10ਵੇਂ ਕੌਮੀ ਨਾਟਿਅਮ ਮੇਲੇ ਦੀਆਂ ਝਲਕੀਆਂ, 14 ਅਕਤੂਬਰ ਤੱਕ ਬਠਿੰਡਾ ਦੇ ‘ਬਲਵੰਤ ਗਾਰਗੀ ਓਪਨ ਥੀਏਟਰ ‘ਚ ਜਾਰੀ ਹਨ ਨਾਟਕ

ਬਠਿੰਡਾ: 10ਵੇਂ ਕੌਮੀ ਨਾਟਿਅਮ ਮੇਲੇ ਦੀ ਸ਼ੁਰੂਆਤ ਬਠਿੰਡਾ ਦੇ ‘ਬਲਵੰਤ ਗਾਰਗੀ ਓਪਨ ਏਅਰ ਥੀਏਟਰ’ ਵਿੱਚ ਹੋਈ। 15 ਦਿਨ ਦੇ ਇਸ ਨਾਟਕ ਮੇਲੇ ਦੇ ਪਹਿਲੇ ਦਿਨ ਡਾ. ਸਤੀਸ਼ ਕੁਮਾਰ ਵਰਮਾ ਦਾ ਲਿਖਿਆ ਅਤੇ ਕੀਰਤੀ ਕਿਰਪਾਲ ਦੁਆਰਾ ਨਿਰਦੇਸ਼ਿਤ ਮਹਾਰਾਜਾ ਰਣਜੀਤ ਸਿੰਘ ਦੇ ਜੀਵਨ ਅਤੇ ਸੋਚ ‘ਤੇ ਅਧਾਰਿਤ ਨਾਟਕ ‘ਲੋਕ ਮਨਾ ਦਾ ਰਾਜਾ’ ਦਾ ਸਫਲਤਾਪੂਰਵਕ ਮੰਚਨ ਕੀਤਾ ਗਿਆ।

10ਵੇਂ ਕੌਮੀ ਨਾਟਿਅਮ ਮੇਲੇ ਦੇ ਦੂਸਰੇ ਦਿਨ ਡਾ. ਜਸਪਾਲ ਕੌਰ ਦਿਉਲ ਦਾ ਨਿਰਦੇਸ਼ਿਤ ਨਾਟਕ ‘ਮੇਰੇ ਲੋਕ’ ਨੇ ਲੋਕਾਂ ਨੂੰ ਭਾਵੁਕ ਕਰ ਦਿੱਤਾ। ਕਲਾਕਾਰਾਂ ਵੱਲੋਂ ਸਿਸਟਮ ਅਤੇ ਸਟਰੈਸ ਦੀ ਚੱਕੀ ਵਿੱਚ ਪਿਸ ਰਹੇ ਲੋਕਾਂ ਦੇ ਦਰਦ ਦੀ ਬਾਖੂਬੀ ਪੇਸ਼ਕਾਰੀ ਕੀਤੀ ਗਈ।

ਨਾਟਕ ਦੇ ਤੀਜੇ ਦਿਨ ‘ਅੰਧੇਰ ਨਗਰੀ, ਚੌਪਟ ਰਾਜਾ’ ਨੇ ਦਰਸ਼ਕਾਂ ਨੂੰ ਹਸਾਉਂਦੇ-ਹਸਾਉਂਦੇ ਕੁਚੱਜੇ ਰਾਜ-ਪ੍ਰਬੰਧ ‘ਤੇ ਵਿਅੰਗ ਕੱਸਿਆ। ਇਹ ਨਾਟਕ ਭੋਪਾਲ ਤੋਂ ਪਹੁੰਚੀ ਟੀਮ ਨੇ ਖੇਡਿਆ। 1881 ਵਿੱਚ ਲਿਖਿਆ ਗਿਆ ਦੇਸ਼ ਦਾ ਪਹਿਲਾ ਨਾਟਕ ਸ਼ਹਿਰ ਵਾਸੀਆਂ ਨੂੰ ਦੇਖਣ ਨੂੰ ਮਿਲਿਆ।

ਮੇਲੇ ਦੇ ਚੌਥੇ ਦਿਨ ਹਰਿਆਣਵੀ ਕਾਮੇਡੀ ਨਾਟਕ ‘ਸਈਆਂ ਬਹੇ ਕੋਤਵਾਲ’ ਨੇ ਭ੍ਰਿਸ਼ਟਾਚਾਰ ਅਤੇ ਭਾਈ-ਭਤੀਜਾਵਾਦ ਨੂੰ ਰਗੜਾ ਲਾਇਆ। ਇਸਤੋਂ ਪਹਿਲਾਂ ਵਿਸ਼ੇਸ਼ ਤੌਰ ‘ਤੇ ਪੁੱਜੇ ਪੰਜਾਬ ਦੇ ਖਜ਼ਾਨਾ ਮੰਤਰੀ ਨੇ 10ਵੇਂ ਨਾਟਿਅਮ ਮੇਲੇ ‘ਤੇ 10 ਲੱਖ ਰੁ. ਗ੍ਰਾਂਟ ਦਾ ਐਲਾਨ ਕੀਤਾ। ਉਨ੍ਹਾਂ ਨੇ ਕੀਰਤੀ ਕਿਰਪਾਲ ਅਤੇ ਨਾਟਿਅਮ ਦੀ ਟੀਮ ਵੱਲੋਂ ਕਲਾ ਅਤੇ ਰੰਗ-ਮੰਚ ਨੂੰ ਪ੍ਰਫੁਲਿਤ ਕਰਨ ਲਈ ਕੀਤੇ ਜਾ ਰਹੇ ਉਪਰਾਲਿਆਂ ਦੀ ਸ਼ਲ਼ਾਂਘਾ ਕੀਤੀ।

ਨਾਟਕ ਮੇਲੇ ਦੇ ਛੇਵੇ ਦਿਨ, ਚੰਡੀਗੜ੍ਹ ਤੋਂ ਵਿਸ਼ੇਸ਼ ਤੋਰ ‘ਤੇ ਪਹੁੰਚੀ ਸੂਰਯਾਵੰਸ਼ੀ ਰੰਗ ਮੰਚ ਦੀ ਟੀਮ ਵੱਲੋਂ ਸੰਜੇ ਕੁਮਾਰ ਅਤੇ ਹੀਰਾ ਸਿੰਘ ਦਾ ਨਿਰਦੇਸ਼ਨਾ ਹੇਠ ਡਾ. ਸ਼ੰਕਰ ਸ਼ੇਸ਼ ਦਾ ਲਿਖਿਆ ਨਾਟਕ ‘ਏਕ ਔਰ ਦਰੋਣਾਚਾਰੀਆ’ ਪੇਸ਼ ਕੀਤਾ ਗਿਆ। ਨਾਟਕ ਦੌਰਾਨ ਵਰਤੇ ਗਏ ਸੈੱਟ ਡਿਜ਼ਾਇਨ, ਲਾਈਟ ਤੇ ਸਾਊਂਡ ਇਫੈਕਟ ਨੇ ਦਰਸ਼ਕਾਂ ਨੂੰ ਕੀਲ ਕੇ ਰੱਖ ਦਿੱਤਾ। ਨਾਟਕ ਦੀ ਕਹਾਣੀ ਵਿੱਚ ਮੋਜੂਦਾ ਸਿੱਖਿਆ ਢਾਂਚੇ ਦੀ ਤੁਲਨਾ ਮਹਾਂਭਾਰਤ ਦੇ ਸਮੇਂ ਨਾਲ ਕੀਤੀ ਗਈ, ਜਿਸਦਾ ਪ੍ਰਸ਼ੰਸਕਾਂ ਨੇ ਖੂਬ ਆਨੰਦ ਲਿਆ।