10 ਸਾਲ ਤੱਕ ਲੜਕਾ ਬਣ ਤਾਲਿਬਾਨ ਦੀ ਅੱਖੀਂ ਘੱਟਾ ਪਾਉਂਦੀ ਰਹੀ ਲੜਕੀ, ਮਕਸਦ ਪੂਰਾ ਕਰ ਛੱਡਿਆ ਦੇਸ਼

ਨਾਦੀਆ ਗੁਲਾਮ ਨੇ ਤਾਲਿਬਾਨ ਦੀਆਂ ਅੱਖਾਂ ਵਿੱਚ ਘੱਟਾ ਪਾ ਆਪਣੀ ਜ਼ਿੰਦਗੀ ਦੇ 10 ਸਾਲ ਪੁਰਸ਼ ਦੀ ਤਰ੍ਹਾਂ ਜਿੰਦਗੀ ਜਿਊਂਈ। ਉਹ ਅਫਗਾਨਿਸਤਾਨ ਦੀ ਨਾਗਰਿਕ ਸੀ ਅਤੇ ਤਾਲਿਬਾਨ ਦੇ ਸੱਤਾ ਵਿੱਚ ਆਉਣ ਤੋਂ ਬਾਅਦ ਉਸ ਨੂੰ ਨਾ ਤਾਂ ਪੜ੍ਹਨ ਦੀ ਇਜਾਜ਼ਤ ਸੀ ਅਤੇ ਨਾ ਹੀ ਕੰਮ ਕਰਨ ਦੀ। ਛੋਟੀ ਉਮਰ ਵਿੱਚ ਨਾਦੀਆ ਨੂੰ ਆਪਣਾ ਘਰ ਚਲਾਉਣ ਲਈ ਝੂਠ ਬੋਲਣਾ ਪਿਆ, ਜਿਸ ਨਾਲ ਹਰ ਪਲ ਉਸ ਦੀ ਜਾਨ ਨੂੰ ਖਤਰਾ ਸੀ।

ਨਾਦੀਆ ਦੀ ਕਹਾਣੀ ਬਹੁਤ ਖਤਰਨਾਕ ਹੈ। ਜਦੋਂ ਉਹ 8 ਸਾਲਾਂ ਦੀ ਸੀ, ਉਸ ਦੇ ਘਰ ਬੰਬ ਡਿੱਗਿਆ ਸੀ। ਇਸ ਹਮਲੇ ਵਿੱਚ ਨਾਦੀਆ ਦਾ ਭਰਾ ਮਾਰਿਆ ਗਿਆ ਸੀ ਅਤੇ ਉਹ ਖੁਦ ਜ਼ਖਮੀ ਹੋ ਗਈ ਸੀ। ਨਾਦੀਆ ਦੱਸਦੀ ਹੈ ਕਿ ਉਹ ਆਪਣੇ ਆਲੇ ਦੁਆਲੇ ਦੇ ਲੋਕਾਂ ਨੂੰ ਹਸਪਤਾਲ ਵਿੱਚ ਵੇਖ ਕੇ ਹੈਰਾਨ ਸੀ, ਕਿਵੇਂ ਜੰਗ ਲੋਕਾਂ ਦੀ ਜ਼ਿੰਦਗੀ ਨੂੰ ਬਰਬਾਦ ਕਰਦੀ ਹੈ।

ਆਪਣੇ ਆਲੇ ਦੁਆਲੇ ਦੇ ਹਾਲਾਤ ਨੂੰ ਦੇਖਦੇ ਹੋਏ ਨਾਦੀਆ ਨੇ ਅਜਿਹਾ ਫੈਸਲਾ ਲਿਆ, ਜੋ ਨਾ ਸਿਰਫ ਮੁਸ਼ਕਲ ਸੀ ਬਲਕਿ ਹਰ ਕਦਮ ਉਤੇ ਖਤਰਾ ਵੀ ਸੀ। 11 ਸਾਲ ਦੀ ਉਮਰ ਵਿੱਚ ਨਾਦੀਆ ਨੇ ਆਪਣੀ ਪਛਾਣ ਖਤਮ ਕਰ ਦਿੱਤੀ ਅਤੇ ਇੱਕ ਲੜਕੇ ਵਜੋਂ ਰਹਿਣ ਲੱਗੀ। ਉਸ ਨੇ ਫੈਸਲਾ ਕੀਤਾ ਸੀ ਕਿ ਉਸ ਨੂੰ ਆਪਣੇ ਹੱਕ ਲਈ ਲੜਨਾ ਪਏਗਾ ਅਤੇ ਉਹ ਪਿੱਛੇ ਨਹੀਂ ਹਟੇਗੀ।

ਨਾਦੀਆ ਗੁਲਾਮ ਇੰਨੀ ਛੋਟੀ ਉਮਰ ਵਿੱਚ ਬਹੁਤ ਵੱਡਾ ਜੋਖਮ ਲੈ ਰਹੀ ਸੀ। ਉਹ ਆਪਣੇ ਛੋਟੇ ਭਰਾ ਦੀ ਪਛਾਣ ਬਣਾ ਕੇ ਦੁਨੀਆ ਦੇ ਸਾਹਮਣੇ ਸੀ। ਨਾਦੀਆ ਨੇ ਤਾਲਿਬਾਨ ਵਰਗੇ ਖਤਰਨਾਕ ਸ਼ਾਸਨ ਦੇ ਦੌਰਾਨ ਵੀ ਆਪਣੇ ਮਕਸਦ ਲਈ ਸਭ ਕੁਝ ਝੱਲਿਆ। ਕਈ ਵਾਰ ਉਸ ਦਾ ਭੇਦ ਖੁੱਲ੍ਹਣ ਵਾਲਾ ਸੀ ਕਿ ਉਹ ਆਪਣੀ ਕਿਸਮਤ ਦੇ ਕਾਰਨ ਬਚ ਗਈ ਸੀ।

ਨਾਦੀਆ ਮੁੰਡਿਆਂ ਦੇ ਕੱਪੜੇ ਪਾ ਕੇ ਕੰਮ ਉਤੇ ਜਾਂਦੀ ਸੀ। ਉਹ ਕਹਿੰਦੀ ਹੈ ਕਿ ਕਈ ਵਾਰ ਉਹ ਭੁੱਲ ਗਈ ਜਾਂਦੀ ਸੀ ਕਿ ਉਹ ਇੱਕ ਕੁੜੀ ਹੈ।10 ਸਾਲਾਂ ਤੋਂ ਉਸ ਨੇ ਪਰਿਵਾਰ ਨੂੰ ਵਿੱਤੀ ਸਹਾਇਤਾ ਪ੍ਰਦਾਨ ਕਰਨ ਲਈ ਸੰਘਰਸ਼ ਕੀਤਾ। ਆਖਰਕਾਰ, 15 ਸਾਲਾਂ ਬਾਅਦ ਨਾਦੀਆ ਇੱਕ ਐਨਜੀਓ ਦੀ ਸਹਾਇਤਾ ਨਾਲ ਦੇਸ਼ ਤੋਂ ਬਾਹਰ ਨਿਕਲਣ ਵਿੱਚ ਕਾਮਯਾਬ ਹੋ ਗਈ।

ਉਹ ਸਪੇਨ ਵਿੱਚ ਇੱਕ ਅਫਗਾਨ ਸ਼ਰਨਾਰਥੀ ਵਜੋਂ ਜੀਵਨ ਬਤੀਤ ਕਰ ਰਹੀ ਹੈ। ਪੱਤਰਕਾਰ Agnes Rotge ਨਾਲ ਮਿਲ ਕੇ ਉਸ ਨੇ ਆਪਣੀ ਜ਼ਿੰਦਗੀ ਉਤੇ ਅਧਾਰਤ ਇੱਕ ਕਿਤਾਬ ਵੀ ਲਿਖੀ ਹੈ। ਨਾਦੀਆ ਕਈ ਸਾਲਾਂ ਤੋਂ ਕਹਿ ਰਹੀ ਹੈ ਕਿ ਤਾਲਿਬਾਨ ਅਫਗਾਨਿਸਤਾਨ ਤੋਂ ਕਿਤੇ ਵੀ ਨਹੀਂ ਗਏ ਹਨ। ਉਹ ਇਹ ਵੀ ਦੋਸ਼ ਲਾਉਂਦੀ ਰਹੀ ਹੈ ਕਿ ਅਮਰੀਕਾ ਅਤੇ ਹੋਰ ਦੇਸ਼ ਅਫਗਾਨਿਸਤਾਨ ਦੇ ਲੋਕਾਂ ਨੂੰ ਹਥਿਆਰ ਸੌਂਪ ਰਹੇ ਹਨ ਅਤੇ ਉਨ੍ਹਾਂ ਨੂੰ ਧੋਖਾ ਦੇ ਰਹੇ ਹਨ। (All Photo Credit- Instagram/Nadia Ghulam)