UP: ਕੂੜੇ ਵਾਲੀ ਗੱਡੀ 'ਚੋਂ ਮਿਲੇ ਬੈਲਟ ਪੇਪਰ ਨਾਲ ਭਰੇ 3 ਵੱਡੇ ਬਕਸੇ, ਹੰਗਾਮਾ 'ਤੇ ਕੁਲੈਕਟਰ ਨੇ ਕੀਤਾ ਵੱਡਾ ਖੁਲਾਸਾ

ਉੱਤਰ ਪ੍ਰਦੇਸ਼ ਵਿਧਾਨ ਸਭਾ ਚੋਣ 2022 ਲਈ ਵੋਟਿੰਗ ਪੂਰੀ ਹੋਣ ਤੋਂ ਬਾਅਦ ਹੁਣ ਸਾਰਿਆਂ ਨੂੰ 10 ਮਾਰਚ ਦਾ ਇੰਤਜ਼ਾਰ ਹੈ। ਇਸ ਦਿਨ ਚੋਣ ਨਤੀਜੇ ਆਉਣੇ ਹਨ ਪਰ ਇਸ ਤੋਂ ਪਹਿਲਾਂ ਬਰੇਲੀ ਵਿੱਚ ਇੱਕ ਵੱਡਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਇੱਕ ਕੂੜਾ ਢੋਣ ਵਾਲੀ ਗੱਡੀ ਵਿੱਚੋਂ ਵੱਡੀ ਮਾਤਰਾ ਵਿੱਚ ਬੈਲਟ ਪੇਪਰ ਬਰਾਮਦ ਹੋਏ ਹਨ।

ਕੂੜੇ ਦੇ ਢੇਰ ਵਿੱਚੋਂ 3 ਵੱਡੇ ਬਕਸਿਆਂ ਵਿੱਚ ਬੈਲਟ ਪੇਪਰ ਮਿਲੇ ਹਨ। ਇਸ ਤੋਂ ਬਾਅਦ ਸਮਾਜਵਾਦੀ ਪਾਰਟੀ ਦੇ ਆਗੂਆਂ ਤੇ ਵਰਕਰਾਂ ਨੇ ਹੰਗਾਮਾ ਕਰ ਦਿੱਤਾ। ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦਿਆਂ ਡੀਐਮ ਅਤੇ ਐਸਐਸਪੀ ਸਮੇਤ ਵੱਡੀ ਗਿਣਤੀ ਵਿੱਚ ਪੁਲਿਸ ਮੌਕੇ ’ਤੇ ਪੁੱਜੀ ਅਤੇ ਕਿਸੇ ਤਰ੍ਹਾਂ ਹੰਗਾਮਾ ਸ਼ਾਂਤ ਕਰਵਾਇਆ। ਵੱਡੀ ਮਾਤਰਾ ਵਿੱਚ ਬੈਲਟ ਪੇਪਰ ਮਿਲਣ ਦੀਆਂ ਸ਼ਿਕਾਇਤਾਂ ਚੋਣ ਕਮਿਸ਼ਨ ਨੂੰ ਵੀ ਕੀਤੀਆਂ ਗਈਆਂ ਹਨ।

ਜਾਣਕਾਰੀ ਮੁਤਾਬਕ ਬਰੇਲੀ 'ਚ ਗਿਣਤੀ ਵਾਲੀ ਥਾਂ ਦੇ ਬਾਹਰ ਕੂੜੇ ਦੇ ਢੇਰ 'ਚ ਬੈਲਟ ਪੇਪਰ ਨਾਲ ਭਰੇ 3 ਬਕਸੇ ਮਿਲਣ ਕਾਰਨ ਹੜਕੰਪ ਮਚ ਗਿਆ। ਸੈਂਕੜਿਆਂ ਦੀ ਗਿਣਤੀ ਵਿੱਚ ਮੌਕੇ ’ਤੇ ਪੁੱਜੇ ਸਮਾਜਵਾਦੀ ਪਾਰਟੀ ਦੇ ਆਗੂਆਂ ਨੇ ਹੰਗਾਮਾ ਕਰ ਦਿੱਤਾ।

ਬਹੇੜੀ ਨਗਰ ਪਾਲਿਕਾ ਦੇ ਕੂੜਾ ਕਰਕਟ ਵਿੱਚ ਪਰਸਾਖੇੜਾ ਸਥਿਤ ਗੋਦਾਮ ਨੇੜਿਓਂ ਬੈਲਟ ਪੇਪਰ ਨਾਲ ਭਰੀਆਂ 3 ਪੇਟੀਆਂ ਬਰਾਮਦ ਹੋਈਆਂ ਹਨ। ਸਾਰੇ ਈਵੀਐਮ ਅਤੇ ਬੈਲਟ ਪੇਪਰ ਇਸ ਥਾਂ 'ਤੇ ਰੱਖੇ ਗਏ ਹਨ। ਇੱਥੇ 10 ਮਾਰਚ ਨੂੰ ਵੋਟਾਂ ਦੀ ਗਿਣਤੀ ਹੋਣੀ ਹੈ।

ਦੱਸਿਆ ਜਾ ਰਿਹਾ ਹੈ ਕਿ ਬਾਹਰੀ ਵਿਧਾਨ ਸਭਾ ਤੋਂ ਕੂੜਾ ਚੁੱਕਣ ਵਾਲੀ ਗੱਡੀ ਆਈ ਸੀ। ਜਿਵੇਂ ਹੀ ਸਮਾਜਵਾਦੀ ਪਾਰਟੀ ਦੇ ਆਗੂਆਂ ਨੇ ਗੱਡੀ ਦੀ ਜਾਂਚ ਕੀਤੀ ਤਾਂ ਉਸ ਵਿੱਚ ਬੈਲਟ ਪੇਪਰਾਂ ਨਾਲ ਭਰੇ 3 ਬਕਸੇ ਮਿਲੇ। ਇਸ ਤੋਂ ਬਾਅਦ ਹੰਗਾਮਾ ਸ਼ੁਰੂ ਕਰ ਦਿੱਤਾ।

ਕੁਲੈਕਟਰ ਨੇ ਮੰਨੀ ਗਲਤੀ
ਹੰਗਾਮੇ ਤੋਂ ਬਾਅਦ ਡੀਐਮ ਸ਼ਿਵਕਾਂਤ ਦਿਵੇਦੀ ਨੇ ਕਿਹਾ ਕਿ ਇਹ ਆਰ.ਓ. ਦੀ ਗਲਤੀ ਸੀ। ਉਸ ਨੇ ਕੂੜਾ ਕਰਕਟ ਵਿੱਚ ਚੋਣ ਸਬੰਧੀ ਸਮੱਗਰੀ ਭੇਜੀ ਸੀ। ਇਸ ਮਾਮਲੇ 'ਤੇ ਕੁਝ ਲੋਕਾਂ ਨੇ ਇਤਰਾਜ਼ ਵੀ ਕੀਤਾ ਸੀ ਪਰ ਹੁਣ ਉਨ੍ਹਾਂ ਨੂੰ ਬੁਲਾ ਕੇ ਗੱਲ ਕੀਤੀ ਗਈ ਹੈ। ਕੁਲੈਕਟਰ ਨੇ ਕਿਹਾ ਕਿ ਹੁਣ ਕੋਈ ਸਮੱਸਿਆ ਨਹੀਂ ਹੈ। ਇਸ ਮਾਮਲੇ ਵਿੱਚ ਜੋ ਵੀ ਦੋਸ਼ੀ ਹੋਵੇਗਾ, ਉਸ ਖ਼ਿਲਾਫ਼ ਕਾਰਵਾਈ ਕੀਤੀ ਜਾਵੇਗੀ।

ਸਪਾ ਉਮੀਦਵਾਰ ਦੇ ਗੰਭੀਰ ਦੋਸ਼
ਬਾਹੇੜੀ ਸੀਟ ਤੋਂ ਸਪਾ ਉਮੀਦਵਾਰ ਅਤਾਉਰ ਰਹਿਮਾਨ ਦਾ ਕਹਿਣਾ ਹੈ ਕਿ ਸਾਨੂੰ ਪਹਿਲਾਂ ਹੀ ਸਰਕਾਰ ਅਤੇ ਪ੍ਰਸ਼ਾਸਨ 'ਤੇ ਭਰੋਸਾ ਨਹੀਂ ਹੈ। ਇਸ ਲਈ ਅਸੀਂ ਇੱਥੇ ਸਪਾ ਆਗੂਆਂ ਦੀ ਡਿਊਟੀ ਲਗਾਈ ਹੈ। ਪ੍ਰਸ਼ਾਸਨ ਨੇ ਕੈਮਰੇ ਵੀ ਲਾਏ ਹੋਏ ਹਨ ਅਤੇ ਅਸੀਂ ਵੀ ਕੈਮਰੇ ਲਗਵਾਏ ਹਨ। ਉਸ ਦਾ ਕਹਿਣਾ ਹੈ ਕਿ ਗਿਣਤੀ ਵਾਲੀ ਥਾਂ ਦੇ ਅੰਦਰ ਵਾਹਨ ਲਗਾਤਾਰ ਜਾ ਰਹੇ ਹਨ, ਜਿਸ ਦਾ ਕੋਈ ਹਿਸਾਬ ਨਹੀਂ ਹੈ।