ਦੁਬਈ ਦੇ ਰਾਜੇ ਦੀ ਪਤਨੀ ਲਾਪਤਾ, ਨਾਲ ਲੈ ਆਏ 271 ਕਰੋੜ ਰੁਪਏ

ਦੁਬਈ ਦੇ ਅਰਬਪਤੀ ਸ਼ਾਸਕ ਦੀ ਛੇਵੀਂ ਪਤਨੀ ਹਯਾ ਕਰੋੜਾਂ ਰੁਪਏ ਤੇ ਦੋਵਾਂ ਬੱਚਿਆਂ ਨੂੰ ਲੈ ਕੇ ਲਾਪਤਾ ਹੋ ਗਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਉਹ ਘਰ ਛੱਡਣ ਸਮੇਂ ਆਪਣੇ ਨਾਲ 31 ਮਿਲੀਅਨ ਪੌਂਡ (271 ਕਰੋੜ ਰੁਪਏ) ਲੈ ਗਈ।

ਸ਼ੇਖ਼ ਮੁਹੰਮਦ ਦੁਬਈ ਦੇ ਸ਼ਾਸਕ, ਯੂਏਈ ਦੇ ਉਪ ਰਾਸ਼ਟਰਪਤੀ ਤੇ ਪ੍ਰਧਾਨ ਮੰਤਰੀ ਹਨ। ਉਹ ਦੁਨੀਆਂ ਦੇ ਸਭ ਤੋਂ ਅਮੀਰ ਵਿਅਕਤੀਆਂ 'ਚੋਂ ਇੱਕ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਹਯਾ ਇਸ ਸਮੇਂ ਲੰਡਨ 'ਚ ਹੋ ਸਕਦੀ ਹੈ। ਹਯਾ ਆਪਣੇ ਪਤੀ ਸ਼ੇਖ਼ ਮੁਹੰਮਦ ਤੋਂ ਤਲਾਕ ਚਾਹੁੰਦੀ ਹੈ। ਹਯਾ ਆਪਣੇ ਨਾਲ ਧੀ ਜ਼ਲੀਲਾ (11) ਤੇ ਪੁੱਤਰ ਜ਼ਾਇਦ (7) ਲੈ ਗਈ ਹੈ। ਇਹ ਵੀ ਚਰਚਾ ਹੈ ਕਿ ਉਸ ਨੇ ਜਰਮਨੀ 'ਚ ਸਰਕਾਰ ਤੋਂ ਸਿਆਸੀ ਸ਼ਰਨ ਮੰਗੀ ਹੈ।

ਬ੍ਰਿਟੇਨ ਦੇ ਆਕਸਫੋਰਡ ਯੂਨੀਵਰਸਿਟੀ ਤੋਂ ਪੜ੍ਹੀ ਹਯਾ ਨੂੰ 20 ਮਈ ਤੋਂ ਬਾਅਦ ਨਹੀਂ ਵੇਖਿਆ ਗਿਆ। ਉਹ ਸਮਾਜਕ ਕਾਰਜਾਂ 'ਚ ਵੀ ਫਰਵਰੀ ਤੋਂ ਨਜ਼ਰ ਨਹੀਂ ਆ ਰਹੀ ਸੀ।

ਅਰਬ ਮੀਡੀਆ ਨੇ ਸੂਤਰਾਂ ਦੇ ਹਵਾਲੇ ਨਾਲ ਦੱਸਿਆ ਹੈ ਕਿ ਹਯਾ ਨੂੰ ਦੁਬਈ ਤੋਂ ਨਿਕਲਣ 'ਚ ਜਰਮਨੀ ਦੇ ਇੱਕ ਡਿਪਲੋਮੈਟ ਨੇ ਮਦਦ ਕੀਤੀ ਹੈ।

ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਜਰਮਨ ਅਧਿਕਾਰੀਆਂ ਨੇ ਹਯਾ ਦੀ ਵਾਪਸੀ ਲਈ ਸ਼ੇਖ਼ ਮੁਹੰਮਦ ਬਿਨ ਰਾਸ਼ਿਦ ਅਲ ਮਖ਼ਤੂਮ ਦੀ ਬੇਨਤੀ ਨੂੰ ਠੁਕਰਾ ਦਿੱਤਾ ਹੈ। ਇਸ ਕਾਰਨ ਦੋਵਾਂ ਦੇਸ਼ਾਂ ਵਿਚਕਾਰ ਕੂਟਨੀਤਕ ਸੰਕਟ ਪੈਦਾ ਹੋ ਗਿਆ ਹੈ।

ਇਸ ਤੋਂ ਪਹਿਲਾਂ ਸ਼ੇਖ਼ ਦੀ ਬੇਟੀ ਰਾਜਕੁਮਾਰੀ ਲਤੀਫਾ ਨੇ ਵੀ ਦੇਸ਼ ਛੱਡ ਕੇ ਭੱਜਣ ਦੀ ਕੋਸ਼ਿਸ਼ ਕੀਤੀ ਸੀ। ਦੱਸਿਆ ਗਿਆ ਸੀ ਕਿ ਉਨ੍ਹਾਂ ਨੂੰ ਗੋਆ ਕੋਲ ਭਾਰਤੀ ਕੋਸਟਗਾਰਡ ਨੇ ਫੜ ਲਿਆ ਸੀ ਤੇ ਇਸ ਤੋਂ ਬਾਅਦ ਉਨ੍ਹਾਂ ਨੂੰ ਯੂਏਈ ਦੇ ਸ਼ਾਹੀ ਪਰਿਵਾਰ ਹਵਾਲੇ ਕਰ ਦਿੱਤਾ ਗਿਆ ਸੀ।