ਸਜ਼ਾ ਪੂਰੀ ਹੋਣ ਦੇ ਬਾਵਜੂਦ ਸਜ਼ਾ ਕੱਟ ਰਹੇ ਭਾਈ ਦਿਲਬਾਗ ਸਿੰਘ ਹੋਏ ਰਿਹਾਅ, 14 ਦੀ ਬਜਾਏ 17 ਸਾਲ ਕੱਟੀ ਸਜ਼ਾ

ਪਿੱਛਲੇ ਲੰਬੇ ਅਰਸੇ ਤੋਂ ਬੰਦੀ ਸਿੱਖਾਂ ਦੀ ਰਿਹਾਈ ਨੂੰ ਲੈ ਕੇ ਕਾਫੀ ਲੰਬੇ ਸਮੇਂ ਤੋਂ ਖਿੱਚੋ ਤਾਣ ਚੱਲ ਰਹੀ ਸੀ ਕਿਉਂਕਿ ਅਨੇਕਾਂ ਹੀ ਸਿੱਖ ਜੇਲਾਂ ਵਿੱਚ ਨਜ਼ਰਬੰਦ ਹਨ ਜਿਨ੍ਹਾਂ ਨੇ ਅਪਣੀ ਸਜ਼ਾਂ ਤਾਂ ਪੂਰੀ ਕਰ ਲਈ ਸੀ ਅਤੇ ਫਿਰ ਵੀ ਉਹ ਜੇਲਾਂ ਵਿਚ ਬੰਦ ਸਨ। ਬੀਤੇ ਸਮੇਂ ਬਰਗਾੜੀ ਮੋਰਚੇ ਮੌਕੇ ਸਿੱਖ ਸੰਗਤਾਂ ਨੇ ਪੰਜਾਬ ਸਰਕਾਰ ਤੋਂ ਮੰਗ ਕੀਤੀ ਸੀ ਕਿ ਬੰਦੀ ਸਿੱਖਾਂ ਨੂੰ ਰਿਹਾਅ ਕੀਤਾ ਜਾਵੇ। ਜਿਸ ਦੇ ਤਹਿਤ ਨਾਭਾ ਦੀ ਸਕਿਓਰਿਟੀ ਜੇਲ ਵਿਚ ਨਜ਼ਰਬੰਦ ਭਾਈ ਦਿਲਬਾਗ ਸਿੰਘ ਨੂੰ ਪੰਜਾਬ ਸਰਕਾਰ ਦੇ ਹੁਕਮਾਂ ਤਹਿਤ ਰਿਹਾਅ ਕਰ ਦਿੱਤਾ ਗਿਆ। ਭਾਈ ਦਿਲਬਾਗ ਸਿੰਘ ਦੇ ਉਪੱਰ ਟਾਡਾ ਐਕਟ ਦਾ ਮਾਮਲਾ ਦਰਜ ਸੀ ਅਤੇ ਉਸ ਦੇ ਤਹਿਤ ਹੀ ਸਜ਼ਾ ਭੁਗਤ ਰਿਹਾ ਸੀ।

ਇਸ ਮੌਕੇ ਭਾਈ ਦਿਲਬਾਗ ਸਿੰਘ ਨੇ ਕਿਹਾ, "ਮੇਰੀ ਸਜ਼ਾ 14 ਸਾਲ ਤੱਕ ਪੂਰੀ ਹੋ ਗਈ ਸੀ ਅਤੇ ਇਹ ਸਜ਼ਾ ਮੈਨੂੰ 17 ਸਾਲ ਕੱਟਣੀ ਪਈ। ਭਾਈ ਦਿਲਬਾਗ ਨੇ ਪੰਜਾਬ ਸਰਕਾਰ ਦਾ ਧੰਨਵਾਦ ਕੀਤਾ ਅਤੇ ਉਹਨਾਂ ਕਿਹਾ ਕਿ ਮੇਰੇ ਸਾਥੀ ਟਾਡਾ ਐਕਟ ਦੇ ਤਹਿਤ 12 ਸਾਲ ਦੀ ਸਜ਼ਾ ਕੱਟ ਕੇ ਰਿਹਾਅ ਹੋ ਗਏ ਸੀ ਪਰ ਸਾਨੂੰ 17 ਸਾਲ ਬਾਅਦ ਰਿਹਾ ਕੀਤਾ ਹੈ ਅਤੇ ਕਾਂਗਰਸ ਸਰਕਾਰ ਨੇ ਮੈਨੂੰ ਟਾਡਾ ਐਕਟ ਦੇ ਤਹਿਤ ਪਹਿਲੀ ਵਾਰ ਰਿਹਾਅ ਕੀਤਾ ਹੈ। ਭਾਈ ਦਿਲਬਾਗ ਸਿੰਘ ਨੇ ਕਿਹਾ ਕਿ ਮੇਰੇ ਉੱਤੇ ਝੂਠਾ ਕੇਸ ਪਾਇਆ ਗਿਆ ਸੀ ਅਤੇ ਉਹਨਾਂ ਕਿਹਾ ਕਿ 10 ਸਾਲ ਅਕਾਲੀਆਂ ਦੀ ਸਰਕਾਰ ਰਹੀ ਪਰ ਉਹਨਾਂ ਨੇ ਕਿਉਂ ਰਿਹਾਅ ਨਹੀਂ ਕੀਤਾ ਇਹ ਉਹਨਾਂ ਨੂੰ ਪਤਾ ਹੋਵੇਗਾ।"

ਇਸ ਮੌਕੇ ਸਿੱਖ ਰਿਲੀਵ ਸੰਸਥਾ ਯੂ.ਕੇ ਦੇ ਆਗੂ ਨੇ ਕਿਹਾ, "ਅਸੀਂ ਸੰਸਥਾਂ ਵੱਲੋਂ ਵੀ ਕੇਸ ਲੜ ਰਹੇ ਸੀ ਕਿ ਬੰਦੀ ਸਿੱਖਾਂ ਨੂੰ ਰਿਹਾਅ ਕੀਤਾ ਜਾਵੇ ਅਤੇ ਇਸ ਦੇ ਨਾਲ ਪੰਜਾਬ ਸਰਕਾਰ ਨੇ ਅੱਜ ਭਾਈ ਦਿਲਬਾਗ ਨੂੰ ਰਿਹਾਅ ਕੀਤਾ ਹੈ, ਅਸੀਂ ਧੰਨਵਾਦੀ ਹਾਂ ਕੈਪਟਨ ਸਰਕਾਰ ਦੇ।"