ਵੀਰੇਂਦਰ ਸਹਿਵਾਗ ਦੀ ਪਤਨੀ ਦੇ ਫ਼ਰਜ਼ੀ ਦਸਤਖ਼ਤ ਕਰਕੇ ਲਿਆ 4.5 ਕਰੋੜ ਦਾ ਲੋਨ, ਕੇਸ ਦਰਜ

ਸਾਬਕਾ ਕ੍ਰਿਕਟਰ ਵੀਰੇਂਦਰ ਸਹਿਵਾਗ ਦੀ ਪਤਨੀ ਆਰਤੀ ਸਹਿਵਾਗ ਨੇ ਆਪਣੇ ਬਿਜ਼ਨੈੱਸ ਪਾਰਟਨਰ ਖ਼ਿਲਾਫ਼ ਧੋਖਾਧੜੀ ਦੀ ਸ਼ਿਕਾਇਤ ਦਰਜ ਕਰਵਾਈ ਹੈ। ਆਰਤੀ ਨੇ ਦੋਸ਼ ਲਾਇਆ ਹੈ ਕਿ ਉਸ ਨੇ ਫ਼ਰਜ਼ੀ ਦਸਤਖ਼ਤ ਕਰ ਕੇ ਇਕ ਬਿਲਡਰ ਤੋਂ 4.5 ਕਰੋੜ ਰੁਪਏ ਦਾ ਲੋਨ ਲਿਆ। ਆਰਤੀ ਨੇ ਦਿੱਲੀ ਦੀ ਆਰਥਿਕ ਅਪਰਾਧ ਸ਼ਾਖਾ ਵਿੱਚ ਆਪਣੇ ਨਾਲ ਹੋਈ ਧੋਖਾਧੜੀ ਦੀ ਸ਼ਿਕਾਇਤ ਦਰਜ ਕਰਵਾਈ ਹੈ।

ਆਰਤੀ ਸਹਿਵਾਗ ਦੇ ਇਲਜ਼ਾਮ ਮੁਤਾਬਕ ਉਸ ਦੇ ਨਾਂ ਉਤੇ ਹਸਤਾਖ਼ਰ ਦਾ ਗ਼ਲਤ ਇਸਤੇਮਾਲ ਕਰਕੇ ਸਾਢੇ ਚਾਰ ਕਰੋੜ ਰੁਪਏ ਦਾ ਕਰਜ਼ਾ ਲਿਆ ਗਿਆ ਹੈ। ਆਰਤੀ ਦੇ ਇਲਜ਼ਾਮ ਮੁਤਾਬਕ ਉਨ੍ਹਾਂ ਦਿੱਲੀ ਦੇ ਅਸ਼ੋਕ ਵਿਹਾਰ ਵਿੱਚ ਰੋਹਿਤ ਕੱਕੜ ਨਾਂ ਦੇ ਸ਼ਖ਼ਸ ਨਾਲ ਭਾਈਵਾਲੀ ਕੀਤੀ ਸੀ। ਇਸ ਦੇ ਬਾਅਦ ਰੋਹਿਤ ਕੱਕੜ ਤੇ ਉਸ ਦੇ ਕੁਝ ਸਾਥੀਆਂ ਨੇ ਆਰਤੀ ਦੀ ਜਾਣਕਾਰੀ ਬਗੈਰ ਇੱਕ ਦੂਜੀ ਬਿਲਡਰ ਫਰਮ ਨਾਲ ਸੰਪਰਕ ਕੀਤਾ। ਇਨ੍ਹਾਂ ਲੋਕਾਂ ਨੇ ਉਸ ਫਰਮ ਨੂੰ ਦੱਸਿਆ ਕਿ ਆਰਤੀ ਤੇ ਵੀਰੇਂਦਰ ਸਹਿਵਾਗ ਉਨ੍ਹਾਂ ਨਾਲ ਜੁੜੇ ਹਨ।

Aarti, wife of Virender Sehwag has filed a complaint against her business partners alleging they took a Rs 4.5 crore loan by forging her signatures and later defaulting on payment.

— ANI (@ANI) July 13, 2019

ਆਰਤੀ ਸਹਿਵਾਗ ਦਾ ਕਹਿਣਾ ਹੈ ਕਿ ਜਦੋਂ ਉਹ ਰੋਹਿਤ ਕੱਕੜ ਦੀ ਫਰਮ ਦੀ ਭਾਈਵਾਲ ਬਣੀ ਸੀ ਤਾਂ ਉਸ ਨੇ ਤੈਅ ਕੀਤਾ ਸੀ ਕਿ ਬਿਨਾ ਉਸ ਦੀ ਮਰਜ਼ੀ ਕੋਈ ਕੰਮ ਨਹੀਂ ਹੋਏਗਾ। ਦਿੱਲੀ ਪੁਲਿਸ ਦੀ ਆਰਥਕ ਅਪਰਾਧ ਸ਼ਾਖਾ ਨੇ ਸਾਰੇ ਮੁਲਜ਼ਮਾਂ ਖ਼ਿਲਾਫ਼ ਧਾਰਾ 420 ਤਹਿਤ ਕੇਸ ਦਰਜ ਕਰ ਲਿਆ ਹੈ।