ਕਰਵਾਚੌਥ ਦੀਆਂ ਥਾਲੀਆਂ ਚੁੱਕ ਕੇ ਭੱਜਿਆ ਚੋਰ ਪੁਲਿਸ ਨੇ 3 ਘੰਟਿਆਂ ਵਿਚ ਕੀਤਾ ਕਾਬੂ

ਰਾਜਧਾਨੀ ਦਿੱਲੀ 'ਚ ਕਰਵਾਚੌਥ ਦੇ ਮੌਕੇ 'ਤੇ ਕਰਵਾ ਚੌਥ ਦੀਆਂ ਥਾਲੀਆਂ ਚੋਰੀ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਦਿੱਲੀ ਦੇ ਸਦਰ ਬਾਜ਼ਾਰ ਇਲਾਕੇ ਤੋਂ ਇੱਕ ਚੋਰ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਜਿਸ ਨੇ ਕਰਵਾਚੌਥ ਗਿਫਟ ਹੈਂਪਰ ਦੀਆਂ ਥਾਲੀਆਂ ਚੋਰੀ ਕੀਤੀਆਂ ਸਨ। ਮੁਲਜ਼ਮ ਦਾ ਨਾਂ ਨਵਨੀਤ ਕੁਮਾਰ ਹੈ, ਜਿਸ ਨੂੰ ਨੋਇਡਾ ਤੋਂ ਗ੍ਰਿਫਤਾਰ ਕੀਤਾ ਗਿਆ ਹੈ। ਪੁਲਿਸ ਮੁਤਾਬਕ ਮੁਲਜ਼ਮ ਨੂੰ ਸੀਸੀਟੀਵੀ ਦੀ ਮਦਦ ਨਾਲ ਫੜ ਲਿਆ ਗਿਆ ਹੈ।

ਉੱਤਰੀ ਦਿੱਲੀ ਦੇ ਡੀਸੀਪੀ ਸਾਗਰ ਸਿੰਘ ਕਲਸੀ ਅਨੁਸਾਰ 12 ਅਕਤੂਬਰ ਨੂੰ ਸ਼ਿਕਾਇਤਕਰਤਾ ਨਰੇਸ਼ ਕੁਮਾਰ ਗੁਪਤਾ ਵਾਸੀ ਮੰਡਾਵਲੀ ਨੇ ਦੋਸ਼ ਲਾਇਆ ਸੀ ਕਿ ਉਹ ਸਦਰ ਮਾਰਕੀਟ ਵਿੱਚ ਖਰੀਦਦਾਰੀ ਕਰਨ ਲਈ ਆਇਆ ਸੀ ਅਤੇ 20 ਸੈੱਟ ਸਜਾਵਟੀ ਕਰਵਾਚੌਥ ਪਲੇਟ ਹੈਂਪਰ ਖਰੀਦ ਕੇ ਪਾਰਕਿੰਗ ਵਿੱਚ ਬੋਰੀ ਵਿੱਚ ਰੱਖ ਲਏ ਸਨ।

ਉਹ ਬੋਰੀ ਕਿਸੇ ਨੇ ਚੋਰੀ ਕਰ ਲਈ। ਪੁਲਿਸ ਨੇ ਚੋਰੀ ਦਾ ਮਾਮਲਾ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਤਿੰਨ ਘੰਟਿਆਂ 'ਚ ਮੁਲਜ਼ਮ ਨੂੰ ਕਾਬੂ ਕਰ ਲਿਆ ਹੈ। ਪੁਲਿਸ ਨੇ ਪਾਰਕਿੰਗ ਦੇ ਸੀਸੀਟੀਵੀ ਫੁਟੇਜ ਦੀ ਜਾਂਚ ਕੀਤੀ ਅਤੇ ਸੀਸੀਟੀਵੀ ਫੁਟੇਜ ਵਿੱਚ ਇੱਕ ਵਿਅਕਤੀ ਸ਼ਿਕਾਇਤਕਰਤਾ ਦਾ ਸਮਾਨ ਚੋਰੀ ਕਰਦਾ ਦਿਖਾਈ ਦਿੱਤਾ।

ਹੋਰ ਪੁੱਛਗਿੱਛ ਕਰਨ 'ਤੇ ਪਤਾ ਲੱਗਾ ਕਿ ਮੁਲਜ਼ਮ ਮੋਟਰਸਾਈਕਲ 'ਤੇ ਆਇਆ ਸੀ। ਸੀਸੀਟੀਵੀ ਫੁਟੇਜ ਅਤੇ ਬਾਈਕ ਦੇ ਵੇਰਵਿਆਂ ਦੇ ਆਧਾਰ 'ਤੇ ਮੁਲਜ਼ਮ ਫੜਿਆ ਗਿਆ। ਮੁਲਜ਼ਮ ਦੀ ਪਛਾਣ 28 ਸਾਲਾ ਨਵਨੀਤ ਕੁਮਾਰ ਵਜੋਂ ਹੋਈ ਹੈ।

ਪੁੱਛਗਿੱਛ ਦੌਰਾਨ ਮੁਲਜ਼ਮ ਨੇ ਦੱਸਿਆ ਕਿ ਉਸ ਦੀ ਨੋਇਡਾ ਵਿੱਚ ਕਰਿਆਨੇ ਦੀ ਦੁਕਾਨ ਹੈ ਅਤੇ ਉਹ ਸਦਰ ਮਾਰਕੀਟ ਤੋਂ ਸਾਮਾਨ ਖਰੀਦਣ ਆਇਆ ਸੀ। ਸਜਾਵਟੀ ਕਰਵਾ ਚੌਥ ਦੇ ਤੋਹਫ਼ੇ ਨਾਲ ਭਰੀ ਲਾਵਾਰਿਸ ਬੋਰੀ ਨੂੰ ਦੇਖ ਕੇ ਉਸ ਨੇ ਸੋਚਿਆ ਕਿ ਉਹ ਇਸ ਨੂੰ ਆਪਣੀ ਦੁਕਾਨ ਵਿਚ ਵੇਚ ਦੇਵੇਗਾ। ਮਾਮਲੇ ਦੀ ਅਗਲੇਰੀ ਜਾਂਚ ਜਾਰੀ ਹੈ।