ਸੰਗੀਤ ਦੀ MA ਹੋਣ ਦੇ ਬਾਵਜੂਦ ਵੀ ਪੈਂਚਰ ਲਾ ਕੇ ਪਰਿਵਾਰ ਪਾਲ ਰਿਹਾ ਅੰਗਹੀਣ ਸ਼ਖ਼ਸ

ਸਮਰਾਲਾ( ਗੁਰਦੀਪ ਸਿੰਘ) : ਪੰਜਾਬ ਦੇ ਨਵੇਂ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੇ ਕੁਰਸੀ ਤੇ ਬੈਠਦੇ ਹੀ ਗਰੀਬ ਪਰਿਵਾਰਾਂ ਲਈ ਵੱਡੇ ਐਲਾਨ ਕਰ ਦਿੱਤੇ। ਪਾਣੀ, ਬਿਜਲੀ ਮਾਫ ਕਰਨ ਦਾ ਐਲਾਨ ਕੀਤਾ ਗਿਆ। ਹੁਣ ਤੁਹਾਨੂੰ ਇੱਕ ਤਸਵੀਰ ਸਮਰਾਲਾ ਤੋਂ ਦਿਖਾਵਾਂਗੇ ਕਿ ਜਿੱਥੇ ਇੱਕ ਪੜ੍ਹਿਆ ਲਿਖਿਆ ਅੰਗਹੀਣ ਨੌਜਵਾਨ ਸਰਕਾਰ ਦੀ ਅਣਦੇਖੀ ਕਰਕੇ ਪੈਂਚਰ ਲਾਉਣ ਲਈ ਮਜਬੂਰ ਹੈ।

ਪਤਨੀ ਅਤੇ ਦੋ ਬੱਚਿਆਂ ਨਾਲ ਰਹਿੰਦੇ ਪਰਿਵਾਰ ਦੇ ਸਿਰ ਉੱਪਰ ਛੱਤ ਤੱਕ ਨਹੀ ਹੈ। ਅਜਿਹੇ ਮਾਮਲੇ ਸਰਕਾਰ ਦੀਆਂ ਅੱਖਾਂ ਖੋਲਣ ਲਈ ਕਾਫੀ ਹਨ ਕਿ ਜਿਹੋ ਜਿਹੇ ਪੰਜਾਬ ਦਾ ਸੁਪਨਾ ਸ਼ਹੀਦਾਂ ਨੇ ਦੇਖਿਆ ਸੀ ਉਹ ਹਾਲੇ ਕੋਸਾਂ ਦੂਰ ਹੈ। ਸਰਕਾਰ ਨੂੰ ਦਾਅਵਿਆਂ ਉੱਪਰ ਛੇਤੀ ਤੋਂ ਛੇਤੀ ਅਮਲੀਜਾਮਾ ਪਹਿਨਾਉਣਾ ਹੋਵੇਗਾ।

ਨਰੇਸ਼ ਸਿੰਘ ਨੂੰ ਵੇਖ ਮਨ ਵਿੱਚ ਇਹ ਸਵਾਲ ਜਰੂਰ ਉਠਦਾ ਹੈ ਕਿ ਅਪਾਹਜ ਨਰੇਸ ਸਿੰਘ ਹੈ ਯਾ ਸਾਡਾ ਸਿਸਟਮ ?, ਨਰੇਸ਼ ਸਿੰਘ ਨੇ ਦੱਸਿਆ ਕਿ ਉਹਨਾਂ ਨੇ ਮਿਉਜਿਕ ਦੀ ਐਮ.ਏ. ਯਾਨੀ ਮਾਸਟਰ ਡਿਗਰੀ ਕੀਤੀ ਹੋਈ ਹੈ।

ਨਰੇਸ਼ ਕੁਮਾਰ ਦੀ ਪਤਨੀ ਵੀ 12ਵੀਂ ਪਾਸ ਹੋਣ ਦੇ ਬਾਵਜੂਦ ਬੇਰੁਜਗਾਰ ਹੈ। ਉਹਨਾਂ ਨੇ ਕਿਹਾ ਕਿ ਉਸਦੇ ਪਤੀ ਨੂੰ ਸਰਕਾਰੀ ਨੌਕਰੀ ਤਾਂ ਕੀ ਮਿਲਣੀ ਸੀ ਬਲਕਿ ਅੰਗਹੀਣ ਹੋਣ ਕਰਕੇ ਕੋਈ ਪ੍ਰਾਈਵੇਟ ਸਕੂਲ ਵੀ ਉਹਨਾਂ ਨੂੰ ਨਹੀਂ ਰੱਖਦਾ। ਜੇਕਰ ਕੋਈ ਨੌਕਰੀ ਲਈ ਹਾਮੀ ਭਰਦਾ ਵੀ ਹੈ ਤਾਂ ਦੋ ਜਾਂ ਤਿੰਨ ਹਜਾਰ ਰੁਪਏ ਤਨਖਾਹ ਦੱਸ ਸ਼ੋਸ਼ਣ ਦੀ ਗੱਲ ਕਰਦਾ ਹੈ।

ਹਾਲਾਤ ਇੰਨੇ ਖਰਾਬ ਹੋ ਗਏ ਹਨ ਕਿ ਮਕਾਨ ਦੀ ਛੱਤ ਵੀ ਡਿੱਗ ਚੁੱਕੀ ਹੈ। ਮੀਂਹ ਕਣੀ ਤੋਂ ਬਚਣ ਲਈ ਟੀਨ ਪਾਇਆ ਹੋਇਆ ਹੈ। ਕੁੱਝ ਸਾਲ ਪਹਿਲਾਂ ਅਰਜੀ ਦੇ ਕੇ ਸਰਕਾਰ ਤੋਂ ਮਦਦ ਦੀ ਮੰਗ ਵੀ ਕੀਤੀ ਸੀ ਪਰ ਕਿਸੇ ਨੇ ਕੋਈ ਸੁਣਵਾਈ ਨਹੀਂ ਕੀਤੀ।

ਦੂਜੇ ਪਾਸੇ ਸਾਡੇ ਸਮਾਜ ਨੂੰ ਸਹਾਇਤਾ ਪਹੁੰਚਾਣ ਵਾਲੇ ਵੀ ਸਿਰਫ ਖਾਨਾਪੂਰਤੀ ਹੀ ਕਰਦੇ ਹਨ ਜਦੋਂ ਇਸ ਬਾਬਤ ਸਮਰਾਲਾ ਦੀ ਬੀਡੀਪੀਓ ਨਾਲ ਗੱਲ ਕੀਤੀ ਗਈ ਤਾ ਓਹਨਾ ਨੇ ਆਪਣਾ ਪੱਲਾ ਛੁਡਾਉਂਦਿਆ ਗੋਲਮੋਲ ਜਵਾਬ ਦਿੰਦੇ ਹੋਏ ਕਿਹਾ ਕਿ ਉਹਨਾਂ ਨੇ ਹਾਲੇ ਕੁਝ ਦਿਨ ਪਹਿਲਾਂ ਹੀ ਜੁਆਇਨ ਕੀਤਾ। ਉਹ ਚੈੱਕ ਕਰਨਗੇ ਕਿ ਕਦੋਂ ਅਰਜੀ ਆਈ ਹੈ ਅਤੇ ਜੋ ਵੀ ਸੰਭਵ ਹੋਇਆ ਉਹ ਮਦਦ ਕੀਤੀ ਜਾਵੇਗੀ।