Patanjali Foods : ਬਾਬਾ ਰਾਮ ਦੇਵ ਨੂੰ ਝਟਕਾ, ਕੰਪਨੀ ਦੇ 29 ਕਰੋੜ ਸ਼ੇਅਰ ਫਰੀਜ਼

ਨਵੀਂ ਦਿੱਲੀ- ਬਾਬਾ ਰਾਮ ਦੇਵ ਨੂੰ ਵੱਡਾ ਝਟਕਾ ਲੱਗਾ ਹੈ। ਸ਼ੇਅਰ ਬਾਜ਼ਾਰ (Share Market)  ਦੇ ਨਿਯਮਾਂ ਦੀ ਪਾਲਣਾ ਨਾ ਕਰਨ ਉਤੇ ਬੰਬੇ ਸਟਾਕ ਐਕਸਚੇਂਜ (BSE) ਅਤੇ ਨੈਸ਼ਨਲ ਸਟਾਕ ਐਕਸਚੇਂਜ (NSE) ਨੇ ਪੰਤਜਲੀ ਫੂਡ (Patanjali Foods) ਦੇ ਕਰੀਬ 29.25 ਕਰੋੜ ਸ਼ੇਅਰਾਂ ਨੂੰ ਫਰੀਜ ਕਰ ਦਿੱਤਾ ਹੈ। ਅੱਜ ਇਨ੍ਹਾਂ ਸ਼ੇਅਰਾਂ ਵਿੱਚ ਟਰੇਡਿੰਗ ਨਹੀ ਹੋ ਰਹੀ ਹੈ। ਐਕਸਚੇਂਜ ਵਲੋਂ ਫ੍ਰੀਜ਼ ਕੀਤੇ ਗਏ ਸ਼ੇਅਰ ਕੰਪਨੀ ਦੇ ਪ੍ਰਮੋਟਰ ਸਮੂਹ ਦੇ ਹਨ। ਇਸ ਵਿੱਚ ਪਤੰਜਲੀ ਆਯੁਰਵੇਦ (Patanjali Ayurved) ਦਾ ਸਟਾਕ ਵੀ ਸ਼ਾਮਲ ਹੈ।

ਸੇਬੀ ਦੇ ਨਿਯਮ ਅਨੁਸਾਰ ਮਾਰਕੀਟ ਵਿੱਚ ਸੂਚੀਬੱਧ ਕਿਸੇ ਵੀ ਕੰਪਨੀ ਦੇ ਸਟਾਕ ਦਾ 25 ਪ੍ਰਤੀਸ਼ਤ ਜਨਤਾ ਕੋਲ ਹੋਣਾ ਚਾਹੀਦਾ ਹੈ। ਦਸੰਬਰ 2022 ਦੇ ਅੰਤ ਤੱਕ, ਪਤੰਜਲੀ ਫੂਡ ਨੇ ਇਨ੍ਹਾਂ ਨਿਯਮਾਂ ਦੀ ਪਾਲਣਾ ਨਹੀਂ ਕੀਤੀ ਅਤੇ ਇਸਦੇ ਸ਼ੇਅਰਾਂ ਵਿੱਚ ਜਨਤਕ ਹਿੱਸੇਦਾਰੀ ਸਿਰਫ 19.18 ਪ੍ਰਤੀਸ਼ਤ ਰਹੀ। ਇਨ੍ਹਾਂ ਨਿਯਮਾਂ ਦੀ ਉਲੰਘਣਾ ਕਰਦਿਆਂ ਕੰਪਨੀ ਨੇ ਆਪਣੇ ਪ੍ਰਮੋਟਰਾਂ ਕੋਲ ਜ਼ਿਆਦਾਤਰ ਹਿੱਸੇਦਾਰੀ ਬਰਕਰਾਰ ਰੱਖੀ ਹੈ ਅਤੇ ਇਹੀ ਕਾਰਨ ਹੈ ਕਿ ਸਿਰਫ ਦੋ ਸਟਾਕ ਐਕਸਚੇਂਜਾਂ ਨੇ ਪ੍ਰਮੋਟਰਾਂ ਦੇ ਸ਼ੇਅਰਾਂ ਨੂੰ ਫ੍ਰੀਜ਼ ਕੀਤਾ ਹੈ। ਇਸ ਕਾਰਨ ਅੱਜ ਸਵੇਰ ਤੋਂ ਹੀ ਕੰਪਨੀ ਦੇ 29 ਕਰੋੜ ਤੋਂ ਵੱਧ ਸ਼ੇਅਰਾਂ ਦਾ ਕਾਰੋਬਾਰ ਬੰਦ ਹੋ ਗਿਆ।

ਐਕਸਚੇਂਜ ਦੀ ਇਸ ਕਾਰਵਾਈ 'ਤੇ ਕੰਪਨੀ ਨੇ ਆਪਣਾ ਪੱਖ ਦਿੱਤਾ ਹੈ। ਕੰਪਨੀ ਵੱਲੋਂ ਜਾਰੀ ਬਿਆਨ 'ਚ ਕਿਹਾ ਗਿਆ ਹੈ ਕਿ ਸਟਾਕ ਐਕਸਚੇਂਜ ਦੇ ਫੈਸਲੇ ਦਾ ਕੰਪਨੀ ਦੇ ਵਿੱਤੀ ਪ੍ਰੋਫਾਈਲ 'ਤੇ ਕੋਈ ਅਸਰ ਨਹੀਂ ਪਵੇਗਾ। ਕੰਪਨੀ ਨੇ ਕਿਹਾ ਹੈ ਕਿ ਪ੍ਰਮੋਟਰਾਂ ਦੇ ਸ਼ੇਅਰ 8 ਅਪ੍ਰੈਲ ਤੱਕ ਲਾਕ ਇਨ ਹਨ। ਇਸ ਲਈ ਇਸਦਾ ਕੋਈ ਅਸਰ ਨਹੀਂ ਹੋਵੇਗਾ। ਹਾਲਾਂਕਿ, ਅਸੀਂ ਜਨਤਕ ਹਿੱਸੇਦਾਰੀ ਲਈ ਨਿਯਮਾਂ ਦੀ ਪਾਲਣਾ ਕਰਨ ਲਈ ਵਚਨਬੱਧ ਹਾਂ ਅਤੇ ਅਗਲੇ ਕੁਝ ਦਿਨਾਂ ਵਿੱਚ ਅਜਿਹਾ ਕਰਾਂਗੇ। ਫਿਲਹਾਲ ਇਸ ਨਿਯਮ ਨੂੰ ਪੂਰਾ ਨਾ ਕਰਨ 'ਤੇ 21 ਪ੍ਰਮੋਟਰਾਂ ਦੇ ਸ਼ੇਅਰ ਫਰੀਜ਼ ਕੀਤੇ ਗਏ ਹਨ। ਪ੍ਰਮੋਟਰਾਂ ਦੀ ਸੂਚੀ 'ਚ ਪਤੰਜਲੀ ਆਯੁਰਵੇਦ ਦੀ 39.4 ਫੀਸਦੀ ਹਿੱਸੇਦਾਰੀ ਹੈ।

ਜਾਣੋ, ਨਿਵੇਸ਼ਕਾਂ 'ਤੇ ਕੀ ਅਸਰ ਪਵੇਗਾ

ਹਾਲਾਂਕਿ ਐਕਸਚੇਂਜਾਂ ਨੇ ਸਿਰਫ ਪ੍ਰਮੋਟਰਾਂ ਦੇ ਸ਼ੇਅਰ ਹੀ ਫ੍ਰੀਜ਼ ਕੀਤੇ ਹਨ ਅਤੇ ਪ੍ਰਕਾਸ਼ਿਤ ਸ਼ੇਅਰਹੋਲਡਿੰਗ ਦੇ ਨਾਲ ਸਟਾਕ ਵਿੱਚ ਵਪਾਰ ਅਜੇ ਵੀ ਜਾਰੀ ਹੈ। ਇਸ ਲਈ ਇਹ ਨਿਵੇਸ਼ਕਾਂ ਨੂੰ ਸਿੱਧੇ ਤੌਰ 'ਤੇ ਨਜ਼ਰ ਨਹੀਂ ਆ ਰਿਹਾ ਹੈ ਪਰ ਇਸ ਕਾਰਵਾਈ ਤੋਂ ਬਾਅਦ ਅੱਜ ਕੰਪਨੀ ਦੇ ਸ਼ੇਅਰਾਂ 'ਚ ਜ਼ਬਰਦਸਤ ਗਿਰਾਵਟ ਦੇਖਣ ਨੂੰ ਮਿਲ ਰਹੀ ਹੈ। NSE 'ਤੇ ਸਵੇਰੇ 11.25 ਵਜੇ ਪਤੰਜਲੀ ਫੂਡਜ਼ ਦਾ ਸ਼ੇਅਰ 3.87 ਫੀਸਦੀ ਡਿੱਗ ਕੇ 927.05 ਰੁਪਏ 'ਤੇ ਸੀ ਅਤੇ ਬੀਐੱਸਈ 'ਤੇ 4.57 ਫੀਸਦੀ ਡਿੱਗ ਕੇ 917 ਰੁਪਏ 'ਤੇ ਆ ਗਿਆ।