ਸੀਜ਼ੇਰੀਅਨ ਸਮੇਂ ਔਰਤ ਦੇ ਪੇਟ 'ਚ ਹੀ ਛੱਡ ਦਿੱਤੀ ਕੈਂਚੀ, ਡਾਕਟਰਾਂ ਨੇ 5 ਸਾਲ ਬਾਅਦ ਕੱਢੀ

ਕੇਰਲ ਦੀ ਸਿਹਤ ਮੰਤਰੀ ਵੀਨਾ ਜਾਰਜ ਨੇ ਸ਼ਨੀਵਾਰ ਨੂੰ ਡਾਕਟਰਾਂ ਦੀ ਲਾਪਰਵਾਹੀ ਦੇ 5 ਸਾਲ ਪੁਰਾਣੇ ਮਾਮਲੇ ਦੀ ਜਾਂਚ ਦੇ ਹੁਕਮ ਦਿੱਤੇ ਹਨ। ਸੂਬੇ ਦੇ ਸਿਹਤ ਮੰਤਰੀ ਨੇ ਇਹ ਕਾਰਵਾਈ ਕੋਝੀਕੋਡ ਦੀ ਰਹਿਣ ਵਾਲੀ ਹਰਸ਼ੀਨਾ ਨਾਂ ਦੀ ਔਰਤ ਵੱਲੋਂ ਡਾਕਟਰਾਂ ਖ਼ਿਲਾਫ਼ ਸ਼ਿਕਾਇਤ ਦਰਜ ਕਰਵਾਉਣ ਤੋਂ ਬਾਅਦ ਕੀਤੀ ਹੈ।

ਔਰਤ ਦਾ ਦੋਸ਼ ਹੈ ਕਿ 5 ਸਾਲ ਪਹਿਲਾਂ ਉਸ ਦਾ ਸੀਜੇਰੀਅਨ ਕਰਦੇ ਸਮੇਂ ਡਾਕਟਰਾਂ ਨੇ ਉਸ ਦੇ ਪੇਟ 'ਚ ਫੋਰਸੇਪ (ਆਪਰੇਸ਼ਨ ਦੌਰਾਨ ਵਰਤਿਆ ਜਾਣ ਵਾਲਾ ਮੈਡੀਕਲ ਯੰਤਰ) ਛੱਡ ਦਿੱਤਾ ਸੀ। ਸਮਾਚਾਰ ਏਜੰਸੀ ਪੀ.ਟੀ.ਆਈ ਦੇ ਮੁਤਾਬਕ ਵੀਨਾ ਜਾਰਜ ਨੇ ਕੇਰਲ ਦੇ ਸਿਹਤ ਸਕੱਤਰ ਨੂੰ ਜਲਦੀ ਤੋਂ ਜਲਦੀ ਮਾਮਲੇ ਦੀ ਜਾਂਚ ਕਰਕੇ ਰਿਪੋਰਟ ਸੌਂਪਣ ਲਈ ਕਿਹਾ ਹੈ। ਮੰਤਰੀ ਨੇ ਕਿਹਾ, “ਇਸ ਲਾਪਰਵਾਹੀ ਲਈ ਜ਼ਿੰਮੇਵਾਰ ਵਿਅਕਤੀਆਂ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।

ਫੋਰਸੇਪਸ ਕੈਂਚੀ-ਵਰਗੇ ਮੈਡੀਕਲ ਯੰਤਰ ਹਨ ਜੋ ਸਰਜਨ ਖੂਨ ਵਹਿਣ ਵਾਲੀਆਂ ਨਾੜੀਆਂ ਨੂੰ ਬੰਦ ਕਰਨ ਲਈ ਵਰਤਦੇ ਹਨ। ਨਵੰਬਰ 2017 ਵਿੱਚ ਹਰਸ਼ੀਨਾ ਨੇ ਕੋਝੀਕੋਡ ਮੈਡੀਕਲ ਕਾਲਜ ਵਿੱਚ ਤੀਜਾ ਸੀਜੇਰੀਅਨ ਕਰਵਾਇਆ। ਪਹਿਲੇ ਦੋ ਪ੍ਰਾਈਵੇਟ ਹਸਪਤਾਲਾਂ ਵਿੱਚ ਕੀਤੇ ਗਏ ਸਨ।

ਹਰਸ਼ੀਨਾ ਨੇ ਕਿਹਾ, 'ਤੀਜੇ ਸੀਜੇਰੀਅਨ ਤੋਂ ਬਾਅਦ ਮੈਨੂੰ ਪੇਟ 'ਚ ਤੇਜ਼ ਦਰਦ ਹੋਣ ਲੱਗਾ। ਮੈਂ ਸੋਚਿਆ ਕਿ ਜਾਂ ਤਾਂ ਮੈਨੂੰ ਗੁਰਦੇ ਦੀ ਪੱਥਰੀ ਹੈ ਜਾਂ ਕਿਸੇ ਕਿਸਮ ਦਾ ਕੈਂਸਰ ਹੈ। ਦਰਦ ਹਾਲਾਂਕਿ ਤੇਜ਼ ​​ਐਂਟੀਬਾਇਓਟਿਕਸ ਨਾਲ ਘਟ ਗਿਆ; ਪਰ ਯੂਰਿਨ ਇਨਫੈਕਸ਼ਨ ਤੋਂ ਪੀੜਤ ਹੋਣ ਕਾਰਨ ਪਿਛਲੇ 6 ਮਹੀਨਿਆਂ ਤੋਂ ਅਸਹਿ ਹੋ ਗਿਆ ਸੀ। ਬਾਅਦ ਵਿੱਚ ਇੱਕ ਨਿੱਜੀ ਹਸਪਤਾਲ ਦੇ ਡਾਕਟਰਾਂ ਦੁਆਰਾ ਕੀਤੇ ਗਏ ਸੀਟੀ ਸਕੈਨ ਤੋਂ ਪਤਾ ਲੱਗਿਆ ਕਿ ਮੇਰੇ ਪੇਟ ਵਿੱਚ ਇੱਕ ਧਾਤ ਦੀ ਵਸਤੂ ਸੀ, ਜੋ ਪਿਸ਼ਾਬ ਬਲੈਡਰ ਨਾਲ ਟਕਰਾ ਰਹੀ ਸੀ ਅਤੇ ਨਤੀਜੇ ਵਜੋਂ ਇਨਫੈਕਸ਼ਨ ਹੋ ਗਈ ਸੀ।

ਹਰਸ਼ੀਨਾ ਨੇ ਖੁਦ ਕੋਝੀਕੋਡ ਮੈਡੀਕਲ ਕਾਲਜ ਨਾਲ ਸੰਪਰਕ ਕੀਤਾ ਅਤੇ 17 ਸਤੰਬਰ ਨੂੰ ਡਾਕਟਰਾਂ ਨੇ ਉਸ ਦਾ ਆਪਰੇਸ਼ਨ ਕੀਤਾ ਅਤੇ ਅੰਤ ਵਿੱਚ ਉਸ ਦੇ ਪੇਟ ਵਿੱਚੋਂ ਫੋਰਸੇਪ ਕੱਢ ਦਿੱਤੀ। ਪੀਟੀਆਈ ਦੀ ਰਿਪੋਰਟ ਮੁਤਾਬਕ ਕੇਰਲ ਸਰਕਾਰ ਤੋਂ ਇਲਾਵਾ ਕੋਝੀਕੋਡ ਮੈਡੀਕਲ ਕਾਲਜ ਨੇ ਖੁਦ ਘਟਨਾ ਦੀ ਜਾਂਚ ਦੇ ਹੁਕਮ ਦਿੱਤੇ ਹਨ।

ਮੈਡੀਕਲ ਕਾਲਜ ਦੇ ਪ੍ਰਿੰਸੀਪਲ ਡਾਕਟਰ ਈਵੀ ਗੋਪੀ ਨੇ ਪੀਟੀਆਈ ਨੂੰ ਦੱਸਿਆ ਕਿ ਮਾਮਲੇ ਦੀ ਸ਼ੁਰੂਆਤੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਸਾਡਾ ਕੋਈ ਵੀ ਸਰਜੀਕਲ ਯੰਤਰ ਗਾਇਬ ਨਹੀਂ ਸੀ। ਸਾਡੇ ਹਸਪਤਾਲ ਵਿੱਚ ਆਉਣ ਤੋਂ ਪਹਿਲਾਂ ਔਰਤ ਦਾ ਦੋ ਵਾਰ ਪ੍ਰਾਈਵੇਟ ਹਸਪਤਾਲਾਂ ਵਿੱਚ ਆਪ੍ਰੇਸ਼ਨ ਹੋਇਆ ਸੀ।’ ਹਰਸ਼ੀਨਾ ਨੂੰ ਪੇਟ ਵਿੱਚੋਂ ਫੋਰਸਪਸ ਕੱਢਣ ਲਈ ਸਰਜਰੀ ਤੋਂ ਕੁਝ ਦਿਨਾਂ ਬਾਅਦ ਛੁੱਟੀ ਦੇ ਦਿੱਤੀ ਗਈ ਸੀ।

ਇਸ ਤੋਂ ਬਾਅਦ, ਉਸ ਨੇ ਵੀਨਾ ਜਾਰਜ ਅਤੇ ਕੋਝੀਕੋਡ ਮੈਡੀਕਲ ਕਾਲਜ ਨਾਲ ਸੰਪਰਕ ਕੀਤਾ ਅਤੇ ਮਾਮਲੇ ਨੂੰ ਲੈ ਕੇ ਸ਼ਿਕਾਇਤ ਦਰਜ ਕਰਵਾਈ।