ਸਿਵਲ ਡਿਫੈਂਸ ਤੇ ਰੇਲਵੇ 'ਚ ਸਭ ਤੋਂ ਜ਼ਿਆਦਾ ਖਾਲੀ ਵੈਕੇਂਸੀ, ਗਰੁੱਪ C ਦੀਆਂ ਸਾਢੇ ਸੱਤ ਲੱਖ ਤੋਂ ਵੱਧ ਅਸਾਮੀਆਂ 'ਤੇ ਹੋਵੇਗੀ ਭਰਤੀ

ਨਵੀਂ ਦਿੱਲੀ- ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਨੌਕਰੀਆਂ ਦੀ ਤਲਾਸ਼ ਕਰਨ ਵਾਲੇ ਲੋਕਾਂ ਨੂੰ ਖੁਸ਼ਖਬਰੀ ਦਿੱਤੀ ਹੈ। ਕੇਂਦਰ ਸਰਕਾਰ ਨੇ ਅਗਲੇ ਡੇਢ ਸਾਲ ਵਿੱਚ 10 ਲੱਖ ਅਸਾਮੀਆਂ ਦੀ ਭਰਤੀ ਕਰਨ ਦਾ ਐਲਾਨ ਕੀਤਾ ਹੈ। ਇਹ ਭਰਤੀਆਂ ਕੇਂਦਰ ਸਰਕਾਰ ਦੇ ਵੱਖ-ਵੱਖ ਵਿਭਾਗਾਂ ਅਤੇ ਮੰਤਰਾਲਿਆਂ ਵਿੱਚ ਕੀਤੀਆਂ ਜਾਣਗੀਆਂ। ਪੀਐਮ ਮੋਦੀ ਨੇ ਇਨ੍ਹਾਂ ਭਰਤੀਆਂ ਨੂੰ ਮਿਸ਼ਨ ਮੋਡ ਵਿੱਚ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ। ਸਰਕਾਰ ਨੇ ਇਸ ਸਾਲ ਦੇ ਸ਼ੁਰੂ ਵਿੱਚ ਸੰਸਦ ਨੂੰ ਦੱਸਿਆ ਸੀ ਕਿ 1 ਮਾਰਚ, 2020 ਤੱਕ ਕੇਂਦਰ ਸਰਕਾਰ ਦੇ ਵੱਖ-ਵੱਖ ਵਿਭਾਗਾਂ ਵਿੱਚ 8.72 ਲੱਖ ਅਸਾਮੀਆਂ ਖਾਲੀ ਸਨ। ਦੱਸ ਦੇਈਏ ਕਿ ਸਰਕਾਰੀ ਨੌਕਰੀਆਂ ਵਿੱਚ ਕਿੰਨੀਆਂ ਅਸਾਮੀਆਂ ਮਨਜ਼ੂਰ ਹਨ ਅਤੇ ਕਿਸ ਵਿਭਾਗ ਵਿੱਚ ਕਿੰਨੀਆਂ ਅਸਾਮੀਆਂ ਭਰਤੀ ਦੀ ਉਡੀਕ ਵਿੱਚ ਹਨ। ਨਾਲ ਹੀ, ਕਿਸ ਗਰੁੱਪ ਲਈ, ਕਿੰਨੀਆਂ ਅਸਾਮੀਆਂ ਲਈ ਭਰਤੀ ਕੀਤੀ ਜਾਣੀ ਹੈ।

ਪਰਸੋਨਲ ਰਾਜ ਮੰਤਰੀ ਜਿਤੇਂਦਰ ਸਿੰਘ ਨੇ ਇਸ ਸਾਲ ਫਰਵਰੀ-ਮਾਰਚ ਵਿੱਚ ਸੰਸਦ ਨੂੰ ਦੱਸਿਆ ਸੀ ਕਿ 1 ਮਾਰਚ, 2020 ਤੱਕ ਕੇਂਦਰ ਸਰਕਾਰ ਦੇ ਵੱਖ-ਵੱਖ ਵਿਭਾਗਾਂ ਵਿੱਚ 8,72,243 ਅਸਾਮੀਆਂ ਖਾਲੀ ਸਨ। 1 ਮਾਰਚ 2019 ਤੱਕ ਖਾਲੀ ਅਸਾਮੀਆਂ ਦੀ ਗਿਣਤੀ 9,10,153 ਸੀ। ਇਸ ਤੋਂ ਪਹਿਲਾਂ 1 ਮਾਰਚ 2018 ਤੱਕ 6,83,823 ਅਸਾਮੀਆਂ ਖਾਲੀ ਸਨ। ਤਿੰਨ ਵੱਡੀਆਂ ਏਜੰਸੀਆਂ SSC, UPSC ਅਤੇ RRB ਨੇ 2018-19 ਅਤੇ 2020-21 ਦੌਰਾਨ 2,65,468 ਭਰਤੀਆਂ ਕੀਤੀਆਂ ਹਨ।

ਰੇਲਵੇ 'ਚ 2.3 ਲੱਖ ਅਸਾਮੀਆਂ ਭਰਤੀ ਦੀ ਉਡੀਕ ਕਰ ਰਹੀਆਂ ਹਨ

ਕੇਂਦਰ ਸਰਕਾਰ ਨੇ 40 ਲੱਖ ਤੋਂ ਵੱਧ ਅਸਾਮੀਆਂ ਮਨਜ਼ੂਰ ਕੀਤੀਆਂ ਹਨ, ਪਰ ਮੁਲਾਜ਼ਮਾਂ ਦੀ ਗਿਣਤੀ 32 ਲੱਖ ਤੋਂ ਘੱਟ ਹੈ। ਸਾਲਾਂ ਤੋਂ ਖਾਲੀ ਪਈਆਂ ਇਨ੍ਹਾਂ ਅਸਾਮੀਆਂ ਨੂੰ ਭਰਨ ਦੇ ਯਤਨ ਕੀਤੇ ਜਾ ਰਹੇ ਹਨ, ਪਰ ਸਫ਼ਲਤਾ ਨਹੀਂ ਮਿਲੀ। ਜ਼ਿਆਦਾਤਰ ਅਸਾਮੀਆਂ ਵੱਡੇ ਮੰਤਰਾਲਿਆਂ ਅਤੇ ਵਿਭਾਗਾਂ ਜਿਵੇਂ ਕਿ ਡਾਕ, ਰੱਖਿਆ (ਸਿਵਲ), ਰੇਲਵੇ ਅਤੇ ਮਾਲੀਆ ਵਿੱਚ ਹਨ। ਨਿਊਜ਼ 18 ਦੇ ਅਨੁਸਾਰ, ਰੇਲਵੇ ਵਿੱਚ ਲਗਭਗ 15 ਲੱਖ ਮਨਜ਼ੂਰ ਅਸਾਮੀਆਂ ਹਨ, ਜਦੋਂ ਕਿ ਰੇਲ ਮੰਤਰਾਲੇ ਵਿੱਚ ਲਗਭਗ 2.3 ਲੱਖ ਅਸਾਮੀਆਂ ਖਾਲੀ ਹਨ।



ਸਿਵਲ ਡਿਫੈਂਸ 'ਚ 2.5 ਲੱਖ ਅਸਾਮੀਆਂ ਖਾਲੀ!

ਇਸੇ ਤਰ੍ਹਾਂ ਰੱਖਿਆ (ਸਿਵਲ) ਵਿਭਾਗ ਵਿੱਚ ਕਰੀਬ 6.33 ਲੱਖ ਮੁਲਾਜ਼ਮਾਂ ਦੀਆਂ ਮਨਜ਼ੂਰ ਅਸਾਮੀਆਂ ਦੇ ਮੁਕਾਬਲੇ 2.5 ਲੱਖ ਦੇ ਕਰੀਬ ਅਸਾਮੀਆਂ ਖਾਲੀ ਹਨ। ਡਾਕ ਵਿਭਾਗ ਵਿੱਚ ਕੁੱਲ ਮਨਜ਼ੂਰ ਅਸਾਮੀਆਂ ਦੀ ਗਿਣਤੀ 2.67 ਲੱਖ ਹੈ, ਜਦੋਂ ਕਿ ਕਰੀਬ 90,000 ਅਸਾਮੀਆਂ ਖਾਲੀ ਪਈਆਂ ਹਨ। ਇਸੇ ਤਰ੍ਹਾਂ ਮਾਲ ਵਿਭਾਗ ਵਿੱਚ 1.78 ਲੱਖ ਮੁਲਾਜ਼ਮਾਂ ਦੀਆਂ ਮਨਜ਼ੂਰ ਅਸਾਮੀਆਂ ਹਨ, ਜਿਨ੍ਹਾਂ ਵਿੱਚੋਂ ਕਰੀਬ 74,000 ਅਸਾਮੀਆਂ ਭਰਨ ਦੀ ਉਡੀਕ ਕਰ ਰਹੀਆਂ ਹਨ। ਗ੍ਰਹਿ ਮੰਤਰਾਲੇ ਵਿੱਚ ਮਨਜ਼ੂਰ 10.8 ਲੱਖ ਅਸਾਮੀਆਂ ਦੇ ਮੁਕਾਬਲੇ ਲਗਭਗ 1.3 ਲੱਖ ਅਸਾਮੀਆਂ ਖਾਲੀ ਹਨ।

ਵੇਖੋ, ਕਿੱਥੇ ਕਿੰਨੀ ਅਸਾਮੀਆਂ ਖਾਲੀ ਹਨ-

ਸਿਵਲ ਡਿਫੈਂਸ - 2.47 ਲੱਖ

ਰੇਲਵੇ - 2.37 ਲੱਖ

ਗ੍ਰਹਿ ਮੰਤਰਾਲਾ - 1.28 ਲੱਖ

ਡਾਕ ਵਿਭਾਗ - 90,050

ਮਾਲ ਵਿਭਾਗ - 74,000

ਆਡਿਟ, ਲੇਖਾ ਵਿਭਾਗ - 28,237

TOI ਦੀ ਇੱਕ ਰਿਪੋਰਟ ਦੇ ਅਨੁਸਾਰ, ਸਰਕਾਰ ਦੇ ਸਾਰੇ ਵਿਭਾਗਾਂ ਵਿੱਚ ਮਨਜ਼ੂਰ ਅਸਾਮੀਆਂ ਦੀ ਗਿਣਤੀ ਲਗਭਗ 40.05 ਲੱਖ ਹੈ। 1 ਮਾਰਚ, 2020 ਤੱਕ ਖਾਲੀ ਪਈਆਂ 8.72 ਲੱਖ ਅਸਾਮੀਆਂ ਵਿੱਚੋਂ, ਗਰੁੱਪ ਸੀ ਪੱਧਰ 'ਤੇ ਸਭ ਤੋਂ ਵੱਧ ਅਸਾਮੀਆਂ ਖਾਲੀ ਹਨ, ਜੋ ਲਗਭਗ 7.56 ਲੱਖ ਹਨ। ਇਸ ਤੋਂ ਬਾਅਦ ਗਰੁੱਪ ਬੀ ਵਿੱਚ 94,842 ਅਤੇ ਗਰੁੱਪ ਏ ਵਿੱਚ 21,255 ਅਸਾਮੀਆਂ ਦੀ ਉਡੀਕ ਹੈ।