ਲਾੜੀ ਵਿਆਹ ਦੀ ਪਹਿਲੀ ਰਾਤ ਨੂੰ ਹੀ ਗਹਿਣੇ-ਨਗਦੀ ਲੈ ਕੇ ਹੋ ਗਈ ਫਰਾਰ

ਧਾਰਮਿਕ ਨਗਰੀ ਵ੍ਰਿੰਦਾਵਨ ਤੋਂ ਇਕ ਅਨੋਖਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਇੱਕ ਵਿਅਕਤੀ ਨੇ ਆਪਣੀ ਜ਼ਿੰਦਗੀ ਖੁਸ਼ੀਆਂ ਨਾਲ ਭਰਨ ਲਈ ਵਿਆਹ ਕਰਵਾਇਆ, ਜਿਸ ਲਈ ਉਸ ਨੇ ਵਿਚੋਲਿਆਂ ਨੂੰ 1 ਲੱਖ ਰੁਪਏ ਵੀ ਦਿੱਤੇ ਪਰ ਸੱਤ ਫੇਰੇ ਲੈਣ ਮਗਰੋਂ ਲਾੜੀ ਘਰ 'ਚ ਰੱਖੇ ਗਹਿਣੇ ਅਤੇ ਨਕਦੀ ਲੈ ਕੇ ਨੌਂ-ਦੋ ਗਿਆਰਾਂ ਹੋ ਗਈ।

ਫਿਲਹਾਲ ਪੁਲਿਸ ਜਾਂਚ ਦੀ ਗੱਲ ਕਰ ਰਹੀ ਹੈ ਅਤੇ ਪੀੜਤ ਇਨਸਾਫ ਲਈ ਥਾਣੇ ਦੇ ਗੇੜੇ ਮਾਰ ਰਿਹਾ ਹੈ। ਵਿਆਹੁਤਾ ਜੀਵਨ ਸ਼ੁਰੂ ਕਰਨ ਲਈ ਸੰਤੋਸ਼ ਨਾਂ ਦੇ ਵਿਅਕਤੀ ਨੇ ਖੁਸ਼ੀ-ਖੁਸ਼ੀ ਲੱਖਾਂ ਰੁਪਏ ਖਰਚ ਦਿੱਤੇ, ਪਰ ਲੁਟੇਰੀ ਲਾੜੀ ਕਾਰਨ ਉਸ ਦੇ ਸਾਰੇ ਸੁਪਨੇ ਆਪਣੀ ਨਵੀਂ ਜ਼ਿੰਦਗੀ ਦੀ ਸ਼ੁਰੂਆਤ ਤੋਂ ਪਹਿਲਾਂ ਹੀ ਚਕਨਾਚੂਰ ਹੋ ਗਏ। ਇਹ ਮਾਮਲਾ ਵ੍ਰਿੰਦਾਵਨ ਕੋਤਵਾਲੀ ਦੇ ਗਊਸ਼ਾਲਾ ਨਗਰ ਇਲਾਕੇ ਦਾ ਹੈ।

ਇਸ ਘਟਨਾ ਦੇ ਸਬੰਧ 'ਚ ਪੀੜਤ ਸੰਤੋਸ਼ ਕੁਮਾਰ ਭਗਤ ਨੇ ਥਾਣਾ ਸਦਰ 'ਚ ਨਵ-ਵਿਆਹੀ ਲਾੜੀ ਸਮੇਤ ਤਿੰਨ ਨਾਮਜ਼ਦ ਲੋਕਾਂ ਖਿਲਾਫ ਸ਼ਿਕਾਇਤ ਦਰਜ ਕਰਵਾਈ ਹੈ। ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।

ਪੀੜਤ ਸੰਤੋਸ਼ ਕੁਮਾਰ ਭਗਤ ਅਨੁਸਾਰ ਉਸ ਦੇ ਦੋ ਨਾਮਜ਼ਦ ਗੁਆਂਢੀਆਂ ਨੇ 15 ਨਵੰਬਰ ਨੂੰ ਉਸ ਦਾ ਵਿਆਹ ਅਲੀਗੜ੍ਹ ਦੀ ਰਹਿਣ ਵਾਲੀ ਲੜਕੀ ਨਾਲ ਕਰਵਾ ਦਿੱਤਾ। ਵਿਆਹ ਕਰਵਾਉਣ ਦੇ ਬਦਲੇ ਉਸ ਤੋਂ ਇਕ ਲੱਖ ਰੁਪਏ ਵੀ ਲੈ ਲਏ।

ਵਿਆਹ ਤੋਂ ਬਾਅਦ ਘਰ ਆਈ ਉਸ ​​ਦੀ ਨਵੀਂ ਲਾੜੀ ਰਾਤ ਕਰੀਬ 11 ਵਜੇ ਤੱਕ ਘਰ ਹੀ ਸੀ ਪਰ ਜਦੋਂ 17 ਨਵੰਬਰ ਨੂੰ ਸਵੇਰੇ ਸਾਢੇ ਛੇ ਵਜੇ ਦੇ ਕਰੀਬ ਉਸ ਨੂੰ ਜਾਗ ਆਈ ਤਾਂ ਉਹ ਘਰੋਂ ਗਾਇਬ ਸੀ। ਪਤਾ ਲੱਗਾ ਕਿ ਉਹ ਘਰ ਵਿੱਚ ਰੱਖੇ ਕਰੀਬ ਦੋ ਲੱਖ ਰੁਪਏ ਦੇ ਸੋਨੇ ਦੇ ਗਹਿਣੇ ਵੀ ਆਪਣੇ ਨਾਲ ਲੈ ਗਿਆ ਸੀ।