ਲੱਦਾਖ 'ਚ 26 ਜਵਾਨਾਂ ਨੂੰ ਲੈ ਕੇ ਜਾ ਰਿਹਾ ਵਾਹਨ ਨਦੀ 'ਚ ਡਿੱਗਿਆ, ਹਾਦਸੇ 'ਚ 7 ਜਵਾਨਾਂ ਦੀ ਮੌਤ

ਨਵੀਂ ਦਿੱਲੀ- ਲੱਦਾਖ ਦੇ ਤੁਰਤੁਕ ਸੈਕਟਰ 'ਚ ਇਕ ਵਾਹਨ ਹਾਦਸੇ 'ਚ ਹੁਣ ਤੱਕ 7 ਭਾਰਤੀ ਫੌਜ ਦੇ ਜਵਾਨਾਂ ਦੀ ਮੌਤ ਹੋ ਗਈ ਹੈ, ਜਦਕਿ ਕਈ ਗੰਭੀਰ ਜ਼ਖਮੀ ਹੋਏ ਹਨ। ਨਿਊਜ਼ ਏਜੰਸੀ ਏਐਨਆਈ ਨੇ ਫ਼ੌਜ ਦੇ ਸੂਤਰਾਂ ਦੇ ਹਵਾਲੇ ਨਾਲ ਸ਼ੁੱਕਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਉਨ੍ਹਾਂ ਕਿਹਾ ਕਿ ਜ਼ਖਮੀਆਂ ਦੇ ਢੁੱਕਵੇਂ ਇਲਾਜ ਅਤੇ ਦੇਖਭਾਲ ਲਈ ਯਤਨ ਜਾਰੀ ਹਨ, ਇਸ ਤਹਿਤ ਹੋਰ ਵੀ ਗੰਭੀਰ ਜ਼ਖਮੀਆਂ ਨੂੰ ਭਾਰਤੀ ਹਵਾਈ ਸੈਨਾ ਰਾਹੀਂ ਪੱਛਮੀ ਕਮਾਂਡ ਵਿਚ ਤਬਦੀਲ ਕਰਨ ਦੇ ਯਤਨ ਕੀਤੇ ਜਾ ਰਹੇ ਹਨ।

ਫੌਜ ਦੇ ਬੁਲਾਰੇ ਨੇ ਕਿਹਾ, “26 ਸੈਨਿਕਾਂ ਦੀ ਟੀਮ ਪਰਤਾਪੁਰ ਦੇ ਇੱਕ ਟਰਾਂਜ਼ਿਟ ਕੈਂਪ ਤੋਂ ਹਨੀਫ ਸਬ ਸੈਕਟਰ ਵਿੱਚ ਅੱਗੇ ਦੀ ਸਥਿਤੀ ਵੱਲ ਵਧ ਰਹੀ ਸੀ। ਸਵੇਰੇ ਕਰੀਬ 9 ਵਜੇ ਥੌਇਸ ਤੋਂ ਕਰੀਬ 25 ਕਿਲੋਮੀਟਰ ਦੂਰ ਵਾਹਨ ਸੜਕ ਤੋਂ ਫਿਸਲ ਕੇ 50-60 ਫੁੱਟ ਹੇਠਾਂ ਸ਼ਿਓਕ ਨਦੀ ਵਿੱਚ ਜਾ ਡਿੱਗਿਆ। ਨਤੀਜੇ ਵਜੋਂ, ਸਵਾਰ ਸਾਰੇ ਜ਼ਖਮੀ ਹੋ ਗਏ।"

ਉਨ੍ਹਾਂ ਕਿਹਾ, ''ਹੁਣ ਤੱਕ ਸੱਤ ਜਵਾਨਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ ਗਿਆ ਹੈ। ਹੋਰ ਲੋਕਾਂ ਨੂੰ ਵੀ ਗੰਭੀਰ ਸੱਟਾਂ ਲੱਗੀਆਂ ਹਨ। ਇਹ ਯਕੀਨੀ ਬਣਾਉਣ ਲਈ ਯਤਨ ਜਾਰੀ ਹਨ ਕਿ ਸਾਰੇ ਜ਼ਖਮੀਆਂ ਨੂੰ ਬਿਹਤਰ ਡਾਕਟਰੀ ਦੇਖਭਾਲ ਮਿਲੇ ਅਤੇ ਇਸ ਲਈ ਹਵਾਈ ਸੈਨਾ ਰਾਹੀਂ ਪੱਛਮੀ ਕਮਾਂਡ ਵਿਚ ਹੋਰ ਗੰਭੀਰ ਕਰਮਚਾਰੀਆਂ ਨੂੰ ਭੇਜਣ ਲਈ ਯਤਨ ਕੀਤੇ ਜਾ ਰਹੇ ਹਨ।