ਖੇਤੀ ਮੰਤਰੀ ਤੋਮਰ ਦੇ ਵਿਰੋਧ ਮਗਰੋਂ ਕੁਲੈਕਟਰ ਤੇ ਐੱਸਪੀ ਦਾ ਤਬਾਦਲਾ

ਮੱਧ ਪ੍ਰਦੇਸ਼ ਦੇ ਸ਼ਿਓਪੁਰ ਜ਼ਿਲ੍ਹੇ ਦੇ ਹੜ੍ਹ ਪ੍ਰਭਾਵਿਤ ਖੇਤਰਾਂ ਦੇ ਦੌਰੇ ਦੌਰਾਨ ਕੇਂਦਰੀ ਖੇਤੀਬਾੜੀ ਮੰਤਰੀ ਨਰੇਂਦਰ ਸਿੰਘ ਤੋਮਰ ਨੂੰ ਸਥਾਨਕ ਲੋਕਾਂ ਦੇ ਵਿਰੋਧ ਦਾ ਸਾਹਮਣਾ ਕਰਨਾ ਪਿਆ ਸੀ। ਇਸ ਤੋਂ ਇੱਕ ਦਿਨ ਬਾਅਦ ਮੱਧ ਪ੍ਰਦੇਸ਼ ਸਰਕਾਰ ਨੇ ਜ਼ਿਲ੍ਹਾ ਕੁਲੈਕਟਰ ਅਤੇ ਐੱਸਪੀ ਦਾ ਤਬਾਦਲਾ ਕਰ ਦਿੱਤਾ ਹੈ। ਹਾਲਾਂਕਿ ਇਨ੍ਹਾਂ ਅਧਿਕਾਰੀਆਂ ਦੇ ਤਬਾਦਲੇ ਦਾ ਕਾਰਨ ਹੜ੍ਹਾਂ ਕਾਰਨ ਬਣੇ ਹਾਲਾਤ ਨਾਲ ਨਜਿੱਠਣ ਵਿਚ ਨਕਾਮੀ ਦੱਸਿਆ ਜਾ ਰਿਹਾ ਹੈ।

ਕੇਂਦਰੀ ਮੰਤਰੀ ਤੋਮਰ ਜਦੋਂ ਸ਼ਿਓਪੁਰ ਸ਼ਹਿਰ ਦੇ ਕਰੇਸ਼ੀਆ ਬਾਜ਼ਾਰ ਦਾ ਦੌਰਾ ਕਰਨ ਆਏ ਸਨ ਤਾਂ ਉਨ੍ਹਾਂ ਨੂੰ ਲੋਕਾਂ ਦੇ ਵਿਰੋਧ ਦਾ ਸਾਹਮਣਾ ਕਰਨਾ ਪਿਆ ਸੀ। ਇਹ ਖੇਤਰ ਕੇਂਦਰੀ ਮੰਤਰੀ ਦੇ ਲੋਕ ਸਭਾ ਹਲਕੇ ਮੋਰੇਨਾ ਵਿਚ ਪੈਂਦਾ ਹੈ।

ਪ੍ਰਤੱਖਦਰਸ਼ੀਆਂ ਦਾ ਕਹਿਣਾ ਹੈ ਕਿ ਕੁੱਝ ਲੋਕਾਂ ਵੱਲੋਂ ਤੋਮਰ ਦੇ ਕਾਫ਼ਲੇ ਦੀਆਂ ਗੱਡੀਆਂ ’ਤੇ ਚਿੱਕੜ ਵੀ ਸੁੱਟਿਆ ਗਿਆ ਸੀ। ਜਾਰੀ ਆਦੇਸ਼ ਵਿੱਚ ਮੱਧ ਪ੍ਰਦੇਸ਼ ਸਰਕਾਰ ਨੇ ਸ਼ਿਓਪੁਰ ਜ਼ਿਲ੍ਹਾ ਕੁਲੈਕਟਰ ਰਾਕੇਸ਼ ਸ੍ਰੀਵਾਸਤਵ ਨੂੰ ਸੂਬਾ ਸਕੱਤਰੇਤ ਵਿਚ ਡਿਪਟੀ ਸਕੱਤਰ ਲਾ ਦਿੱਤਾ ਹੈ।

#WATCH | Madhya Pradesh: Locals stage a demonstration during Union Agriculture Minister Narendra Singh Tomar's visit to flood-affected Sheopur city, alleging inadequate relief measures pic.twitter.com/jldcBCiG5k

— ANI (@ANI) August 7, 2021

ਉਨ੍ਹਾਂ ਦੀ ਥਾਂ ਗਵਾਲੀਅਰ ਨਗਰ ਨਿਗਮ ਦੇ ਕਮਿਸ਼ਨਰ ਸ਼ਿਵਮ ਵਰਮਾ ਨੂੰ ਸ਼ਿਓਪੁਰ ਦਾ ਕੁਲੈਕਟਰ ਲਾਇਆ ਗਿਆ ਹੈ। ਇੱਕ ਹੋਰ ਆਦੇਸ਼ ਵਿੱਚ ਸ਼ਿਓਪੁਰ ਦੇ ਐੱਸਪੀ ਸੰਪਤ ਉਪਾਧਿਆਇ ਨੂੰ ਪੁਲਿਸ ਹੈੱਡਕੁਆਰਟਰ ਵਿੱਚ ਏਆਈਜੀ ਲਾਇਆ ਗਿਆ, ਜਦੋਂਕਿ ਗਵਾਲੀਅਰ ਦੇ ਏਆਈਜੀ ਅਨੁਰਾਗ ਸੁਜਾਨੀਆ ਨੂੰ ਸ਼ਿਓਪੁਰ ਦਾ ਐੱਸਪੀ ਨਿਯੁਕਤ ਕੀਤਾ ਗਿਆ ਹੈ।