ਵਿੱਤੀ ਖੁਸ਼ਕੀ: ਬਾਜ਼ਾਰ ਤੋਂ 5.03 ਲੱਖ ਕਰੋੜ ਰੁਪਏ ਉਧਾਰ ਲਵੇਗੀ ਮੋਦੀ ਸਰਕਾਰ

ਕੇਂਦਰ ਸਰਕਾਰ ਚਾਲੂ ਵਿੱਤੀ ਸਾਲ 2021-22 ਦੀ ਦੂਜੀ ਛਿਮਾਹੀ ਵਿੱਚ ਬਾਜ਼ਾਰ ਤੋਂ 5.03 ਲੱਖ ਕਰੋੜ ਰੁਪਏ ਉਧਾਰ ਲਵੇਗੀ। ਵਿੱਤ ਮੰਤਰਾਲੇ (Finance ministry) ਨੇ ਸੋਮਵਾਰ ਨੂੰ ਕਿਹਾ ਕਿ ਇਹ ਕਰਜ਼ਾ ਮਾਲੀਏ ਦੀ ਘਾਟ ਦੀ ਪੂਰਤੀ ਲਈ ਲਿਆ ਜਾਵੇਗਾ।

ਮੰਤਰਾਲੇ ਨੇ ਕਿਹਾ ਕਿ ਸਰਕਾਰ ਮਹਾਂਮਾਰੀ ਨਾਲ ਪ੍ਰਭਾਵਿਤ ਅਰਥ ਵਿਵਸਥਾ ਨੂੰ ਮੁੜ ਸੁਰਜੀਤ ਕਰਨ ਲਈ ਇਹ ਕਰਜ਼ਾ ਲਵੇਗੀ। ਇਸ ਤੋਂ ਪਹਿਲਾਂ, ਪਹਿਲੀ ਛਿਮਾਹੀ ਵਿੱਚ ਸਰਕਾਰ ਨੇ ਬਾਂਡ ਜਾਰੀ ਕਰਕੇ 7.02 ਲੱਖ ਕਰੋੜ ਰੁਪਏ ਜੁਟਾਏ ਸਨ।

ਮੰਤਰਾਲੇ ਨੇ ਕਿਹਾ, “ਆਮ ਬਜਟ ਦੇ ਮੌਜੂਦਾ ਵਿੱਤੀ ਸਾਲ ਲਈ ਲਗਭਗ 12.05 ਲੱਖ ਕਰੋੜ ਰੁਪਏ ਦਾ ਕੁੱਲ ਕਰਜ਼ਾ ਲੈਣ ਦਾ ਅਨੁਮਾਨ ਲਗਾਇਆ ਗਿਆ ਸੀ। ਇਸ ਵਿੱਚੋਂ 60 ਫ਼ੀਸਦੀ ਯਾਨੀ 7.24 ਲੱਖ ਕਰੋੜ ਰੁਪਏ ਦੇ ਕਰਜ਼ੇ ਨੂੰ ਪਹਿਲੀ ਛਿਮਾਹੀ ਵਿੱਚ ਜੁਟਾਉਣ ਦੀ ਯੋਜਨਾ ਸੀ। ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਪਹਿਲੀ ਛਿਮਾਹੀ ਵਿੱਚ 7.02 ਲੱਖ ਕਰੋੜ ਰੁਪਏ ਦਾ ਕਰਜ਼ਾ ਲਿਆ ਗਿਆ ਹੈ। ਹੁਣ ਸਰਕਾਰ ਬਾਕੀ 5.03 ਲੱਖ ਕਰੋੜ ਰੁਪਏ ਦਾ ਕਰਜ਼ਾ ਦੂਜੇ ਅੱਧ ਵਿੱਚ ਲੈਣ ਦੀ ਯੋਜਨਾ ਬਣਾ ਰਹੀ ਹੈ।

ਸ਼ੁੱਧ ਕਰਜ਼ਾ 9.37 ਲੱਖ ਕਰੋੜ ਰੁਪਏ ਰਹਿ ਸਕਦਾ ਹੈ
ਦੂਜੇ ਅੱਧ ਦੇ ਕਰਜ਼ੇ ਦੇ ਅਨੁਮਾਨ ਵਿੱਚ ਜੀਐਸਟੀ ਮੁਆਵਜ਼ੇ ਦੇ ਬਦਲੇ ਬੈਕ-ਟੂ-ਬੈਕ ਕ੍ਰੈਡਿਟ ਸਹੂਲਤ ਅਧੀਨ ਰਾਜਾਂ ਨੂੰ ਬਕਾਇਆ ਰਾਸ਼ੀ ਜਾਰੀ ਕਰਨ ਦੀ ਜ਼ਰੂਰਤ ਵੀ ਸ਼ਾਮਲ ਹੈ। ਬਜਟ 2021-22 ਦੇ ਅਨੁਸਾਰ, ਮੌਜੂਦਾ ਵਿੱਤੀ ਸਾਲ ਵਿੱਚ ਸਰਕਾਰ ਦਾ ਕੁੱਲ ਕਰਜ਼ਾ 12.05 ਲੱਖ ਕਰੋੜ ਰੁਪਏ ਹੋਣ ਦਾ ਅਨੁਮਾਨ ਹੈ। ਇਸ ਦੇ ਨਾਲ ਹੀ, ਸ਼ੁੱਧ ਕਰਜ਼ਾ 9.37 ਲੱਖ ਕਰੋੜ ਰੁਪਏ ਹੋਣ ਦਾ ਅਨੁਮਾਨ ਹੈ।

ਇਕ ਰਿਪੋਰਟ ਦੇ ਅਨੁਸਾਰ, ਸਰਕਾਰ ਰਿਜ਼ਰਵ ਬੈਂਕ ਨਾਲ ਉਧਾਰ ਲੈਣ ਦੇ ਪ੍ਰੋਗਰਾਮ ਨੂੰ ਤੈਅ ਕਰਨ ਦੇ ਲਈ ਗੱਲਬਾਤ ਕਰ ਰਹੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਸਰਕਾਰ 23,000-24,000 ਕਰੋੜ ਰੁਪਏ ਦੀਆਂ 21 ਹਫਤਾਵਾਰੀ ਕਿਸ਼ਤਾਂ ਵਿੱਚ ਰਕਮ ਜੁਟਾਏਗੀ। ਪਹਿਲੀ ਛਿਮਾਹੀ ਦੇ ਦੌਰਾਨ, ਸਰਕਾਰ ਨੇ 6.19%ਦੀ ਔਸਤਨ ਉਪਜ ਤੇ ਬਾਂਡ ਜਾਰੀ ਕੀਤੇ।