ਵਿਆਹ ਲਈ ਰਾਜ਼ੀ ਨਾ ਹੋਣ 'ਤੇ ਪ੍ਰੇਮਿਕਾ ਨੂੰ ਮੌਤ ਦੇ ਘਾਟ ਉਤਾਰਿਆ, ਫਿਰ ਪ੍ਰੇਮੀ ਨੇ ਕੀਤੀ ਖੁਦਕੁਸ਼ੀ

ਗਵਾਲੀਅਰ : ਗਵਾਲੀਅਰ ਦੇ ਬੈਜਲ ਕੋਠੀ ਇਲਾਕੇ 'ਚ ਸੋਮਵਾਰ ਰਾਤ ਨੂੰ ਪ੍ਰੇਮਿਕਾ ਦੀ ਕਿਸੇ ਹੋਰ ਜਗ੍ਹਾ 'ਤੇ ਮੰਗਣੀ ਹੋਣ ਤੋਂ ਬਾਅਦ ਗੁੱਸੇ 'ਚ ਆਏ ਪ੍ਰੇਮੀ ਨੇ ਉਸ ਦੀ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ। ਘਟਨਾ ਤੋਂ ਬਾਅਦ ਪੁਲਸ ਪ੍ਰੇਮੀ ਦੀ ਭਾਲ ਕਰ ਰਹੀ ਸੀ। ਇਸ ਦੌਰਾਨ ਮੰਗਲਵਾਰ ਸਵੇਰੇ ਵੀ ਪ੍ਰੇਮੀ ਦੀ ਲਾਸ਼ ਗੋਲੇ ਕਾ ਮੰਦਰ ਇਲਾਕੇ 'ਚ ਪਈ ਮਿਲੀ। ਸ਼ੱਕ ਹੈ ਕਿ ਪ੍ਰੇਮੀ ਨੇ ਪ੍ਰੇਮਿਕਾ ਨੂੰ ਗੋਲੀ ਮਾਰ ਕੇ ਖੁਦਕੁਸ਼ੀ ਕਰ ਲਈ ਹੈ। ਸੋਮਵਾਰ ਰਾਤ ਮੁਰਾੜ ਦੇ 6 ਨੰਬਰ ਚੌਰਾਹੇ ਨੇੜੇ ਰਹਿਣ ਵਾਲੀ 21 ਸਾਲਾ ਸਾਕਸ਼ੀ ਗੁਪਤਾ ਆਪਣੀ ਭੈਣ ਨਾਲ ਮੁਰਾੜ ਤੋਂ ਸਬਜ਼ੀ ਲੈ ਕੇ ਵਾਪਸ ਆ ਰਹੀ ਸੀ। ਇਸੇ ਦੌਰਾਨ ਬੈਜਲ ਕੋਠੀ ਨੇੜੇ ਸਾਹਮਣੇ ਤੋਂ ਆ ਰਹੇ ਨਕਾਬਪੋਸ਼ ਬਾਈਕ ਸਵਾਰ ਨੇ ਸਾਕਸ਼ੀ 'ਤੇ ਗੋਲੀ ਚਲਾ ਦਿੱਤੀ। ਇਸ ਤੋਂ ਬਾਅਦ ਹਮਲਾਵਰ ਫ਼ਰਾਰ ਹੋ ਗਏ। ਆਸਪਾਸ ਦੇ ਲੋਕਾਂ ਦੀ ਸੂਚਨਾ ਤੋਂ ਬਾਅਦ ਸਾਕਸ਼ੀ ਨੂੰ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ।

ਸਾਕਸ਼ੀ ਨੂੰ ਗੋਲੀ ਮਾਰਨ ਵਾਲੇ ਵਿਅਕਤੀ ਦੀ ਪਛਾਣ ਗਿਰਰਾਜ ਕਟਾਰੇ ਵਜੋਂ ਹੋਈ ਹੈ। ਪੁਲੀਸ ਮੁਲਜ਼ਮ ਦੀ ਭਾਲ ਕਰ ਰਹੀ ਸੀ। ਇਸੇ ਦੌਰਾਨ ਮੰਗਲਵਾਰ ਸਵੇਰੇ ਪ੍ਰੇਮੀ ਗਿਰਰਾਜ ਦੀ ਲਾਸ਼ ਭਾਊ ਸਾਹਬ ਦੇ ਪੋਟਨਿਸ ਇਲਾਕੇ 'ਚੋਂ ਮਿਲੀ। ਲਾਸ਼ ਦੇ ਕੋਲ ਇੱਕ ਬਾਈਕ ਅਤੇ ਇੱਕ ਪਿਸਤੌਲ ਪਿਆ ਮਿਲਿਆ ਹੈ। ਗੋਲੀ ਲੱਗਣ ਕਾਰਨ ਗਿਰਰਾਜ ਦੀ ਮੌਤ ਹੋ ਗਈ। ਪੁਲਿਸ ਨੂੰ ਸ਼ੱਕ ਹੈ ਕਿ ਸਾਕਸ਼ੀ ਨੂੰ ਗੋਲੀ ਮਾਰ ਕੇ ਗਿਰਰਾਜ ਨੇ ਖੁਦਕੁਸ਼ੀ ਕਰ ਲਈ ਹੈ।

ਪੰਜ ਸਾਲ ਤੋਂ ਇੱਕ ਦੂਜੇ ਨੂੰ ਪਿਆਰ ਕਰਦੇ ਸਨ

ਗਿਰਰਾਜ ਦੇ ਵੱਡੇ ਭਰਾ ਨੇ ਦੱਸਿਆ ਕਿ ਗਿਰਰਾਜ ਅਤੇ ਸਾਕਸ਼ੀ ਇੱਕ ਦੂਜੇ ਨੂੰ ਪਿਆਰ ਕਰਦੇ ਸਨ। ਗਿਰਰਾਜ ਜੇਕੇ ਟਾਇਰ ਕੰਪਨੀ ਵਿੱਚ ਕੰਮ ਕਰਦਾ ਸੀ। ਸਾਕਸ਼ੀ ਦੀ ਪੜ੍ਹਾਈ ਦਾ ਖਰਚਾ ਵੀ ਗਿਰਰਾਜ ਪਿਛਲੇ 5 ਸਾਲਾਂ ਤੋਂ ਚੁੱਕ ਰਿਹਾ ਸੀ। ਪਰਿਵਾਰ ਵਾਲੇ ਵੀ ਦੋਹਾਂ ਦੇ ਵਿਆਹ ਲਈ ਤਿਆਰ ਸਨ ਪਰ ਇਸ ਦੌਰਾਨ ਸਾਕਸ਼ੀ ਦੀ ਮੰਗਣੀ ਸ਼ਿਵਪੁਰੀ ਜ਼ਿਲੇ ਦੇ ਮੋਤੀ 'ਚ 4 ਅਪ੍ਰੈਲ ਨੂੰ ਹੋਈ। 12 ਮਈ ਨੂੰ ਜਦੋਂ ਗਿਰਰਾਜ ਨੂੰ ਇਸ ਗੱਲ ਦਾ ਪਤਾ ਲੱਗਾ ਤਾਂ ਉਸ ਨੇ ਸਾਕਸ਼ੀ ਅਤੇ ਉਸ ਦੇ ਪਿਤਾ ਨੂੰ ਸਮਝਾਇਆ ਪਰ ਉਹ ਰਿਸ਼ਤਾ ਤੋੜਨ ਲਈ ਰਾਜ਼ੀ ਨਹੀਂ ਹੋਏ।

ਇਸ ਤੋਂ ਬਾਅਦ ਗਿਰਰਾਜ ਦਾ ਭਰਾ ਅਤੇ ਭਾਬੀ ਸਾਕਸ਼ੀ ਦੇ ਪਰਿਵਾਰਕ ਮੈਂਬਰਾਂ ਨਾਲ ਗੱਲ ਕਰਨ ਲਈ ਗਏ ਪਰ ਸਾਕਸ਼ੀ ਅਤੇ ਉਸ ਦੇ ਪਿਤਾ ਨੇ ਕਿਹਾ ਕਿ ਉਨ੍ਹਾਂ ਦੀ ਜਾਤ ਵੱਖਰੀ ਹੈ। ਇਸ ਲਈ ਅਸੀਂ ਗਿਰਰਾਜ ਨਾਲ ਸਬੰਧ ਨਹੀਂ ਰੱਖ ਸਕਦੇ ਅਤੇ ਸ਼ਿਵਪੁਰੀ ਦੇ ਲੜਕੇ ਨਾਲ ਵਿਆਹ ਕਰਨ ਦੀ ਗੱਲ ਕੀਤੀ ਹੈ, ਜੋ ਸਾਡੀ ਜਾਤੀ ਦਾ ਹੈ। ਸਾਕਸ਼ੀ ਦਾ ਵਿਆਹ ਅਗਲੇ ਮਹੀਨੇ 21 ਜੂਨ ਨੂੰ ਹੋਣਾ ਸੀ। ਜਦੋਂ ਸਾਕਸ਼ੀ ਅਤੇ ਉਸ ਦਾ ਪਰਿਵਾਰ ਨਹੀਂ ਮੰਨਿਆ ਤਾਂ ਗਿਰਰਾਜ ਨੂੰ ਇਸ ਗੱਲ ਤੋਂ ਗੁੱਸਾ ਆ ਗਿਆ ਅਤੇ ਉਸ ਨੇ ਸਾਕਸ਼ੀ ਨੂੰ ਪਿਸਤੌਲ ਨਾਲ ਗੋਲੀ ਮਾਰ ਕੇ ਕਤਲ ਕਰ ਦਿੱਤਾ। ਫਿਰ ਸ਼ਾਇਦ ਉਸ ਨੇ ਆਪਣੇ ਆਪ ਨੂੰ ਗੋਲੀ ਮਾਰ ਲਈ।