CSA T20: ਡੇਵਾਲਡ ਬ੍ਰੇਵਿਸ ਨੇ ਤੋੜਿਆ ਕ੍ਰਿਸ ਗੇਲ ਦਾ ਰਿਕਾਰਡ, 26 ਗੇਂਦਾਂ 'ਚ ਬਣਾਈਆਂ 130 ਦੌੜਾਂ

ਦੱਖਣੀ ਅਫਰੀਕਾ ਦੇ ਨੌਜਵਾਨ ਵਿਸਫੋਟਕ ਬੱਲੇਬਾਜ਼ ਡੇਵਾਲਡ ਬ੍ਰੇਵਿਸ ਨੇ CSA T20 Challenge 'ਚ ਤੂਫਾਨੀ ਪਾਰੀ ਖੇਡੀ। ਉਸ ਨੇ ਨਾਈਟਸ ਟੀਮ ਖਿਲਾਫ 162 ਦੌੜਾਂ ਦੀ ਤੇਜ਼ ਪਾਰੀ ਖੇਡੀ। ਬ੍ਰੇਵਿਸ ਟੀ-20 ਕ੍ਰਿਕਟ 'ਚ ਸਭ ਤੋਂ ਵੱਧ ਵਿਅਕਤੀਗਤ ਸਕੋਰ ਬਣਾਉਣ ਦੇ ਮਾਮਲੇ 'ਚ ਸਾਂਝੇ ਤੀਜੇ ਸਥਾਨ 'ਤੇ ਪਹੁੰਚ ਗਏ ਹਨ।(ਫੋਟੋ ਕ੍ਰੈਡਿਟ-dewald_brevis_17)

ਨਾਈਟਸ ਦੇ ਖਿਲਾਫ ਬ੍ਰੇਵਿਸ ਨੇ 57 ਗੇਂਦਾਂ 'ਚ 13 ਚੌਕਿਆਂ ਅਤੇ ਇੰਨੇ ਹੀ ਛੱਕਿਆਂ ਦੀ ਮਦਦ ਨਾਲ 162 ਦੌੜਾਂ ਬਣਾਈਆਂ। ਉਨ੍ਹਾਂ 26 ਗੇਂਦਾਂ ਵਿੱਚ ਚੌਕਿਆਂ ਤੇ ਛੱਕਿਆਂ ਦੀ ਮਦਦ ਨਾਲ 130 ਦੌੜਾਂ ਬਣਾਈਆਂ। ਉਨ੍ਹਾਂ ਦੀ ਬਦੌਲਤ ਟਾਈਟਨਜ਼ ਦੀ ਟੀਮ ਨਿਰਧਾਰਤ 20 ਓਵਰਾਂ 'ਚ 3 ਵਿਕਟਾਂ ਦੇ ਨੁਕਸਾਨ 'ਤੇ 271 ਦੌੜਾਂ ਹੀ ਬਣਾ ਸਕੀ।

ਡੇਵਾਲਡ ਬ੍ਰੇਵਿਸ ਨੇ 284.21 ਦੀ ਸਟ੍ਰਾਈਕ ਰੇਟ ਨਾਲ ਇੰਨੀਆਂ ਦੌੜਾਂ ਬਣਾਈਆਂ ਹਨ। ਉਸ ਕੋਲ ਕ੍ਰਿਸ ਗੇਲ ਦਾ ਰਿਕਾਰਡ ਤੋੜਨ ਦਾ ਵਧੀਆ ਮੌਕਾ ਸੀ। ਗੇਲ ਨੇ ਆਈਪੀਐਲ 2013 ਵਿੱਚ ਬੈਂਗਲੁਰੂ ਰਾਇਲ ਚੈਲੰਜਰਜ਼ ਲਈ ਪੁਣੇ ਵਾਰੀਅਰਜ਼ ਖ਼ਿਲਾਫ਼ 66 ਗੇਂਦਾਂ ਵਿੱਚ 175 ਦੌੜਾਂ ਬਣਾਈਆਂ ਸਨ। ਹਾਲਾਂਕਿ ਬ੍ਰੇਵਿਸ ਨੇ ਸਟ੍ਰਾਈਕ ਰੇਟ ਦੇ ਮਾਮਲੇ 'ਚ ਚੋਟੀ ਦੇ 4 ਬੱਲੇਬਾਜ਼ਾਂ ਨੂੰ ਪਿੱਛੇ ਛੱਡ ਦਿੱਤਾ। ਗੇਲ ਨੇ 265 ਦੇ ਸਟ੍ਰਾਈਕਰ ਰੇਟ ਨਾਲ 175 ਦੌੜਾਂ ਬਣਾਈਆਂ।

ਡਿਵਾਲਡ ਬ੍ਰੇਵਿਸ ਤੋਂ ਇਲਾਵਾ ਜ਼ਿੰਬਾਬਵੇ ਦੇ ਹੈਮਿਲਟਨ ਮਸਾਕਾਦਜ਼ਾ ਅਤੇ ਅਫਗਾਨਿਸਤਾਨ ਦੇ ਹਜ਼ਰਤੁੱਲਾ ਜ਼ਜ਼ਈ ਨੇ ਵੀ 162 ਦੌੜਾਂ ਬਣਾਈਆਂ ਹਨ। ਹੈਮਿਲਟਨ ਨੇ 71 ਅਤੇ ਜਜ਼ਾਈ ਨੇ 62 ਗੇਂਦਾਂ 'ਤੇ ਅਜੇਤੂ 162 ਦੌੜਾਂ ਬਣਾਈਆਂ। ਇਸ ਤੋਂ ਇਲਾਵਾ ਆਰੋਨ ਫਿੰਚ ਨੇ 76 ਗੇਂਦਾਂ 'ਤੇ 172 ਦੌੜਾਂ ਦੀ ਪਾਰੀ ਖੇਡੀ ਹੈ।

ਡਿਵਾਲਡ ਬ੍ਰੇਵਿਸ ਇੱਕ ਆਲਰਾਊਂਡਰ ਹੈ। ਉਨ੍ਹਾਂ ਇਸ ਤੋਂ ਪਹਿਲਾਂ 31 ਟੀ-20 ਮੈਚਾਂ 'ਚ ਸਿਰਫ ਇਕ ਅਰਧ ਸੈਂਕੜਾ ਲਗਾਇਆ ਸੀ। ਇਸ ਬੱਲੇਬਾਜ਼ ਨੇ ਹੁਣ ਤੱਕ ਟੀ-20 ਦੀਆਂ 20 ਪਾਰੀਆਂ 'ਚ 809 ਦੌੜਾਂ ਬਣਾਈਆਂ ਹਨ। ਟੀ-20 ਕ੍ਰਿਕਟ 'ਚ 11 ਵਿਕਟਾਂ ਵੀ ਉਨ੍ਹਾਂ ਦੇ ਨਾਂ ਹਨ।

ਇਸ 19 ਸਾਲਾ ਖਿਡਾਰੀ ਨੇ ਆਈਪੀਐਲ 2022 ਵਿੱਚ ਮੁੰਬਈ ਇੰਡੀਅਨਜ਼ ਟੀਮ ਲਈ ਆਪਣਾ ਡੈਬਿਊ ਕੀਤਾ ਹੈ। ਉਸ ਨੇ 7 ਮੈਚਾਂ ਵਿੱਚ 142 ਦੀ ਸਟ੍ਰਾਈਕ ਰੇਟ ਨਾਲ 161 ਦੌੜਾਂ ਬਣਾਈਆਂ।