Winter Olympics 2022: ਜ਼ਿੱਦ 'ਤੇ ਅੜਿਆ ਚੀਨ, ਕੀ ਖੇਡਾਂ ਨੂੰ ਓਮੀਕਰੋਨ ਤੋਂ ਬਚਾ ਸਕਣਗੇ ਚੀਨ ਦੇ ਕਠੋਰ ਨਿਯਮ

ਸਾਲ 2019 ਤੋਂ ਲੈ ਕੇ ਹੁਣ ਤੱਕ ਕੋਰੋਨਾ ਮਹਾਂਮਾਰੀ ਕਾਰਨ ਕਈ ਅਜਿਹੇ ਰਾਸ਼ਟਰੀ ਤੇ ਅੰਤਰਰਾਸ਼ਟਰੀ ਸਮਾਗਮ ਮੁਲਤਵੀ ਕਰਨੇ ਪਏ ਸਨ ਪਰ ਬੀਜਿੰਗ 'ਚ ਸ਼ੁੱਕਰਵਾਰ ਤੋਂ ਸ਼ੁਰੂ ਹੋ ਰਹੀਆਂ ਸਰਦ ਰੁੱਤ ਓਲੰਪਿਕ ਖੇਡਾਂ ਤੋਂ ਪਹਿਲਾਂ ਇੱਥੇ ਕੋਰੋਨਾ ਮਹਾਂਮਾਰੀ ਕਾਰਨ ਚਿੰਤਾਵਾਂ ਹੋਰ ਵਧ ਗਈਆਂ ਹਨ। ਹਾਲ ਹੀ ਵਿੱਚ, ਇੱਥੇ ਕੋਰੋਨਾ ਵਾਇਰਸ ਦੇ ਓਮਿਕਰੋਨ ਵੇਰੀਐਂਟ ਦਾ ਸੰਕਰਮਣ ਮੁਕਾਬਲਤਨ ਜ਼ਿਆਦਾ ਤੇਜ਼ੀ ਨਾਲ ਫੈਲਿਆ ਹੈ।

ਹਾਲਾਂਕਿ ਬੀਜਿੰਗ ਅਤੇ ਆਸ-ਪਾਸ ਦੇ ਖੇਤਰਾਂ ਵਿੱਚ ਲਗਭਗ ਪੂਰੀ ਆਬਾਦੀ ਦਾ ਪੂਰੀ ਤਰ੍ਹਾਂ ਟੀਕਾਕਰਨ ਹੋ ਗਿਆ ਹੈ, ਓਮੀਕਰੋਨ ਵੇਰੀਐਂਟ ਨਾਲ ਟੀਕਾਕਰਨ ਕੀਤੇ ਗਏ ਲੋਕ ਵੀ ਸੰਕਰਮਿਤ ਹੋ ਰਹੇ ਹਨ। ਇਸ ਦੇ ਬਾਵਜੂਦ ਚੀਨੀ ਅਧਿਕਾਰੀ ਓਲੰਪਿਕ ਖੇਡਾਂ ਨੂੰ ਮੁਲਤਵੀ ਕਰਨ ਦੀ ਥਾਂ ਸਮਾਂ ਸਾਰਣੀ ਮੁਤਾਬਕ ਕਰਵਾਉਣ 'ਤੇ ਅੜੇ ਹੋਏ ਹਨ।

ਚੀਨ ਨੇ ਲਾਗੂ ਕੀਤੇ ਸਖਤ ਨਿਯਮ : ਚੀਨ ਨੇ ਇਨ੍ਹਾਂ ਖੇਡਾਂ ਲਈ ‘ਕਲੋਜ਼ ਲੂਪ ਸਿਸਟਮ’ ਲਾਗੂ ਕੀਤਾ ਹੈ। ਦੱਸਿਆ ਜਾਂਦਾ ਹੈ ਕਿ ਇਸ ਤੋਂ ਪਹਿਲਾਂ ਦੁਨੀਆ 'ਚ ਕਿਤੇ ਵੀ ਕਿਸੇ ਵੀ ਖੇਡ ਸਮਾਰੋਹ 'ਤੇ ਅਜਿਹੇ ਸਖਤ ਨਿਯਮ ਲਾਗੂ ਨਹੀਂ ਕੀਤੇ ਗਏ ਹਨ। ਚੀਨੀ ਅਧਿਕਾਰੀਆਂ ਮੁਤਾਬਕ ਇਸ ਨਿਯਮ ਦੇ ਤਹਿਤ ਖੇਡਾਂ ਨਾਲ ਜੁੜੇ ਵਿਅਕਤੀਆਂ ਨੂੰ ਇਕ ਲੂਪ ਦੇ ਅੰਦਰ ਰਹਿਣਾ ਹੋਵੇਗਾ।

ਮਕਸਦ ਇਹ ਹੈ ਕਿ ਇਨਫੈਕਸ਼ਨ ਕਿਸੇ ਵੀ ਤਰ੍ਹਾਂ ਨਾਲ ਉਨ੍ਹਾਂ ਵਿਚਕਾਰ ਨਾ ਪਹੁੰਚੇ। ਇਸ ਤਹਿਤ ਬੀਜਿੰਗ ਦੇ ਲੋਕਾਂ ਨੂੰ ਓਲੰਪਿਕ ਨਾਲ ਸਬੰਧਤ ਵਾਹਨ ਦੁਰਘਟਨਾਗ੍ਰਸਤ ਹੋਣ 'ਤੇ ਵੀ ਮਦਦ ਲਈ ਉੱਥੇ ਨਾ ਪਹੁੰਚਣ ਦੀ ਹਦਾਇਤ ਕੀਤੀ ਗਈ ਹੈ। ਚੀਨ ਦੇ ਇਨ੍ਹਾਂ ਕਦਮਾਂ ਦੀ ਅੰਤਰਰਾਸ਼ਟਰੀ ਪੱਧਰ 'ਤੇ ਸਖ਼ਤ ਆਲੋਚਨਾ ਹੋਈ ਹੈ।

ਅਮਰੀਕਾ ਦੇ ਨਿਊਯਾਰਕ ਵਿੱਚ ਆਈਕਾਹਨ ਸਕੂਲ ਆਫ਼ ਮੈਡੀਸਨ ਵਿੱਚ ਪ੍ਰੋਫੈਸਰ ਐਨੀ ਸਪੈਰੋ ਦੇ ਅਨੁਸਾਰ, ਅਜਿਹਾ ਲੱਗਦਾ ਹੈ ਕਿ ਚੀਨ ਐਥਲੀਟਾਂ ਦੀ ਨਹੀਂ, ਸਗੋਂ ਆਪਣੀ ਸੁਰੱਖਿਆ ਉੱਤੇ ਜ਼ਿਆਦਾ ਧਿਆਨ ਦੇ ਰਿਹਾ ਹੈ। ਐਥਲੀਟਾਂ, ਵੱਖ-ਵੱਖ ਦੇਸ਼ਾਂ ਦੀਆਂ ਟੀਮਾਂ ਅਤੇ ਪੱਤਰਕਾਰਾਂ ਨੂੰ ਲਾਗੂ ਨਿਯਮਾਂ ਅਨੁਸਾਰ ਉਨ੍ਹਾਂ ਦੇ ਆਉਣ ਤੋਂ ਬਾਅਦ ਨਿਯਮਤ ਤੌਰ 'ਤੇ ਕੋਵਿਡ ਲਈ ਟੈਸਟ ਕੀਤਾ ਜਾ ਰਿਹਾ ਹੈ।

ਜਿਨ੍ਹਾਂ ਦੇ ਸੰਕਰਮਿਤ ਹੋਣ ਦਾ ਸ਼ੱਕ ਹੈ, ਉਨ੍ਹਾਂ ਨੂੰ ਕੁਆਰੰਟੀਨ ਕੀਤਾ ਜਾ ਰਿਹਾ ਹੈ। ਜਦੋਂ ਖਿਡਾਰੀ ਮੁਕਾਬਲੇ ਦੀ ਸਮਾਪਤੀ 'ਤੇ ਆਪਣੇ ਦੇਸ਼ ਵਾਪਸ ਪਰਤਣਗੇ, ਤਾਂ ਉਨ੍ਹਾਂ ਨੂੰ ਸਿੱਧੇ ਹਵਾਈ ਅੱਡੇ 'ਤੇ ਲਿਜਾਇਆ ਜਾਵੇਗਾ। ਉਥੋਂ ਉਨ੍ਹਾਂ ਨੂੰ ਨਾਨ-ਕਮਰਸ਼ੀਅਲ ਉਡਾਣਾਂ ਰਾਹੀਂ ਉਨ੍ਹਾਂ ਦੇ ਦੇਸ਼ ਭੇਜਿਆ ਜਾਵੇਗਾ।

ਖੇਡ ਨੂੰ ਰੱਦ ਨਾ ਕਰਨ ਦੀ ਜ਼ਿੱਤ ਉੱਤੇ ਅੜਿਆ ਚੀਨ : ਵਿੰਟਰ ਓਲੰਪਿਕ ਖੇਡਾਂ ਲਈ ਪਹੁੰਚੇ ਮਸ਼ਹੂਰ ਅਮਰੀਕੀ ਐਥਲੀਟ ਅਪੋਲੋ ਓਹਨੋ ਨੇ ਅਮਰੀਕੀ ਵੈੱਬਸਾਈਟ ਰੋਲਿੰਗ ਸਟੋਨ ਨਾਲ ਗੱਲਬਾਤ 'ਚ ਕਿਹਾ, 'ਚੀਨ ਨੇ ਆਪਣਾ ਫੈਸਲਾ ਲਿਆ ਹੈ ਅਤੇ ਉਹ ਇਸ ਨੂੰ ਲਾਗੂ ਕਰਨ ਜਾ ਰਹੇ ਹਨ। ਉਹ ਖੇਡਾਂ ਨੂੰ ਰੱਦ ਕਰਨ ਲਈ ਤਿਆਰ ਨਹੀਂ ਹਨ।

ਯੂਐਸ ਦੇ ਮਿਨੀਸੋਟਾ ਵਿੱਚ ਸੰਕਰਮਣ ਰੋਗ ਖੋਜ ਅਤੇ ਨੀਤੀ ਕੇਂਦਰ ਦੇ ਨਿਰਦੇਸ਼ਕ ਮਾਈਕਲ ਓਸਟਰਹੋਮ ਨੇ ਵੈਬਸਾਈਟ axios.com ਨੂੰ ਦੱਸਿਆ ਕਿ 'ਟਰਿਲੀਅਨ ਡਾਲਰ ਦਾ ਸਵਾਲ ਇਹ ਹੈ ਕਿ ਕੀ ਉਹ ਓਮੀਕਰੋਨ ਨੂੰ ਹਰਾਉਣ ਦੇ ਯੋਗ ਹੋਣਗੇ? ਸਿਧਾਂਤਕ ਤੌਰ 'ਤੇ, ਉਨ੍ਹਾਂ ਨੇ ਇੱਕ ਯੋਜਨਾ ਬਣਾਈ ਹੈ ਜੋ ਖੇਡਾਂ ਨੂੰ ਕੋਵਿਡ ਤੋਂ ਬਚਾਏਗੀ। ਪਰ ਮੈਂ ਇਸ ਬਾਰੇ ਪੱਕੇ ਤੌਰ 'ਤੇ ਕੁਝ ਨਹੀਂ ਕਹਿ ਸਕਦਾ ਕਿ ਇਹ ਯੋਜਨਾ ਅਸਲ ਵਿੱਚ ਇਸ ਵਾਇਰਸ ਵਿਰੁੱਧ ਕਿੰਨੀ ਪ੍ਰਭਾਵਸ਼ਾਲੀ ਹੋਵੇਗੀ।

ਮਾਹਰਾਂ ਨੇ ਦੱਸਿਆ ਹੈ ਕਿ ਪਿਛਲੇ ਸਾਲ ਟੋਕੀਓ ਵਿੱਚ ਹੋਈਆਂ ਸਮਰ ਓਲੰਪਿਕ ਖੇਡਾਂ ਦੌਰਾਨ ਵੀ ਅੰਤਰਰਾਸ਼ਟਰੀ ਓਲੰਪਿਕ ਕਮੇਟੀ ਨੇ ਸਖ਼ਤ ਨਿਯਮਾਂ ਦੀ ਪਾਲਣਾ ਕੀਤੀ ਸੀ। ਪਰ ਉੱਥੇ ਕਈ ਲੋਕ ਕੋਵਿਡ-19 ਨਾਲ ਸੰਕਰਮਿਤ ਹੋ ਗਏ। ਚੀਨ ਨੇ ਬੀਜਿੰਗ ਓਲੰਪਿਕ ਖੇਡਾਂ 'ਚ ਆਉਣ ਤੋਂ ਪਹਿਲਾਂ ਪੂਰੀ ਤਰ੍ਹਾਂ ਟੀਕਾਕਰਨ ਦੀ ਸ਼ਰਤ ਰੱਖੀ ਹੈ। ਜਿਨ੍ਹਾਂ ਨੇ ਵੈਕਸੀਨ ਨਹੀਂ ਲਈ ਹੈ, ਉਨ੍ਹਾਂ ਨੂੰ ਇੱਥੇ 21 ਦਿਨਾਂ ਲਈ ਕੁਆਰੰਟੀਨ ਵਿੱਚ ਰਹਿਣਾ ਪਿਆ ਹੈ।