UPSC Result: ਹੈੱਡ ਕਾਂਸਟੇਬਲ ਨੇ ਅੱਠਵੀਂ ਕੋਸ਼ਿਸ਼ ਵਿਚ ਪਾਸ ਕੀਤੀ UPSC ਪ੍ਰੀਖਿਆ

UPSC Result: ਦਿੱਲੀ ਪੁਲਿਸ ਦੇ ਇੱਕ ਹੈੱਡ ਕਾਂਸਟੇਬਲ ਨੇ UPSC ਇਮਤਿਹਾਨ ਪਾਸ (Head Constable UPSC Result) ਕਰ ਲਿਆ ਹੈ। ਰਾਮ ਭਜਨ ਕੁਮਾਰ (34) ਨੇ ਅੱਠਵੀਂ ਕੋਸ਼ਿਸ਼ ਵਿਚ ਆਪਣੀ ਮੰਜ਼ਿਲ ਸਰ ਕਰ ਲਈ। ਉਸ ਨੇ UPSC ਪ੍ਰੀਖਿਆ ਵਿਚ 667ਵਾਂ ਰੈਂਕ ਹਾਸਲ ਕੀਤਾ। ਉਹ ਦੱਖਣੀ-ਪੱਛਮੀ ਦਿੱਲੀ ਦੇ ਸਾਈਬਰ ਪੁਲਿਸ ਸੈੱਲ ਵਿੱਚ ਹੈੱਡ ਕਾਂਸਟੇਬਲ ਹੈ।

ਹੈੱਡ ਕਾਂਸਟੇਬਲ ਰਾਮ ਭਜਨ ਕੁਮਾਰ ਨੇ ਕਿਹਾ ਕਿ ਇਹ ਮੇਰੇ ਲਈ ਸੁਪਨੇ ਦੇ ਸਾਕਾਰ ਹੋਣ ਵਰਗਾ ਹੈ। ਇਹ ਮੇਰੀ ਅੱਠਵੀਂ ਕੋਸ਼ਿਸ਼ ਸੀ। ਕਿਉਂਕਿ ਮੈਂ ਓਬੀਸੀ ਸ਼੍ਰੇਣੀ ਤੋਂ ਹਾਂ, ਮੈਂ ਨੌਂ ਵਾਰ ਕੋਸ਼ਿਸ਼ ਕਰ ਸਕਦਾ ਹਾਂ। ਜੇ ਮੈਂ ਅੱਠਵੀਂ ਕੋਸ਼ਿਸ਼ ਵਿੱਚ ਅਸਫਲ ਹੋ ਜਾਂਦਾ, ਤਾਂ ਮੈਂ ਆਖਰੀ ਕੋਸ਼ਿਸ਼ ਲਈ ਜੁਟ ਜਾਂਦਾ।

ਯੂਪੀਐਸਸੀ ਦੇ ਨਤੀਜੇ ਤੋਂ ਬਾਅਦ ਭਜਨ ਰਾਮ ਕੁਮਾਰ ਨੇ ਇੱਕ ਨਿਊਜ਼ ਏਜੰਸੀ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਮੇਰੇ ਕੋਲ ਗੁਆਉਣ ਲਈ ਕੁਝ ਨਹੀਂ ਸੀ। ਭਜਨ ਕੁਮਾਰ ਰਾਜਸਥਾਨ ਦੇ ਇੱਕ ਪਿੰਡ ਦਾ ਰਹਿਣ ਵਾਲਾ ਹੈ। ਉਸ ਦਾ ਪਿਤਾ ਮਜ਼ਦੂਰ ਸੀ। ਉਹ ਕਹਿੰਦਾ ਹੈ ਕਿ ਮੇਰੇ ਪਰਿਵਾਰ ਨੇ ਸਾਨੂੰ ਸਿੱਖਿਅਤ ਕਰਨ ਅਤੇ ਸਾਡੀਆਂ ਰੋਜ਼ਾਨਾ ਲੋੜਾਂ ਪੂਰੀਆਂ ਕਰਨ ਲਈ ਬੜਾ ਸੰਘਰਸ਼ ਕੀਤਾ ਹੈ। ਫਿਰ ਵੀ ਅਸੀਂ ਉਮੀਦ ਨਹੀਂ ਛੱਡੀ ਸੀ।

ਹੈੱਡ ਕਾਂਸਟੇਬਲ ਰਾਮ ਭਜਨ ਕੁਮਾਰ ਦੀ ਪ੍ਰਾਪਤੀ 'ਤੇ ਦਿੱਲੀ ਪੁਲਿਸ ਨੇ ਵੀ ਖੁਸ਼ੀ ਦਾ ਪ੍ਰਗਟਾਵਾ ਕੀਤਾ ਹੈ। ਉਸ ਨੂੰ ਵਧਾਈ ਦਿੰਦੇ ਹੋਏ, ਦਿੱਲੀ ਪੁਲਿਸ ਨੇ ਲਿਖਿਆ- #ਦਿੱਲੀ ਪੁਲਿਸ ਪਰਿਵਾਰ ਸਾਈਬਰ ਸੈੱਲ, ਦੱਖਣੀ ਪੱਛਮੀ ਜ਼ਿਲ੍ਹਾ ਹੈੱਡ ਕਾਂਸਟੇਬਲ ਰਾਮ ਭਜਨ ਨੂੰ #UPSC ਸਿਵਲ ਸੇਵਾਵਾਂ ਪ੍ਰੀਖਿਆ 2022 ਵਿੱਚ 667ਵਾਂ ਰੈਂਕ ਪ੍ਰਾਪਤ ਕਰਨ ਲਈ ਦਿਲੋਂ ਵਧਾਈ ਦਿੰਦਾ ਹੈ। ਤੁਹਾਨੂੰ ਮਿਹਨਤ, ਲਗਨ ਅਤੇ ਸਬਰ ਦਾ ਫਲ ਮਿਲਿਆ ਹੈ।

ਅੱਠਵੀਂ ਕੋਸ਼ਿਸ਼ ਵਿੱਚ ਯੂਪੀਐਸਸੀ ਦੀ ਪ੍ਰੀਖਿਆ ਪਾਸ ਕਰਨ ਵਾਲਾ ਰਾਮ ਭਜਨ ਕੁਮਾਰ ਅਜੇ ਸੰਤੁਸ਼ਟ ਨਹੀਂ ਹੈ। ਉਹ 28 ਮਈ ਨੂੰ ਹੋਣ ਵਾਲੀ ਯੂਪੀਐਸਸੀ ਦੀ ਮੁਢਲੀ ਪ੍ਰੀਖਿਆ ਵਿੱਚ ਸ਼ਾਮਲ ਹੋਵੇਗਾ। ਉਸ ਦੀ ਕੋਸ਼ਿਸ਼ ਰੈਂਕ 'ਚ ਸੁਧਾਰ ਦੀ ਹੋਵੇਗੀ। ਇਸ ਸਮੇਂ ਰਾਮ ਭਜਨ ਕੁਮਾਰ ਦੀ ਇਸ ਪ੍ਰਾਪਤੀ ਕਾਰਨ ਪਰਿਵਾਰ ਸਮੇਤ ਪਿੰਡ ਵਿੱਚ ਖੁਸ਼ੀ ਦੀ ਲਹਿਰ ਹੈ।