ਭਾਰੀ ਮੀਂਹ ਕਾਰਨ ਭਾਗੀਵਾਂਦਰ ਵਿੱਚ ਤਿੰਨ ਮਕਾਨ ਡਿੱਗੇ

ਇਲਾਕੇ 'ਚ ਪਏ ਰਿਕਾਰਡਤੋੜ ਮੀੰਹ ਨੇ ਕੁੱਝ ਘੰਟਿਆਂ ਵਿੱਚ ਹੀ ਪਿੰਡ ਭਾਗੀਵਾਂਦਰ ਦੇ ਬਠਿੰਡਾ ਰੋਡ ਨੂੰ ਝੀਲ 'ਚ ਤਬਦੀਲ ਕਰ ਦਿੱਤਾ ਉੱਥੇ ਹੀ ਪਿੰਡ ਵਿੱਚ ਤਿੰਨ ਗਰੀਬ ਮਜਦੂਰਾਂ ਦੇ ਘਰ ਭਾਰੀ ਮੀੰਹ ਕਾਰਣ ਡਿੱਗ ਗਏ।

ਹਾਲਾਂਕਿ ਘਟਨਾ ਵਿੱਚ ਕਿਸੇ ਜਾਨੀ ਨੁਕਸਾਨ ਹੋਣ ਦੀ ਖਬਰ ਨਹੀ ਲੇਕਿਨ ਘਰਾਂ ਦਾ ਸਮਾਨ ਛੱਤ ਦੇ ਮਲਬੇ ਹੇਠ ਦੱਬ ਕੇ ਖਰਾਬ ਹੋ ਗਿਆ।ਪਿੰਡ ਦੇ ਪੰਚ ਬੂਟਾ ਸਿੰਘ ਨੇ ਦੱਸਿਆ ਕਿ ਬੀਤੇ ਦਿਨ ਸਵੇਰ ਤੋਂ ਹੀ ਇਲਾਕੇ 'ਚ ਪੈ ਰਹੇ ਭਾਰੀ ਮੀਂਹ ਦੇ ਕਾਰਣ ਦਿਹਾੜੀ ਕਰਕੇ ਅਪਣੇ ਪਰਿਵਾਰਾਂ ਦਾ ਪੇਟ ਪਾਲਦੇ ਤਿੰਨ ਪਰਿਵਾਰ ਪਾਲ ਸਿੰਘ ਪੁੱਤਰ ਖੇਮਾ ਸਿੰਘ ,ਲਿੱਲੂ ਸਿੰਘ ਅਤੇ ਵਿਧਵਾ ਨਸੀਬ ਕੌਰ ਪਤਨੀ ਸਵਰਗਵਾਸੀ ਰਤਨ ਸਿੰਘ ਦਾ ਘਰ ਢਹਿ ਢੇਰੀ ਹੋ ਗਿਆ।

ਉਨ੍ਹਾਂ ਦੱਸਿਆ ਕੇ ਮਕਾਨ ਦੀ ਛੱਤ ਡਿੱਗਣ ਕਾਰਨ ਮਜਦੂਰ ਪਰਿਵਾਰ ਵਾਲ ਵਾਲ ਬਚ ਗਿਆ ਅਤੇ ਘਰ 'ਚ ਪਿਆ ਉਸਦਾ ਘਰੇਲੂ ਸਾਮਾਨ ਪੂਰੀ ਤਰਾਂ ਨਾਲ ਨੁਕਸਾਨਿਆ ਗਿਆ।ਪਿੰਡ ਦੀ ਪੰਚਾਇਤ ਤੇ ਪਿੰਡ ਵਾਸੀਆਂ ਨੇ ਸਰਕਾਰ ਤੋਂ ਗਰੀਬ ਪਰਿਵਾਰਾਂ ਦੇ ਹੋਏ ਨੁਕਸਾਨ ਬਦਲੇ ਯੋਗ ਮੁਆਵਜਾ ਦੇਣ ਦੀ ਮੰਗ ਕੀਤੀ ਹੈ।( ਮਨੀਸ਼ ਗਰਗ ਦੀ ਰਿਪੋਰਟ)