਾਬਰਾ ਨੂੰ ਰੈਸਟੋਰੈਂਟ 'ਚ ਸਿਰਫ 512 ਰੁਪਏ ਦੇਣੇ ਪਏ। ਇਸ ਤਰ੍ਹਾਂ ਦੋਵਾਂ ਬਿੱਲਾਂ 'ਚ 178 ਰੁਪਏ ਦਾ ਫਰਕ ਸੀ।

ਸਰਕਾਰ ਦੇ ਦਖਲ ਦੀ ਮੰਗ
ਕਾਬਰਾ ਨੇ ਆਪਣੀ ਲਿੰਕਡਇਨ ਪੋਸਟ 'ਚ ਲਿਖਿਆ ਹੈ ਕਿ ਇੱਕ ਹੀ ਚੀਜ਼ ਨੂੰ ਆਨਲਾਈਨ ਆਰਡਰ ਕਰਨ 'ਤੇ 178 ਰੁਪਏ ਜ਼ਿਆਦਾ ਦੇਣੇ ਪੈਂਦੇ ਹਨ। ਸਰਕਾਰ ਨੂੰ ਇਸ ਪਾੜੇ 'ਤੇ ਲਗਾਮ ਲਗਾਉਣ ਦੀ ਲੋੜ ਹੈ ਤਾਂ ਜੋ ਸਾਰੇ ਹਿੱਸੇਦਾਰਾਂ ਨੂੰ ਫਾਇਦਾ ਹੋ ਸਕੇ। ਕਾਬਰਾ ਨੇ ਅੱਗੇ ਲਿਖਿਆ, “ਮੈਂ ਇੱਕ ਆਮ ਭਾਰਤੀ ਗਾਹਕ ਹਾਂ, ਜੋ ਕੀਮਤਾਂ ਨੂੰ ਧਿਆਨ ਵਿੱਚ ਰੱਖਦਾ ਹਾਂ। ਅੰਤ ਵਿੱਚ, ਅਸੀਂ ਦੇਖਾਂਗੇ ਕਿ ਸਾਨੂੰ ਘੱਟ ਕੀਮਤ 'ਤੇ ਸਾਮਾਨ ਕਿੱਥੋਂ ਮਿਲ ਰਿਹਾ ਹੈ ਅਤੇ ਅਸੀਂ ਉਸ ਤੋਂ ਬਾਅਦ ਫੈਸਲਾ ਲੈਂਦੇ ਹਾਂ।

ਵਾਇਰਲ ਪੋਸਟ
ਹੁਣ ਰਾਹੁਲ ਕਾਬਰਾ ਦੀ ਇਹ ਪੋਸਟ ਵਾਇਰਲ ਹੋ ਗਈ ਹੈ। ਇਸ ਪੋਸਟ ਨੂੰ 11,000 ਪ੍ਰਤੀਕਿਰਿਆਵਾਂ ਅਤੇ 1700 ਤੋਂ ਵੱਧ ਟਿੱਪਣੀਆਂ ਮਿਲੀਆਂ ਹਨ। ਕਈ ਹੋਰ ਉਪਭੋਗਤਾਵਾਂ ਨੇ ਵੀ ਉਸੇ ਉਤਪਾਦ ਦੀ ਕੀਮਤ ਨੂੰ ਵਧਾਏ ਜਾਣ ਦੀ ਸ਼ਿਕਾਇਤ ਕੀਤੀ ਹੈ। ਕੁਝ ਯੂਜ਼ਰਸ ਨੇ ਲਿਖਿਆ ਹੈ ਕਿ ਆਨਲਾਈਨ ਡਿਲੀਵਰੀ ਪਲੇਟਫਾਰਮ ਨੇ ਲੁੱਟ ਮਚਾਈ ਹੋਈ ਹੈ। ਇਸ ਦੇ ਨਾਲ ਹੀ ਇੱਕ ਹੋਰ ਯੂਜ਼ਰ ਨੇ ਲਿਖਿਆ ਅਤੇ ਟਿੱਪਣੀ ਕੀਤੀ ਕਿ ਰੈਸਟੋਰੈਂਟ ਮਾਲਕਾਂ ਨੂੰ ਮੀਨੂ ਨੂੰ ਪਹਿਲਾਂ ਵਾਂਗ ਹੀ ਰੱਖਣਾ ਚਾਹੀਦਾ ਹੈ ਅਤੇ ਆਪਣਾ ਚਾਰਜ ਵੱਖਰਾ ਲੈਣਾ ਚਾਹੀਦਾ ਹੈ। ਘੱਟੋ-ਘੱਟ ਉਪਭੋਗਤਾਵਾਂ ਨੂੰ ਇਸ ਨਾਲ ਕੋਈ ਸ਼ਿਕਾਇਤ ਨਹੀਂ ਹੋਵੇਗੀ।

Zomato ਨੇ ਦਿੱਤਾ ਇਹ ਜਵਾਬ
ਇਸ ਸਭ ਤੋਂ ਬਾਅਦ ਜ਼ੋਮੈਟੋ ਦੀ ਵੀ ਵਾਇਰਲ ਪੋਸਟ 'ਤੇ ਨਜ਼ਰ ਪਈ ਹੈ। ਇਸ 'ਤੇ ਜਵਾਬ ਦਿੰਦੇ ਹੋਏ ਜ਼ੋਮੈਟੋ ਨੇ ਲਿਖਿਆ ਹੈ ਕਿ ਜ਼ੋਮੈਟੋ ਗਾਹਕ ਅਤੇ ਰੈਸਟੋਰੈਂਟ ਵਿਚਕਾਰ ਇੱਕ ਵਿਚੋਲੇ ਪਲੇਟਫਾਰਮ ਵਜੋਂ ਕੰਮ ਕਰਦਾ ਹੈ। ਸਾਡੇ ਪਲੇਟਫਾਰਮ ਦਾ ਸਾਡੇ ਸੰਬੰਧਿਤ ਰੈਸਟੋਰੈਂਟ ਭਾਈਵਾਲਾਂ ਦੁਆਰਾ ਲਾਗੂ ਕੀਤੀਆਂ ਦਰਾਂ 'ਤੇ ਕੋਈ ਨਿਯੰਤਰਣ ਨਹੀਂ ਹੈ। ਅਸੀਂ ਤੁਹਾਡਾ ਫੀਡਬੈਕ ਰੈਸਟੋਰੈਂਟ ਪਾਰਟਨਰ ਤੱਕ ਪਹੁੰਚਾ ਦਿੱਤਾ ਹੈ ਅਤੇ ਉਨ੍ਹਾਂ ਨੂੰ ਇਸ 'ਤੇ ਗੌਰ ਕਰਨ ਦੀ ਬੇਨਤੀ ਕੀਤੀ ਹੈ।