RSS ਮੁਖੀ ਮੋਹਨ ਭਾਗਵਤ ਬੋਲੇ- ਮੁਸਲਮਾਨ ਵੀ ਸਾਡੀ ਸ਼ਾਖਾ ਵਿਚ ਆਉਣ, ਸਾਡੇ ਵਿਚਾਰਾਂ ਨੂੰ ਸਮਝਣ...

ਰਾਸ਼ਟਰੀ ਸਵੈ ਸੇਵਕ ਸੰਘ (RSS) ਦੇ ਮੁਖੀ ਮੋਹਨ ਭਾਗਵਤ (Mohan Bhagwat)  ਨੇ ਆਪਣੀ ਝਾਰਖੰਡ ਫੇਰੀ ਦੌਰਾਨ ਸੰਗਠਨ ਬਾਰੇ ਇੱਕ ਵੱਡੀ ਗੱਲ ਕਹੀ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਔਰਤਾਂ ਵੀ ਸੰਘ ਵਿੱਚ ਸ਼ਾਮਲ ਹੋਣਾ ਚਾਹੁੰਦੀਆਂ ਹਨ ਤਾਂ ਉਨ੍ਹਾਂ ਦਾ ਸਵਾਗਤ ਹੈ। ਮੋਹਨ ਭਾਗਵਤ ਨੇ ਕਿਹਾ ਕਿ ਆਰਐਸਐਸ ਨੂੰ ਔਰਤਾਂ ਤੋਂ ਪਰਹੇਜ਼ ਨਹੀਂ ਹੈ। ਉਨ੍ਹਾਂ ਦੱਸਿਆ ਕਿ ਔਰਤਾਂ ਪਹਿਲਾਂ ਹੀ ਰਾਸ਼ਟਰ ਸੇਵਾ ਸੰਘ ਨਾਲ ਜੁੜ ਕੇ ਕੰਮ ਕਰ ਰਹੀਆਂ ਹਨ।

ਮੋਹਨ ਭਾਗਵਤ ਨੇ ਧਨਬਾਦ ਦੇ ਤਿੰਨ ਦਿਨਾਂ ਦੌਰੇ ਦੇ ਆਖਰੀ ਦਿਨ ਰਾਜਕਮਲ ਵਿਦਿਆ ਮੰਦਰ ਵਿੱਚ ਆਯੋਜਿਤ ਇੱਕ ਪ੍ਰੋਗਰਾਮ ਵਿੱਚ ਇਹ ਗੱਲਾਂ ਕਹੀਆਂ। ਉਨ੍ਹਾਂ ਨੇ ਆਪਣੀ ਧਨਬਾਦ ਯਾਤਰਾ ਦੇ ਆਖਰੀ ਦਿਨ ਬੁੱਧੀਜੀਵੀਆਂ ਨਾਲ ਮੀਟਿੰਗ ਨੂੰ ਸੰਬੋਧਨ ਕੀਤਾ।

ਆਰਐਸਐਸ ਮੁਖੀ ਨੇ ਅੱਗੇ ਕਿਹਾ ਕਿ ਅੱਜ ਹਾਲਾਤ ਬਦਲ ਗਏ ਹਨ। ਔਰਤਾਂ, ਮਰਦਾਂ ਦੇ ਨਾਲ ਬਰਾਬਰ ਕੰਮ ਕਰ ਸਕਦੀਆਂ ਹਨ। ਇਸ ਦੇ ਨਾਲ ਹੀ ਉਨ੍ਹਾਂ ਕਿਹਾ ਕਿ ਮੁਸਲਮਾਨਾਂ ਨੂੰ ਵੀ ਸੰਘ ਦੀ ਸ਼ਾਖਾ ਵਿੱਚ ਆਉਣਾ ਚਾਹੀਦਾ ਹੈ ਅਤੇ ਆਰਐਸਐਸ ਦੇ ਵਿਚਾਰਾਂ ਨੂੰ ਸਮਝਣਾ ਚਾਹੀਦਾ ਹੈ।

ਮੋਹਨ ਭਾਗਵਤ ਨੇ ਕਿਹਾ ਕਿ ਜੇਕਰ ਮੁਸਲਿਮ ਭਾਈਚਾਰੇ ਦੇ ਲੋਕ ਆਰਐਸਐਸ ਵਿੱਚ ਸ਼ਾਮਲ ਹੋਣਾ ਚਾਹੁੰਦੇ ਹਨ ਤਾਂ ਉਹ ਸ਼ਾਮਲ ਹੋ ਸਕਦੇ ਹਨ। ਸੰਘ ਦੀ ਸ਼ਾਖਾ ਵਿੱਚ ਆਓ ਅਤੇ ਸਾਡੇ ਕੰਮ ਨੂੰ ਜਾਣੋ, ਸਾਡੇ ਵਿਚਾਰਾਂ ਨੂੰ ਸਮਝੋ। ਸੰਘ ਸੇਵਾ ਕਾਰਜ ਕਰਦਾ ਆ ਰਿਹਾ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਭਾਰਤ ਇੱਕ ਹਿੰਦੂ ਰਾਸ਼ਟਰ ਹੈ, ਇਸ ਦੇ ਲਈ ਕਿਸੇ ਸਬੂਤ ਦੀ ਲੋੜ ਨਹੀਂ ਹੈ। ਸਾਡੇ ਮੁਸਲਿਮ ਭਾਈਚਾਰੇ ਦੇ ਲੋਕ ਇੱਥੋਂ ਦੇ ਹਨ, ਅਰਬ ਤੋਂ ਨਹੀਂ ਆਏ ਹਨ। ਸਾਰੇ ਇਸ ਨਾਲ ਸਬੰਧਤ ਹਨ, ਸਾਰਿਆਂ ਦੇ ਪੂਰਵਜ ਹਿੰਦੂ ਸਨ, ਹਰ ਕਿਸੇ ਦਾ ਡੀਐਨਏ ਇੱਕੋ ਜਿਹਾ ਹੁੰਦਾ ਹੈ।

ਭਾਰਤ ਦੇ ਸਾਰੇ ਲੋਕਾਂ ਦਾ ਸਭਿਆਚਾਰ ਇੱਕੋ ਜਿਹਾ ਹੈ। ਪੂਜਾ ਕਰਨ ਦਾ ਤਰੀਕਾ ਵੱਖਰਾ ਹੋ ਸਕਦਾ ਹੈ।