Elon Musk ਦਾ ਦਾਅਵਾ, ਇਸ ਸਾਲ ਦੇ ਅਖੀਰ ਤੱਕ ਮਨੁੱਖ ਦੇ ਦਿਮਾਗ 'ਚ ਕੰਪਿਊਟਰ ਚਿੱਪ ਲਗਾ ਦਿੱਤੀ ਜਾਵੇਗੀ

ਟੈੱਸਲਾ ਅਤੇ ਸਪੇਸ ਐਕਸ ਵਰਗੀਆਂ ਕੰਪਨੀਆਂ ਦੇ ਮਾਲਕ ਐਲਨ ਮਸਕ ਨੇ ਕਿਹਾ ਹੈ ਕਿ ਉਨ੍ਹਾਂ ਦੀ ਕੰਪਨੀ ਨਿਊਰਾਲਿੰਕ ਇਸ ਸਾਲ ਦੇ ਅੰਤ ਤੱਕ ਮਨੁੱਖੀ ਅਜ਼ਮਾਇਸ਼ਾਂ ਸ਼ੁਰੂ ਕਰੇਗੀ। ਯਾਨੀ ਛੇਤੀ ਹੀ ਐਲਨ ਮਸਕ ਦੀ ਕੰਪਨੀ ਮਨੁੱਖ ਦੇ ਦਿਮਾਗ ਵਿਚ ਲੱਗਣ ਵਾਲੀ ਇਕ ਚਿੱਪ ਬਣਾਏਗੀ ਅਤੇ ਇਸਨੂੰ ਮਨੁੱਖੀ ਦਿਮਾਗ ਵਿਚ ਲਗਾਉਣ ਦੀ ਪ੍ਰਕਿਰਿਆ ਵੀ ਸ਼ੁਰੂ ਕਰੇਗੀ।

ਤੁਹਾਨੂੰ ਦੱਸ ਦਈਏ ਕਿ ਇਹ ਚਿਪ ਕੰਪਿਊਟਰ ਨਾਲ ਕੁਨੈਕਟ ਕੀਤੀ ਜਾਏਗੀ। ਐਲਨ ਮਸਕ ਨੇ ਟਵਿੱਟਰ ਉੱਤੇ ਇੱਕ ਉਪਭੋਗਤਾ ਦੇ ਟਵੀਟ ਦੇ ਜਵਾਬ ਵਿੱਚ ਚਿੱਪ ਦੀ ਲਗਾਉਣ ਬਾਰੇ ਜਾਣਕਾਰੀ ਦਿੱਤੀ। ਦਰਅਸਲ, ਇੱਕ ਟਵਿੱਟਰ ਉਪਭੋਗਤਾ ਨੇ ਮਸਕ ਨੂੰ ਦੱਸਿਆ ਕਿ ਇਕ ਹਾਦਸੇ ਤੋਂ ਬਾਅਦ ਉਸਨੂੰ ਪਿਛਲੇ ਕਈ ਸਾਲਾਂ ਤੋਂ ਅਧਰੰਗ ਹੈ, ਇਸ ਲਈ ਉਹ ਹਮੇਸ਼ਾਂ ਕਲੀਨਿਕਲ ਅਜ਼ਮਾਇਸ਼ਾਂ ਲਈ ਮੌਜੂਦ ਹੈ।

ਇਸਦੇ ਜਵਾਬ ਵਿੱਚ ਮਸਕ ਨੇ ਕਿਹਾ ਕਿ ਨਿਊਰਾਲਿੰਕ ਬਹੁਤ ਤੇਜ਼ੀ ਨਾਲ ਕੰਮ ਕਰ ਰਿਹਾ ਹੈ। ਜੇ ਸਭ ਕੁਝ ਠੀਕ ਰਿਹਾ, ਤਾਂ ਅਸੀਂ ਇਸ ਸਾਲ ਦੇ ਅੰਤ ਤੱਕ ਮਨੁੱਖੀ ਅਜ਼ਮਾਇਸ਼ ਸ਼ੁਰੂ ਕਰਾਂਗੇ।

ਐਲਨ ਮਸਕ ਦਾ ਇਹ ਪ੍ਰਾਜੈਕਟ ਸਾਲ 2016 ਵਿਚ ਸ਼ੁਰੂ ਕੀਤਾ ਗਿਆ ਸੀ। ਮਸਕ ਨੇ ਇਸ ਬਾਰੇ 2019 ਵਿਚ ਇਕ ਬਿਆਨ ਵੀ ਦਿੱਤਾ ਸੀ ਕਿ 2020 ਦੇ ਅੰਤ ਤਕ ਉਹ ਮਨੁੱਖਾਂ 'ਤੇ ਟੈਸਟਿੰਗ ਸ਼ੁਰੂ ਕਰ ਦੇਣਗੇ।

ਹਾਲ ਹੀ ਵਿਚ ਮਸਕ ਨੇ ਜਾਣਕਾਰੀ ਦਿੱਤੀ ਸੀ ਕਿ ਨਿਊਰਾਲਿੰਕ ਨੇ ਬਾਂਦਰ ਦੇ ਦਿਮਾਗ ਵਿਚ ਚਿੱਪ ਲਗਾਉਣ ਲਈ ਨੈਨੋ ਤਕਨਾਲੋਜੀ ਦੀ ਵਰਤੋਂ ਕੀਤੀ ਸੀ। ਮਸਕਟ ਦੇ ਅਨੁਸਾਰ ਇੱਕ ਵਾਇਰਲੈੱਸ ਚਿੱਪ ਦੇ ਜ਼ਰੀਏ ਬਾਂਦਰ ਆਪਣੇ ਦਿਮਾਗ ਨਾਲ ਹੀ ਵੀਡੀਓ ਗੇਮ ਖੇਡ ਸਕਦਾ ਹੈ। ਨਿਊਰਾਲਿੰਕ ਨੇ ਹੋਰ ਜਾਨਵਰਾਂ 'ਤੇ ਵੀ ਚਿੱਪ ਦੀ ਟੈਸਟਿੰਗ ਕੀਤੀ ਹੈ। ਪਿਛਲੇ ਸਾਲ ਇਕ ਸੂਰ ਦੇ ਦਿਮਾਗ ਵਿੱਚ ਇੱਕ ਚਿੱਪ ਲਗਾ ਦਿੱਤੀ ਸੀ।

ਮਸਕ ਨੇ ਆਪਣੇ ਬਿਆਨ ਵਿੱਚ ਕਿਹਾ ਸੀ ਕਿ ਅਧਰੰਗ ਦੀ ਸਮੱਸਿਆ ਨੂੰ ਇੱਕ ਚਿੱਪ ਦੇ ਜ਼ਰੀਏ ਹੱਲ ਕੀਤਾ ਜਾ ਸਕਦਾ ਹੈ, ਨਾਲ ਹੀ ਮਨੁੱਖ ਨੂੰ ਟੈਲੀਪੈਥੀ ਦੀ ਸ਼ਕਤੀ ਵੀ ਦਿੱਤੀ ਜਾ ਸਕਦੀ ਹੈ। ਕੁਝ ਸਮਾਂ ਪਹਿਲਾਂ ਮਸਕ ਨੇ ਨਿਊਰਾਲਿੰਕ ਵਿਚ ਨੌਕਰੀ ਦੇ ਸੰਬੰਧ ਵਿਚ ਸੋਸ਼ਲ ਮੀਡੀਆ 'ਤੇ ਇਕ ਪੋਸਟ ਵੀ ਪੋਸਟ ਕੀਤਾ ਸੀ।