ਤਾਲਿਬਾਨ ਦਾ ਖੌਫ਼: ਮਸ਼ਹੂਰ ਅਫਗਾਨ ਗਾਇਕ ਨੇ ਛੱਡਿਆ ਗਾਣਾ, ਹੁਣ ਵੇਚਣ ਲੱਗਾ ਸਬਜ਼ੀਆਂ...

ਕਾਬੁਲ : ਤਾਲਿਬਾਨ (Taliban) ਦੇ ਆਉਣ ਤੋਂ ਬਾਅਦ ਅਫਗਾਨਿਸਤਾਨ (Afghanistan) ਦੇ ਹਾਲਾਤ ਚੰਗੇ ਨਹੀਂ ਹਨ। ਸਭ ਕੁਝ ਬਦਲ ਗਿਆ ਹੈ। ਰਾਸ਼ਟਰਪਤੀ, ਸੰਸਦ ਮੈਂਬਰ, ਸਿਆਸਤਦਾਨ ਤੋਂ ਲੈ ਕੇ ਸੈਲੀਬ੍ਰਿਟੀ ਤੱਕ ਦੇਸ਼ ਛੱਡ ਰਹੇ ਹਨ। ਲੋਕ ਆਪਣੇ ਭਵਿੱਖ ਦੀ ਚਿੰਤਾ ਕਰਦੇ ਹੋਏ ਅਫਗਾਨਿਸਤਾਨ ਤੋਂ ਭੱਜ ਰਹੇ ਹਨ। ਅਫਗਾਨ ਤੋਂ ਦਿਲ ਨੂੰ ਛੂਹਣ ਵਾਲੀਆਂ ਸੋਸ਼ਲ ਮੀਡੀਆ 'ਤੇ ਤਸਵੀਰਾਂ ਅਤੇ ਵੀਡਿਓ ਸਾਹਮਣੇ ਆ ਰਹੀਆਂ ਹਨ। ਇਸ ਦੌਰਾਨ ਅਫਗਾਨਿਸਤਾਨ ਦੇ ਮਸ਼ਹੂਰ ਗਾਇਕ ਹਬੀਬੁੱਲਾ ਸ਼ਬਾਬ (Habibullah Shabab) ਨੇ ਵੀ ਤਾਲਿਬਾਨ ਦੇ ਡਰੋਂ ਗੀਤ ਗਾਉਣਾ ਛੱਡ ਦਿੱਤਾ ਹੈ ਅਤੇ ਸਬਜ਼ੀਆਂ ਵੇਚਣਾ ਸ਼ੁਰੂ ਕਰ ਦਿੱਤਾ ਹੈ।

ਹਬੀਬੁੱਲਾ ਸ਼ਬਾਬ ਨੇ ਕਿਹਾ ਕਿ ਤਾਲਿਬਾਨ ਨੇ ਸੰਗੀਤ 'ਤੇ ਪਾਬੰਦੀ ਲਗਾ ਦਿੱਤੀ ਹੈ। ਤਾਂ ਹੁਣ ਮੈਂ ਕਿਹੜਾ ਗਾਣਾ ਗਾਵਾਂਗਾ? ਮੈਂ ਸਿਰਫ ਆਪਣੇ ਛੋਟੇ ਕਾਰੋਬਾਰ ਤੇ ਪੂਰਾ ਧਿਆਨ ਕੇਂਦਰਤ ਕਰਨਾ ਚਾਹੁੰਦਾ ਹਾਂ। ਉਹ ਕਹਿੰਦਾ ਹੈ ਕਿ ਹੁਣ ਗਾਇਕੀ ਦਾ ਕਾਰੋਬਾਰ ਇੱਥੇ ਪੂਰੀ ਤਰ੍ਹਾਂ ਠੱਪ ਹੋ ਗਿਆ ਜਾਪਦਾ ਹੈ, ਇਸ ਲਈ ਕਿਸੇ ਨੂੰ ਵੀ ਅਜਿਹੀ ਸਥਿਤੀ ਵਿੱਚ ਕੰਮ ਕਰਨਾ ਪਏਗਾ।

ਹਬੀਬੁੱਲਾ ਸ਼ਬਾਬ ਹੈਲਮੰਡ ਦੇ ਪ੍ਰਮੁੱਖ ਕਲਾਕਾਰ ਅਤੇ ਗਾਇਕ ਹਨ। ਉਨ੍ਹਾਂ ਕਿਹਾ ਕਿ ਤਾਲਿਬਾਨ ਦੇ ਕਬਜ਼ੇ ਤੋਂ ਬਾਅਦ ਸਾਰੇ ਕਲਾਕਾਰ ਇੱਥੋਂ ਭੱਜ ਗਏ ਹਨ। ਇਸ ਤੋਂ ਇਹ ਸਪਸ਼ਟ ਹੈ ਕਿ ਲੋਕ ਹੁਨਰ ਦੀ ਬਜਾਏ ਸ਼ਾਂਤੀ ਨਾਲ ਜੀਵਨ ਬਤੀਤ ਕਰਨਾ ਚਾਹੁੰਦੇ ਹਨ।

ਇਸ ਤੋਂ ਪਹਿਲਾਂ ਅਫਗਾਨ ਪੌਪ ਸਟਾਰ ਆਰੀਆਨਾ ਸਈਦ ਵੀ ਕਾਬੁਲ ਛੱਡ ਚੁੱਕੀ ਸੀ। ਉਹ ਹੁਣ ਅਮਰੀਕਾ ਵਿੱਚ ਹੈ। ਉਨ੍ਹਾਂ ਨੇ ਅਮਰੀਕੀ ਸਰਕਾਰ ਨੂੰ ਪਾਕਿਸਤਾਨ ਨੂੰ ਫੰਡ ਦੇਣ ਤੋਂ ਰੋਕਣ ਦੀ ਅਪੀਲ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਪਾਕਿਸਤਾਨ ਆਈਐਸਆਈਐਸ ਅਤੇ ਤਾਲਿਬਾਨ ਲਈ ਅੱਤਵਾਦੀ ਪੈਦਾ ਕਰਦਾ ਹੈ।

ਅਫਗਾਨਿਸਤਾਨ ਵਿੱਚ ਹਫੜਾ -ਦਫੜੀ ਦੇ ਵਿਚਕਾਰ, ਮਸ਼ਹੂਰ ਮਹਿਲਾ ਫਿਲਮ ਨਿਰਦੇਸ਼ਕ ਸਹਾਰਾ ਕਰੀਮੀ ਨੇ ਵੀ ਦੇਸ਼ ਛੱਡ ਦਿੱਤਾ ਹੈ। ਉਹ ਇਸ ਵੇਲੇ ਯੂਕਰੇਨ ਦੀ ਰਾਜਧਾਨੀ ਕਿਯੇਵ ਵਿੱਚ ਹੈ। ਉਸਨੇ ਪਹਿਲਾਂ ਕਾਬੁਲ ਦੀਆਂ ਗਲੀਆਂ ਵਿੱਚ ਘੁੰਮਦਾ ਇੱਕ ਵੀਡੀਓ ਰਿਕਾਰਡ ਕੀਤਾ ਸੀ ਅਤੇ ਉੱਥੋਂ ਦੀ ਸਥਿਤੀ ਬਾਰੇ ਦੱਸਿਆ ਸੀ।

ਸਹਾਰਾ ਕਰੀਮੀ ਨੇ ਦੱਸਿਆ ਕਿ ਅਫਗਾਨਿਸਤਾਨ ਦੀ ਸਥਿਤੀ ਡਰਾਉਣੀ ਹੈ। ਇਹ ਬਹੁਤ ਮਹੱਤਵਪੂਰਨ ਹੈ ਕਿ ਇਨ੍ਹਾਂ ਘਟਨਾਵਾਂ ਦਾ ਦਸਤਾਵੇਜ਼ੀਕਰਨ ਕੀਤਾ ਜਾਵੇ, ਤਾਂ ਜੋ ਆਉਣ ਵਾਲੇ ਸਮੇਂ ਵਿੱਚ ਦੁਨੀਆ ਅਫਗਾਨਿਸਤਾਨ ਦੇ ਇਸ ਮੁਸ਼ਕਲ ਸਮੇਂ ਨੂੰ ਨਾ ਭੁੱਲੇ।