ਹੁਣ ਨਵੀਂ ਨੰਬਰ ਪਲੇਟ ਨਾ ਲਾਉਣ ਤੇ ਟੋਲ ਟੈਕਸ ਨਾ ਦੇਣ ਵਾਲਿਆਂ 'ਤੇ ਹੋਵੇਗੀ ਕਾਨੂੰਨੀ ਕਾਰਵਾਈ! ਜਲਦ ਬਦਲਣਗੇ ਨਿਯਮ

ਸੂਤਰਾਂ ਮੁਤਾਬਕ ਕੇਂਦਰ ਸਰਕਾਰ ਜਲਦ ਹੀ ਟੋਲ ਟੈਕਸ ਨਾਲ ਜੁੜੇ ਨਿਯਮਾਂ ਵਿਚ ਬਦਲਾਅ ਕਰਨ ਦੀ ਤਿਆਰੀ ਕਰ ਰਹੀ ਹੈ। ਸਰਕਾਰ ਟੋਲ ਟੈਕਸ ਨਾਲ ਸਬੰਧਤ ਬਿੱਲ ਲਿਆ ਸਕਦੀ ਹੈ। ਕੇਂਦਰੀ ਮੰਤਰੀ ਪਹਿਲਾਂ ਵੀ ਕਈ ਵਾਰ ਸੰਕੇਤ ਦੇ ਚੁੱਕੇ ਹਨ ਕਿ ਆਉਣ ਵਾਲੇ ਦਿਨਾਂ ਵਿੱਚ ਟੋਲ ਟੈਕਸ ਵਸੂਲੀ ਦਾ ਸਾਰਾ ਕੰਮ ਟੈਕਨਾਲੋਜੀ ਰਾਹੀਂ ਕੀਤਾ ਜਾਵੇਗਾ।

ਨਿਤਿਨ ਗਡਕਰੀ ਨੇ ਹਾਲ ਹੀ ਵਿਚ ਕਿਹਾ ਸੀ ਕਿ ਹੁਣ ਟੋਲ ਪਲਾਜ਼ਾ ਨੂੰ ਹਟਾਉਣ ਅਤੇ ਕੈਮਰੇ ਲਗਾਉਣ ਦੀ ਯੋਜਨਾ ਹੈ। ਜਲਦੀ ਹੀ ਲੋਕਾਂ ਨੂੰ ਟੋਲ ਟੈਕਸ ਉਤੇ ਪੇਮੈਂਟ ਅਦਾ ਕਰਨ ਦੀ ਲੋੜ ਨਹੀਂ ਪਵੇਗੀ। ਹਾਈਵੇਅ 'ਤੇ ਗੱਡੀ ਚਲਾਉਣ ਲਈ ਕਾਰ ਨਾਲ ਜੁੜੇ ਬੈਂਕ ਖਾਤੇ ਤੋਂ ਸਿੱਧਾ ਟੈਕਸ ਕੱਟਿਆ ਜਾਵੇਗਾ।

ਗਡਕਰੀ ਨੇ ਕਿਹਾ ਕਿ ਸਾਲ 2019 ਵਿੱਚ ਇਸ ਸਬੰਧੀ ਇੱਕ ਨਿਯਮ ਬਣਾਇਆ ਗਿਆ ਸੀ ਕਿ ਸਾਰੇ ਵਾਹਨ ਕੰਪਨੀ ਦੁਆਰਾ ਫਿੱਟ ਨੰਬਰ ਪਲੇਟਾਂ ਦੇ ਨਾਲ ਆਉਣਗੇ। ਹੁਣ ਹਾਈਵੇਅ 'ਤੇ ਲੱਗੇ ਕੈਮਰੇ ਇਨ੍ਹਾਂ ਨੰਬਰ ਪਲੇਟਾਂ ਨੂੰ ਪੜ੍ਹ ਲੈਣਗੇ ਅਤੇ ਟੋਲ ਸਿੱਧੇ ਬੈਂਕ ਖਾਤੇ 'ਚੋਂ ਕੱਟਿਆ ਜਾਵੇਗਾ।

ਕੇਂਦਰੀ ਮੰਤਰੀ ਨੇ ਅੱਗੇ ਦੱਸਿਆ ਕਿ ਸਰਕਾਰ ਇਸ ਯੋਜਨਾ ਸਬੰਧੀ ਇੱਕ ਪਾਇਲਟ ਪ੍ਰੋਜੈਕਟ ਵੀ ਚਲਾ ਰਹੀ ਹੈ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਟੋਲ ਟੈਕਸ ਨਾ ਦੇਣ ਵਾਲਿਆਂ ਖ਼ਿਲਾਫ਼ ਜਲਦੀ ਕਾਨੂੰਨ ਲਿਆਉਣ ਦੀ ਲੋੜ ਹੈ।

ਮੌਜੂਦਾ ਸਮੇਂ ਵਿਚ ਟੋਲ ਪਲਾਜ਼ਾ ਛੱਡਣ ਅਤੇ ਟੋਲ ਨਾ ਦੇਣ ਵਾਲੇ ਵਾਹਨ ਮਾਲਕ ਨੂੰ ਸਜ਼ਾ ਦੇਣ ਦੀ ਕਾਨੂੰਨ ਵਿੱਚ ਕੋਈ ਵਿਵਸਥਾ ਨਹੀਂ ਹੈ। ਸਰਕਾਰ ਅਜਿਹੇ ਵਾਹਨਾਂ ਲਈ ਨਵਾਂ ਨਿਯਮ ਵੀ ਲਿਆ ਸਕਦੀ ਹੈ, ਜੋ ਨੰਬਰ ਪਲੇਟ ਨਾਲ ਛੇੜਛਾੜ ਕਰਦੇ ਹਨ। ਅਜਿਹੇ ਵਾਹਨਾਂ ਨੂੰ ਨਿਰਧਾਰਤ ਸਮੇਂ ਅੰਦਰ ਨੰਬਰ ਪਲੇਟਾਂ ਲਗਾਉਣ ਲਈ ਕਿਹਾ ਜਾਵੇਗਾ।