CM ਚੰਨੀ ਦੇ ਗੁਆਂਢੀ ਹਲਕਾ ‘ਚ ਜੋਰਾ ’ਤੇ ਨਜ਼ਾਇਜ ਮਾਇਨਿਗ, ਵਰਤੇ ਜਾ ਰਹੇ ਕਾਂਗਰਸ ਦਫ਼ਤਰ ਦੇ ਟੈਂਕਰ

ਸਮਰਾਲਾ( ਗੁਰਦੀਪ ਸਿੰਘ) : ਪੰਜਾਬ ਅੰਦਰ ਭਾਵੇਂ ਮੁੱਖਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਹੋਣ ਚਾਹੇ ਉਹਨਾਂ ਦੀ ਥਾਂ ਤੇ ਨਵੇਂ ਲਾਏ ਚਰਨਜੀਤ ਸਿੰਘ ਚੰਨੀ। ਪ੍ਰੰਤੂ ਰੇਤ ਮਾਫੀਆ ਨੂੰ ਕਿਸੇ ਦਾ ਕੋਈ ਡਰ ਨਹੀਂ ਹੈ। ਕੁੱਝ ਸਮਾਂ ਪਹਿਲਾਂ ਕੈਪਟਨ ਅਮਰਿੰਦਰ ਸਿੰਘ ਨੇ ਆਪਣੇ ਉੱਡਣ ਖਟੋਲੇ ਰਾਹੀਂ ਗੈਰ ਕਾਨੂੰਨੀ ਖੱਡਾਂ ਉੱਪਰ ਝਾਤੀ ਮਾਰਨ ਦਾ ਡਰਾਮਾ ਕੀਤਾ ਸੀ, ਜਿਸਦਾ ਕੋਈ ਅਸਰ ਸਾਮਣੇ ਨਹੀਂ ਆਇਆ। ਹੁਣ ਮੁੱਖਮੰਤਰੀ ਚਰਨਜੀਤ ਸਿੰਘ ਚੰਨੀ ਦੀਆਂ ਚੇਤਾਵਨੀਆਂ ਦੇ ਬਾਵਜੂਦ ਪੰਜਾਬ ਅੰਦਰ ਸਰੇਆਮ ਨਜਾਇਜ ਮਾਈਨਿੰਗ ਹੋ ਰਹੀ ਹੈ।

ਹੈਰਾਨੀ ਦੀ ਗੱਲ ਇਹ ਹੈ ਕਿ ਮੁੱਖਮੰਤਰੀ ਦੇ ਆਪਣੇ ਹਲਕੇ ਚਮਕੌਰ ਸਾਹਿਬ ਦੇ ਨਾਲ ਲੱਗਦੇ ਖੇਤਰ ਸਮਰਾਲਾ ਦੇ ਝਾੜ ਸਾਹਿਬ ਨੇੜੇ ਪਿੰਡ ਬਹਿਲੋਲਪੁਰ ਵਿਖੇ ਸਰੇਆਮ ਪੋਕਲੇਨ ਮਸ਼ੀਨਾਂ ਚਲਾ ਕੇ ਰੇਤਾ ਕੱਢਿਆ ਜਾ ਰਿਹਾ ਹੈ। ਸਥਾਨਕ ਪ੍ਰਸ਼ਾਸਨ ਵੀ ਮੂਕ ਦਰਸ਼ਕ ਬਣਿਆ ਹੋਇਆ ਹੈ। ਕਰੋੜਾਂ ਰੁਪਏ ਦੀ ਕਾਲੀ ਕਮਾਈ ਕੀਤੀ ਜਾ ਰਹੀ ਹੈ,ਜਿਸ ਤੇ ਅਕਾਲੀ ਦਲ ਨੇ ਵੀ ਸਵਾਲ ਚੁੱਕੇ ਹਨ,

ਹਨੇਰਗਰਦੀ ਤਾਂ ਐਨੀ ਹੈ ਕਿ ਕਾਂਗਰਸਿਆਂ ਵਲੋਂ ਮਾਇਨਿਗ ਲਈ ਕਾਂਗਰਸ ਦਫ਼ਤਰ ਦੇ ਟੈਂਕਰ ਦਾ ਵੀ ਇਸਤੇਮਾਲ ਕੀਤਾ ਜਾ ਰਿਹਾ ਹੈ।

ਤਸਵੀਰਾਂ ਵਿੱਚ ਤੁਸੀਂ ਦੇਖ ਸਕਦੇ ਹੋ ਕਿ ਕਿਸ ਤਰ੍ਹਾਂ ਜ਼ਮੀਨ ਦੀ ਖੁਦਾਈ ਕਰਕੇ ਮਿੱਟੀ ਅਤੇ ਰੇਤਾ ਕੱਢਿਆ ਜਾ ਰਿਹਾ ਹੈ। ਦਿਨ ਰਾਤ ਟਰਾਲੀਆਂ ਅਤੇ ਟਿੱਪਰ ਭਰੇ ਜਾਂਦੇ ਹਨ। ਕੋਈ ਰੋਕ ਟੋਕ ਨਹੀਂ ਹੈ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਸੱਤਾ ਧਿਰ ਕਾਂਗਰਸ ਦਾ ਇੱਕ ਪਾਣੀ ਵਾਲਾ ਟੈਂਕਰ ਇੱਥੇ ਖੜ੍ਹਾ ਕੀਤਾ ਹੋਇਆ ਹੈ ਜਿਸ ਉੱਪਰ ਲਿਖਿਆ ਹੋਇਆ ਹੈ ਕਿ ਸੰਪਰਕ ਕਰੋ ਕਾਂਗਰਸ ਦਫਤਰ ਸਮਰਾਲਾ।

ਨਜਾਇਜ ਮਾਈਨਿੰਗ ਵਾਲੀ ਥਾਂ ਉੱਪਰ ਖੜ੍ਹੇ ਕੀਤੇ ਇਸ ਟੈਂਕਰ ਉੱਪਰ ਲਿਖੀ ਇਸ ਸ਼ਬਦਾਵਲੀ ਦੇ ਕਈ ਅਰਥ ਨਿਕਲਦੇ ਹਨ। ਹੁਣ ਆਮ ਦੇਖਣ ਵਾਲਾ ਇਹੀ ਸੋਚਦਾ ਹੈ ਕਿ ਪਾਣੀ ਲੈਣ ਲਈ ਸੰਪਰਕ ਕਰਨਾ ਹੈ ਜਾਂ ਮਿੱਟੀ ਤੇ ਰੇਤਾ।ਇੱਥੇ ਨਜਾਇਜ ਮਾਈਨਿੰਗ ਕਰਕੇ ਆਲੇ ਦੁਆਲੇ ਦੇ ਕਿਸਾਨਾਂ ਦੀਆਂ ਫਸਲਾਂ ਤੇ ਜਮੀਨਾਂ ਬਰਬਾਦ ਹੋ ਰਹੀਆਂ ਹਨ। ਕਰੀਬ ਡੇਢ ਕਿਲੋਮੀਟਰ ਦਾ ਰਸਤਾ ਬਿਲਕੁਲ ਹੀ ਖਰਾਬ ਕਰ ਦਿੱਤਾ ਗਿਆ ਹੈ ਜਿਥੇ ਕਿ ਰਾਤ ਨੂੰ ਕੋਈ ਕਿਸਾਨ ਆਪਣੀ ਜਮੀਨ ਚ ਵੀ ਨਹੀਂ ਆ ਸਕਦਾ।

ਰੇਤ ਮਾਫੀਆ ਨੇ ਇਸ ਕਦਰ ਇਹ ਧੰਦਾ ਜਾਰੀ ਕੀਤਾ ਹੋਇਆ ਹੈ ਕਿ ਇਸਨੂੰ ਮਨਜੂਰੀ ਦੇ ਕਾਗਜ ਦਿਖਾ ਕੇ ਕਾਨੂੰਨਨ ਦੱਸ ਰਹੇ ਹਨ। ਜਦਕਿ ਮਨਜੂਰੀ ਕੇਵਲ 10 ਏਕੜ ਜ਼ਮੀਨ ਨੂੰ ਲੈਵਲ ਕਰਨ ਦੀ ਲਈ ਹੋਈ ਹੈ। ਲੈਵਲ ਕੀ ਕਰਨਾ ਸੀ ਇੱਥੇ ਤਾਂ 50 ਫੁੱਟ ਤੱਕ ਖੁਦਾਈ ਕਰ ਲਈ ਗਈ ਹੈ।

ਸਰੇਆਮ ਮਾਈਨਿੰਗ ਪਾਲਿਸੀ ਦੀਆਂ ਧੱਜੀਆਂ ਉਡਾਈਆਂ ਜਾ ਰਹੀਆਂ ਹਨ ਅਤੇ ਨਾਲ ਹੀ ਮੁੱਖਮੰਤਰੀ ਚਰਨਜੀਤ ਸਿੰਘ ਚੰਨੀ ਦੀ ਬੇਦਾਗ ਸਖਸੀਅਤ ਵਾਲੀ ਕਾਰਜਸ਼ੈਲੀ ਦੇ ਦਾਅਵੇ ਵੀ ਖੋਖਲੇ ਸਾਬਤ ਕੀਤੇ ਜਾ ਰਹੇ ਹਨ।

ਨਾਜਾਇਜ ਮਾਈਨਿੰਗ ਵਾਲੀ ਥਾਂ ਦੇ ਨਾਲ ਇੱਕ ਕਿਸਾਨ ਨੇ ਦੱਸਿਆ ਕਿ ਉਹਨਾਂ ਦੀਆਂ ਜ਼ਮੀਨਾਂ ਨੀਵੀਆਂ ਹੋ ਗਈਆਂ ਹਨ। ਟਿੱਪਰਾਂ ਨਾਲ ਖ਼ਾਲ ਟੁੱਟ ਜਾਂਦੇ ਹਨ ਉਹ ਤਾਂ ਆਪਣੀ ਫਸਲ ਬਚਾਉਂਦੇ ਹੀ ਰਹਿੰਦੇ ਹਨ। ਤਕੜੇ ਲੋਕ ਕੰਮ ਕਰਦੇ ਹਨ ਉਹਨਾਂ ਦੀ ਕੋਈ ਸੁਣਵਾਈ ਨਹੀਂ।

ਸਮਰਾਲਾ ਤੋਂ ਸ਼੍ਰੋਮਣੀ ਅਕਾਲੀ ਦਲ ਦੇ ਹਲਕਾ ਇੰਚਾਰਜ ਪਰਮਜੀਤ ਸਿੰਘ ਢਿੱਲੋਂ ਨੇ ਇਸ ਨੂੰ ਹਲਕਾ ਵਿਧਾਇਕ ਦੀ ਰੇਤ ਮਾਫੀਆ ਨਾਲ ਮਿਲੀਭੁਗਤ ਕਰਾਰ ਦਿੰਦੇ ਕਿਹਾ ਕਿ ਸ਼ਰੇਆਮ ਨਾਜਾਇਜ ਮਾਈਨਿੰਗ ਹੋ ਰਹੀ ਹੈ। ਨਵੇਂ ਮੁੱਖਮੰਤਰੀ ਨੇ ਵੀ ਕੇਵਲ ਆਪਣੀਆਂ ਧਮਕੀਆਂ ਰਾਹੀਂ ਮਾਫੀਆ ਨੂੰ ਇਹ ਸੁਨੇਹਾ ਦਿੱਤਾ ਸੀ ਕਿ ਹੁਣ ਉਹਨਾਂ ਦੇ ਘਰ ਭਰੇ ਜਾਣ।

ਦੂਜੇ ਪਾਸੇ ਸ਼੍ਰੀ ਮਾਛੀਵਾੜਾ ਸਾਹਿਬ ਦੀ ਬੀਡੀਪੀਓ ਰਾਜਵਿੰਦਰ ਕੌਰ ਨੇ ਖੁਦ ਮੰਨਿਆ ਕਿ ਮੰਜੂਰੀ ਜਮੀਨ ਲੈਵਲ ਕਰਨ ਵਾਸਤੇ ਦਿੱਤੀ ਹੀ ਹੈ। ਪਰ ਉਹਨਾਂ ਨੇ ਨਾਜਾਇਜ ਮਾਈਨਿੰਗ ਦੀ ਗੱਲ ਵੱਲ ਧਿਆਨ ਨਹੀਂ ਦਿੱਤਾ ਅਤੇ ਕਿਹਾ ਕਿ ਠੇਕੇਦਾਰ ਨੂੰ ਠੇਕਾ ਦਿੱਤਾ ਹੈ ਉਹ ਚਾਹੇ ਟਿੱਪਰ ਭਰੇ ਚਾਹੇ ਟਰਾਲੀਆਂ ਨਾਲ, ਜਿਸ ਤੋਂ ਅਧਿਕਾਰੀਆਂ ਦੀ ਮਿਲੀਭੁਗਤ ਹੋਣ ਦਾ ਖਦਸ਼ਾ ਜਾਹਰ ਹੋ ਰਿਹਾ ਹੈ।

ਜਦੋਂ ਇਸ ਪੂਰੇ ਮਾਮਲੇ ਨੂੰ ਲੈ ਕੇ ਪੁਲਿਸ ਜਿਲ੍ਹਾ ਖੰਨਾ ਦੇ ਐਸਪੀ (ਆਪਰੇਸ਼ਨ) ਤਰੁਨ ਰਤਨ ਨਾਲ ਗੱਲ ਕੀਤੀ ਤਾਂ ਉਹਨਾਂ ਨੇ ਕਿਹਾ ਕਿ ਮਾਮਲਾ ਉਹਨਾਂ ਦੇ ਧਿਆਨ ਵਿੱਚ ਆ ਗਿਆ ਹੈ। ਤੱਥ ਚੈਕ ਕਰਕੇ ਬਣਦੀ ਕਾਰਵਾਈ ਕੀਤੀ ਜਾਵੇਗੀ।

ਇਸ ਪੂਰੇ ਮਾਮਲੇ ਤੇ ਆਲ ਇੰਡੀਆ ਕਾਂਗਰਸ ਕਮੇਟੀ ਦੇ ਸਕੱਤਰ ਅਤੇ ਜਲਾਲਾਬਾਦ ਤੋ ਵਿਧਾਇਕ ਰਮਿੰਦਰ ਸਿੰਘ ਆਵਲਾ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਹਨਾਂ ਗੋਲਮੋਲ ਜਵਾਬ ਦਿੰਦੇ ਕਿਹਾ ਕਿ ਨਵੀਂ ਮਾਈਨਿੰਗ ਪਾਲਿਸੀ ਇੱਕ ਦੋ ਦਿਨਾਂ ਵਿੱਚ ਆ ਰਹੀ ਹੈ। ਮੇਰੇ ਇਲਾਕੇ ਜਲਾਲਾਬਾਦ ਵਿੱਚ ਵੀ ਬਹੁਤ ਮਾਈਨਿੰਗ ਸੀ ਜੋ ਹੁਣ ਜੀਰੋ ਹੈ।