ਪਤੰਗਬਾਜ਼ੀ ਨੇ ਲਈ 9ਵੀਂ ਦੇ ਵਿਦਿਆਰਥੀ ਦੀ ਜਾਨ, ਕੋਠੇ ਤੋਂ ਡਿੱਗ ਕੇ ਹੋਈ ਮੌਤ

ਚੰਡੀਗੜ੍ਹ: Punjab Crime News: ਕਪੂਰਥਲਾ (Kapurthala) ਜ਼ਿਲ੍ਹੇ ਦੇ ਪਿੰਡ ਉਚਾ ਬੇਟ ਵਿਖੇ ਇੱਕ ਦੁਖਦ ਘਟਨਾ ਵਾਪਰਨ ਦੀ ਸੂਚਨਾ ਹੈ। ਇਥੇ ਇੱਕ 15 ਸਾਲਾ ਨੌਜਵਾਨ ਦੀ ਕੋਠੇ ਤੋਂ ਡਿੱਗਣ ਕਾਰਨ ਮੌਤ (Death) ਹੋ ਗਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਨੌਜਵਾਨ ਜੋ ਕੋਠੇ 'ਤੇ ਪਤੰਗ ਉਡਾ (Kite Flying Death) ਰਿਹਾ ਸੀ, ਅਚਾਨਕ ਹੇਠਾਂ ਡਿੱਗ ਗਿਆ। ਮ੍ਰਿਤਕ 9ਵੀਂ ਜਮਾਤ ਦਾ ਵਿਦਿਆਰਥੀ ਸੀ।

ਮ੍ਰਿਤਕ ਜਸਨਦੀਪ ਸਿੰਘ ਦੇ ਪਰਿਵਾਰ ਨੇ ਰੋ-ਰੋ ਕੇ ਦੱਸਿਆ ਕਿ ਜਸਨਦੀਪ ਸਿੰਘ ਦੀ ਮਾਂ ਦੀ ਮੌਤ ਹੋ ਜਾਣ ਤੋ ਬਾਅਦ ਉਨ੍ਹਾਂ ਵੱਲੋਂ ਜਸਨਦੀਪ ਸਿੰਘ ਦਾ ਪਾਲਣ ਪੋਸ਼ਣ ਕੀਤਾ ਗਿਆ ਸੀ ਤੇ ਉਸਦੇ ਭਵਿੱਖ ਨੂੰ ਲੈ ਕੇ ਅਨੇਕ ਸੁਪਨੇ ਸਜੋਏ ਸਨ ਪਰ ਹੋਣੀ ਨੂੰ ਕੁਝ ਹੋਰ ਹੀ ਮਨਜ਼ੂਰ ਸੀ।

ਘਟਨਾ ਸੰਬੰਧੀ ਮ੍ਰਿਤਕ ਦੀ ਦਾਦੀ ਮਾਂ ਨੇ ਦੱਸਿਆ ਕਿ ਉਹ ਕਦੇ ਕਦੇ ਪਤੰਗ ਚੜ੍ਹਾਉਣ ਕੋਠੇ ਤੇ ਚੜ ਜਾਂਦਾ ਸੀ ਜਿਸ ਦਾ ਪਰਿਵਾਰ ਵਲੋਂ ਵਿਰੋਧ ਕੀਤਾ ਜਾਂਦਾ ਸੀ। ਬੀਤੇ ਦਿਨ ਜਸਨਦੀਪ ਸਿੰਘ ਬਹਾਨਾ ਬਣਾ  ਕੇ ਕੋਠੇ ਤੇ ਚੜ ਗਿਆ ਕਿ ਮੈ ਗਵਾਂਢੀਆਂ ਦੇ ਲੜਕੇ ਨੂੰ ਪਤੰਗ ਵਾਪਿਸ ਕਰਨ ਜਾ ਰਿਹਾ ਹਾਂ  ਕੋਠੇ ਉੱਪਰ  ਉਸ ਨਾਲ ਕੀ ਭਾਣਾ ਵਾਪਰਿਆ ਉਹ ਇਸ ਗੱਲ  ਤੋ ਅਣਜਾਣ ਹਨ। ਉਨ੍ਹਾਂ ਨੂੰ  ਜਿਵੇਂ ਹੀ  ਇਸ ਘਟਨਾ ਸੰਬੰਧੀ  ਸੂਚਨਾ ਮਿਲੀ ਤਾਂ ਜ਼ਖਮੀ ਹੋਏ ਜਸਨਦੀਪ ਸਿੰਘ ਨੂੰ ਤੁਰੰਤ ਸਿਵਲ ਹਸਪਤਾਲ ਕਪੂਰਥਲਾ ਲਿਜਾਇਆ ਗਿਆ  ਜਿੱਥੇ ਡਾਕਟਰਾਂ ਵਲੋਂ  ਉਸਨੂੰ ਮ੍ਰਿਤਕ ਐਲਾਨ ਕਰ ਦਿੱਤਾ ਗਿਆ।

ਮ੍ਰਿਤਕ ਜਸਵੀਰ ਸਿੰਘ ਦੇ ਪਰਿਵਾਰਕ ਮੈਂਬਰਾਂ ਨੇ ਸਰਕਾਰ ਨੂੰ ਅਪੀਲ ਕੀਤੀ ਹੈ ਕਿ ਪਤੰਗਬਾਜ਼ੀ ਕਰਨ 'ਤੇ ਮੁਕੰਮਲ ਪਾਬੰਦੀ ਲਾਈ ਜਾਵੇ ਤਾਂ ਜੋ ਅਜਿਹੀ ਘਟਨਾ ਦੁਬਾਰਾ ਨਾ ਵਾਪਰੇ ਅਤੇ ਕਿਸੇ ਘਰ ਦਾ ਚਿਰਾਗ਼ ਨਾ ਬੁਝੇ।